Kasi Baibolo Likuzomerezga Vyakuphakaphaka Kweniso Kuvwara Majuda?

Ivyo Baibolo likuyowoya

Nangauli Baibolo likulongosora vinandi yayi, kweni likukanizga yayi vyakuphakaphaka, kuvwara majuda, kweniso kujitozga kwa mtundu uliwose. M’malo mwa kuŵika chomene mtima pa kujitozga kuwaro, Baibolo likuti kujitozga kwithu “kuŵe kwa munthu wakubisika wa mu mtima mu chakuvwara chambura kwanangika cha mzimu wakufwasa na wakuzika.”—1 Petrosi 3:3, 4.

Baibolo likukanizga yayi kujitozga

• Baibolo likuti ŵanakazi ŵanyake ŵakugomezgeka ŵakajitozganga. Rabeka, uyo wakatengwa kwa Yisake mwana wa Abrahamu, wakavwaranga mphete yagolide ya pamphuno, makhoza ghagolide, na majuda ghakudura chomene. Vinthu ivi ŵakamupa mba wiskevyara. (Genizesi 24:22, 30, 53) Esitere nayo wakazomera “vyakujitozgera” apo wakanozgekeranga kuŵa fumukazi ya Ufumu wa Peresiya. (Esitere 2:7, 9, 12) Vyakujitozgera ivi vikaŵa “mafuta” na “vyakuphaka vyakupambanapambana.”—New International Version; Easy-to-Read Version.

• Baibolo likuyaniska majuda na vinthu vinyake viwemi. Mwachiyelezgero, likuyaniska munthu uyo wakupeleka ulongozgi uwemi na “ndeŵeleŵe yagolide . . . ku khutu lakupulika.” (Zintharika 25:12) Mwakuyana waka, Chiuta wakayaniska vinthu viwemi ivyo wakachitiranga Ŵaisrayeli na ivyo mwanalume wakuchitira mwali wake pakumutozga na makhoza, nikilesi, na ndeŵeleŵe. Ntheura mtundu wa Israyeli ukaŵa “wakutowa chomene.”—Ezekiyeli 16:11-13.

Utesi pa nkhani ya vyakuphakaphaka kweniso kuvwara majuda

Utesi: Fumukazi yiheni Yezebeli, yikaphakanga vinthu vifipa mu maso ghake (eye shadow), kulongora kuti vyakuphakaphaka ni viheni.—2 Mathemba 9:30.

Unenesko: Yezebeli wakeruzgika chifukwa cha umo wakawonekeranga yayi, kweni chifukwa cha viheni ivyo wakachitanga. Iyo wakaŵa fwiti kweniso wakakomanga ŵanthu.—2 Mathemba 9:7, 22, 36, 37.