Kumalana na Suzgo Ilo Likamba Kale

SONO pa charu pali viyowoyero pafupifupi 7,000. Ichi chikupangiska suzgo pa nkhani za mendero, malonda, masambiro, na kendeskero ka boma. Kweni ivi vyamba sono yayi. Vyaka pafupifupi 2,500 ivyo vyajumpha, Themba Ahasuweru (uyo wakwenera kuti wakaŵa Zekisesi I) la Ŵaperesiya likaŵika dango lakuti ŵanthu wose ŵalondezgenge. Ntheura ŵakatuma uthenga mu vigaŵa vyose, “kwamba ku Indiya m’paka ku Etiyopiya, vigaŵa 127. Chigaŵa chilichose ŵakachilembera mu kalembero kake na ku ŵanthu wose mu chiyowoyero chawo.”a

Mazuŵa ghano, mawupu ghanandi, nanga ni maboma, ghakutondeka kuchita ivyo Ŵaperesiya ŵakachita. Kweni pali gulu limoza pera ilo likuchita ivi. Gulu ili Mbakaboni ŵa Yehova. Iwo ŵakupanga magazini, sumu, madirama na mavidiyo, mabuku, kweniso Baibolo, mu viyowoyero vyakujumpha 750. Pa viyowoyero ivi paliso viyowoyero 80 vya mawoko. Ŵakaboni ŵakupangaso mabuku ghakupambanapambana gha vilembo vya Braille kuti ŵawovwire ŵanthu awo ŵakuwona yayi.

Kweni Ŵakaboni ŵa Yehova ŵakuchita vyose ivi kuti ŵasangirepo ndalama yayi. Nakuti ŵanthu awo ŵakung’anamura vinthu ivi na ŵanyake awo ŵakovwirana nawo, mbakujipeleka waka. Chifukwa wuli ŵakulimbikira kung’anamura vinthu mu viyowoyero vinandi nthena, ndipo ŵakuchita wuli pakung’anamura?