Mwanakazi Wachiyuda Wakulongosora za Chipulikano Chake

Tiphalirani vya mbiri yinu.

Nkhababika ku United States mu 1979. Ŵapapi ŵane nthengwa yikamara apo nkhaŵa na vyaka vitatu. Amama ŵakanisambizganga vya Chiyuda ndipo nkhalutanga ku sukulu ya Chiyuda. Nkhati nakwaniska vyaka 7 tikaluta ku Israel uko tikakhalako chaka chimoza ndipo nkhasambiranga sukulu ya ku kibbutz. Pamanyuma tikasamukira ku Mexico.

Nangauli ku Mexico kukaŵavya ma sinagoge, kweni nkhalutilira kuchita mitheto ya Chiyuda. Pa Sabata nkhabuskanga ma kandulu, kuŵerenga Torah, ndipo nkhalombanga mwakugwiliskira ntchito siddur panji kuti buku la malurombo. Ku sukulu nkhatemwanga kuphalira ŵanyane kuti chisopa chane ndicho ntchaunenesko. Nkhaŵa kuti nindaŵerengepo Chipangano Chasono cha Baibolo icho chikulongosora chomene vya uteŵeti wa Yesu Khristu na ivyo wakasambizganga. Kweniso Amama ŵakanikaniranga kuŵerenga Baibolo ili, iwo ŵakawopanga kuti ningaleka kulondezga mitheto yithu.

Chifukwa wuli mukasankha kuŵerenga Chipangano Chasono?

Nkhani nakwaniska vyaka 17, nkhalutaso ku United States kuti nkhamalizge sukulu. Nkhasangana na munthu munyake uyo wakaniphalira kuti, umoyo wane ungaŵa wa chandulo yayi kwambura Yesu.

Nkhamuphalira kuti, “Waliyose uyo wakugomezga mwa Yesu ngwakupuluka.”

Wakanifumba kuti “Kasi uli kuŵerengapo Chipangano Chasono?”

Nkhamuzgora kuti “Yayi.”

Wakaniphalira kuti “Kasi ukuwona kuti ni mahara kususka vinthu ivyo ukuvimanya makora yayi?”

Mazgu agha ghakanifika pa mtima chomene, chifukwa nane nyengo zose nkhagomezganga kuti munthu uyo wakususka chithu kwambura kuchimanya mbuchindere. Ntheura nkhatora Baibolo lake na kwamba kuŵerenga Chipangano Chasono.

Kasi ivyo mukaŵerenga vikamukhwaskani wuli?

Nkhazizwa chomene kuwona kuti awo ŵakalembanga Tesitamenti Lasono ŵakaŵa Ŵayuda. Apo nkhaŵerenganga nkhasanga kuti Yesu wakaŵa munthu walusungu, wakujiyuyura kweniso uyo wakakhumbanga kovwira ŵanthu. Nkhaluta ku layibulare, nkhakabwereka mabuku agho ghakulongosora vya Yesu. Kweni pakaŵavya na buku limoza ilo likanikhorweska kugomezga kuti Yesu wakaŵa Mesiya. Nakuti mabuku ghanyake ghakatenge Yesu ni Chiuta, nkhawona kuti uwu mbuchindere waka. Ntheura nkhajifumbanga kuti, kasi wakalombangaso kwa iyo mweneko? Chifukwa wuli Yesu wakafwa, apo Baibolo likuti, Chiuta “wakufwa yayi?”a

Kasi mukachita wuli kuti musange mazgoro gha mafumbo agho mukaŵa nagho?

Nkhaŵikapo mtima kuti nisange unenesko. Ntheura nkhalomba kwa Yehova kakwamba kwambura siddur uku nkhulira. Pakati pajumpha nyengo yichoko waka nkhapulika kugogoda pa chijaro. Ŵakaŵa Ŵakaboni ŵa Yehova ŵaŵiri. Ŵakanipa limoza mwa mabuku agho ŵakusambizgira ŵanthu Baibolo. Ivyo nkhaŵerenga mu buku ili kweniso ivyo tikadumbiskana vikanifika pa mtima, ndipo vikanovwira kumanya kuti ivyo Ŵakaboni ŵa Yehova ŵakugomezga vikujintha mu Baibolo. Mwachiyelezgero, Ŵakaboni ŵakugomezga yayi kuti Yesu wali mu gulu la ŵachiuta ŵatatu mwa yumoza, kweni ni “Mwana wa Chiuta”b kweniso “uyo Chiuta wakamba kulenga.”c

Kufuma apo nkhalutaso ku Mexico, ndipo nkhalutilira kusambira vya mauchimi gha Mesiya na Ŵakaboni ŵa Yehova. Nkhazizwa chomene kuwona unandi wa mauchimi gha Yesu! Ndipouli Nkhaghakayikiranga. Ntheura nkhajifumba kuti: ‘Kasi ni Yesu pera uyo wakafiska mauchimi agha?’ kweni ‘Wuli usange wakachitanga waka vinthu mwakuchenjera kuti viŵe nga kuti mauchimi ghakafiskikira pa iyo nadi?’

Kasi ntchivichi chikamukhorweskani kuti Yesu wakaŵa nadi Mesiya?

Ŵakaboni ŵa Yehova ŵakanilongora maukaboni agho ghakalongora kuti mulimose umo vingaŵira, vingachitika yayi kuti munthu ŵachite vinthu vinyake mwauryarya kuti uchimi ufiskike pa iyo. Mwachiyelezgero, vyaka 700 pambere Yesu wandababike, ntchimi Mika yikayowoya kuti Mesiya wazamubabikira mu Betelehemu, Yudeya.d Kasi walipo uyo wangachita kusankha kwakuti wababikire? Yesaya wakayowoya kuti Mesiya wazamukomeka nga ntchigeŵenga, kweni wazamusungika nga munthu musambazi chomene.e Mauchimi ghose agha ghakafiskika nadi pa Yesu.

Ukaboni unyake ni mzere uwo Yesu wakababikiramo. Baibolo likayowoyerathu kuti Mesiya wazamufuma mu mphapu ya Themba Davide.f Ŵayuda ŵakasunganga chomene mdauko, ivi vikawovwira ŵanthu kugomezga kuti Yesu wakaŵa nadi wa mbumba ya Davide, nakuti walekenge kuŵa wa mzere wa Davide mphanyi ŵalwani ŵake ŵakamususka chomene! Kweni ŵakatondeka kususka chifukwa Yesu wakafuma nadi mwa Davide. Nakuti mzinda ukachita kumuchema kuti “Mwana wa Davide.”g

Mu 70 C.E. pakati pajumpha vyaka 37 kufuma apo Yesu wakafwira, ŵasilikari Ŵachiroma ŵakabwangasura mzinda wa Yerusalemu, ndipo mipukutu yakuyowoya vya mdauko yikasoŵa. Mipukutu yikayowoyanga kuti Yesu wakeneranga kuwoneka pambere chindakwane chaka cha 70 C.E.

Kasi ivi vikamukhwaskani wuli?

Lemba Dotoronome 18:18, 19, likayowoyerathu kuti Chiuta wazamuwuska ntchimi nga Mozesi mu Israyeli. Chiuta wakayowoya kuti: “Waliyose uyo wazamuleka kupulikira mazgu ghane agho ntchimi iyo yizamuyowoya mu zina lane, wazamuzgora kwa ine.” Nkhati nasambira Baibolo lose nkhagomezga na mtima wose kuti Yesu wa ku Nazarete wakaŵa nadi Mesiya.