Kasi Baibolo Likuti Wuli pa Nkhani ya Wanangwa Wakusankha? Kasi Chiuta Wali Kulemberathu Chilichose Chakukhwaskana na Imwe?
Ivyo Baibolo likuyowoya
Chiuta wali kutilenga na wanangwa wakusankha. Tili na wanangwa wakusankha ivyo tikukhumba kuchita m’malo mwakuti Chiuta ndiyo watisankhirenge. Wonani ivyo Baibolo likuyowoya.
Chiuta wali kulenga ŵanthu mu chikozgo chake. (Genizesi 1:26) Mwakupambana na vinyama ivyo vikwendera waka mahara agho vili kulengeka nagho, ise tili kulengeka na mikhaliro yiwemi ya Chiuta, nga chitemwa na urunji. Kweniso tili na wanangwa wakusankha nga Chiuta.
Ivyo tikusankha kuchita vikukhwaskaso umoyo withu. Baibolo likutiphalira kuti, ‘tisore umoyo . . . mwakupulikira mazgu gha Chiuta’ panji kuti malango ghake. (Dotoronome 30:19, 20) Tiŵavyenge wanangwa wakusankha, mphanyi pempho ili languŵa lambura ntchito, kweniso mphanyi zanguŵa nkhaza. M’malo mwakutichichizga kuchita ivyo wayowoya, Chiuta wakutipempha mwachitemwa kuti: “Muŵenge kuti mwapulikira malango ghane! Mphanyi mtende winu waŵa nga ni mlonga.”—Yesaya 48:18.
Para vinthu vinyake vyatiyendera makora panji vyatiyendera uheni, tileke kughanaghana kuti ndimo Chiuta wakanozgera. Usange tikukhumba kuti ivyo tikukhumba vitiyendere makora, tikwenera kuŵikapo mtima. Baibolo likuti: “Chilichose icho woko lako lasanga kuti lichite, uchichite na nkhongono zako zose.” (Mupharazgi 9:10) Kweniso likuti: “Maghanoghano gha munthu wachitatata ghakovwira kuti vinthu vyende makora.”—Zintharika 21:5.
Wanangwa wakusankha ntchawanangwa chakuzirwa chakufuma kwa Chiuta chifukwa chikutovwira kuti timutemwenge na ‘mtima withu wose’ kwambura kuchichizgika.—Mateyu 22:37.
Kasi Chiuta nkhongono zake wakuchitira waka chilichose?
Baibolo likutisambizga kuti Chiuta Ngwankhongonozose, kung’anamura kuti nkhongono zake zilije chigoti ndipo palije uyo wangamutondeska kuchita ivyo wakukhumba. (Yobu 37:23; Yesaya 40:26) Ndipouli, Chiuta wakugwiliskira ntchito nkhongono zake pa chilichose yayi. Mwachiyelezgero, Baibolo likuti Chiuta ‘wakajikora’ pambere wandaparanye Ŵababuloni, awo ŵakaŵa ŵalwani ŵa ŵanthu ŵake. (Yesaya 42:14) Mazuŵa ghano napo, Chiuta wazikira na ŵanthu awo ŵakugwiliskira ntchito uheni wanangwa wawo kupweteka ŵanyawo. Kweni Chiuta waŵalekelerenge waka kwamuyirayira yayi.—Salimo 37:10, 11.