Makani Ghawemi mu Viyowoyero 500

APO nkhondo ya pa wene na wene yikaŵa mukati ku Rwanda, gulu licoko la ŵang’anamuri likacimbira ndipo likaleka katundu wawo yose. Ndipouli, likayezgayezga kunyamura makompyuta gha m’mawoko na kuluta nagho ku misasa uko likacimbilira. Cifukwa wuli? Likakhumbanga kulutizga kung’anamura mabuku ghakulongosora Baibolo mu ciyowoyero ca Kinyarwanda.

Mwanakazi munyake ku Southeast Asia, wakulemba pa kompyuta yake mpaka usiku. Wakuvuka comene, wakupulika cithukivu cikuru, ndipo magesi ghakuzimwazimwa na kutimbanizga mulimo wake wa kung’anamura. Wakujisuzgiraci nthena? Wakukhumba kuti wamalizgenge mulimo wake pambere lindafike zuŵa lakusindikizgira.

Aŵa mbamoza mwa ŵang’anamuri pafupifupi 2,300 ŵakujipeleka awo ŵakucita mulimo wawo mu vigaŵa 190 pa caru cose capasi. Ŵali na vilimika vya pakati pa 20 na 90, ndipo ŵakugwira nchito na mtima wose mwakuti ŵanthu ŵapembuzgike na uthenga wa mu Baibolo mu viyowoyero 500.—Uvumbuzi 7:9.

Kufikira Ŵanthu ŵa Viyowoyero Vyakupambanapambana

Mulimo wa kung’anamura uwo Ŵakaboni ŵa Yehova ŵakucita wasazgikira comene. Mwaciyelezgero, mu 1985, Gongwe la Mulinda likasindikizgikanga pa nyengo yimoza mu viyowoyero 23. Pa nyengo iyo, ukaŵa mulimo ukuru comene. Mazuŵa ghano, Gongwe la Mulinda lili mu viyowoyero 176, ndipo likusindikizgika pa nyengo yimoza mwakuti awo ŵakuŵazga ŵasambire vinthu vyakuyana pa nyengo yimoza.

Mu viyowoyero pafupifupi 50, ni Gongwe la Mulinda pera ilo likusindikizgika nyengo zose. Cifukwa wuli? Cifukwa makampani ghanandi agho ghakupanga mabuku ngakunweka viŵi yayi kusindikizga mabuku mu viyowoyero ivi. Kweni Ŵakaboni ŵa Yehova pa caru cose ŵakovwira kuti Mazgu gha Ciuta ndiposo mabuku agho ghakulongosora Baibolo ghasangike kulikose uko ghakukhumbikwa.—2 Ŵakorinte 8:14.

Ŵanthu ŵakuzirwiska comene uthenga wa mu Baibolo para uli mu ciyowoyero cawo. Mwaciyelezgero, mabuku ghakulongosora Baibolo, sono ghamba kuŵa mu ciyowoyero ca Miskito, ico cikuyowoyeka na ŵanthu pafupifupi 200,000 ku Nicaragua. Mwanakazi munyake wakacemeska Buku Lane la Nkhani za mu Baiboloa mu ciyowoyero ca Miskito. Muliska munyake wakaŵapo apo mwanakazi uyu wakapokeranga buku ili. Muliska uyu wakati waliwona buku lakutowa ili, wakakhumba kuti liŵe lake. Mwanakazi uyu wakakana kumupa nangauli muliska wakati wamupenge khofi wa makilogiramu 20, kuti ŵasinthane na buku.

Mu vilimika khumi ivyo vyajumpha, mabuku ghakulongosora Baibolo ghang’anamurika mu viyowoyero vyakujumpha 12 vya ku Mexico. Vinyake mwa viyowoyero ivi ni Maya, Nahuatl, na Tzotzil. Mu vilimika vyambura kukwana khumi, mipingo ya Ŵakaboni ŵa Yehova mu caru ici yikasazgikira kufuma pa 72 kufika pa 1,200. Iyi ni mipingo ya viyowoyero vyakupambanapambana kusazgapo ciyowoyero ca mawoko. Ŵakaboni ŵa Yehova ŵangapanda uthenga wa mu Baibolo mu mitima ya ŵanthu, kweni Ciuta ndiyo wakumezga mbuto zaunenesko.—1 Ŵakorinte 3:5-7.

Baibolo Liphya mu Viyowoyero 80

Mazuŵa ghano, Ŵakaboni ŵa Yehova ŵafwilirapo comene kuti Baibolo lose la New World Translation of the Holy Scriptures panji cigaŵa waka lisindikizgike mu viyowoyero 80. Kasi ŵanthu ŵalipokelera wuli? Pakuyowoya za Baibolo la mu ciyowoyero ca Tswana, yumoza wa Ŵakaboni ŵa Yehova ku South Africa wakati: “Ici nchilwero ciwemi comene. Linovwirenge kuti nipulikiske na kuzirwiska comene Mazgu gha Ciuta. Ndipusu mwakuti likusuzga yayi kuŵazga ndipo ndakukondweska.” Pakuyowoya za Baibolo la ciyowoyero ca Tsonga, mwanalume munyake wa ku Mozambique wakalemba kuti: “Nanga pangaŵa mabuku ghanandi ghakulongosora Baibolo kweni usange palije Baibolo vikuŵa nga ŵaleza ŵakumwetuka waka kwambura vula. Ndipouli, vula yikaŵa nga yalokwa apo Baibolo la New World Translation likafumiskika mu ciyowoyero ca Tsonga.”

Awo ŵakung’anamura na kuthandazga makani ghawemi agho ghali mu Baibolo ŵakufiska ucimi wakale. Yesu Khristu ndiyo wakayowoya ucimi uwu, wakati: “Makani ghawemi agha gha ufumu, ghazamupharazgika mu caru cose kuti uŵe ukaboni ku mitundu yose; penepapo ndipo umaliro wizenge.”—Mateyu 24:14.

[Mazgu ghamusi]

[Graph on page 31]

(Mu magazini yakusindikizga ndimo vikuwoneka makora)

80 2010 500 2010

36 2000

13 1990 200 1990

190 1980

7 1970 165 1970

125 1960

1 1950 88 1950

UNANDI WA VIYOWOYERO

[Vithuzithuzi pa peji 24, 25]

Ŵanthu ŵakujipeleka pafupifupi 2,300 ŵakung’anamura mabuku ghakulongosora Baibolo mu viyowoyero 500

BENIN

SLOVENIA

ETHIOPIA

BRITAIN