Mu Ufumu wa Chiuta Muzamuŵa “Mtende Wakuzara”

Ufumu wa Chiuta uwo tawulindilira kwa nyengo yitali, sonosono apa wiziskenge mtende na chivikiliro pa charu chose chapasi. Lemba la Salimo 72:7 likuti: “Kuzamuŵa mtende wakuzara.” Kweni kasi mphawuli apo Ufumu wa Chiuta uzamwamba kulamulira pa charu chapasi? Kasi uzamulamulira wuli? Ndipo kasi mungachita wuli kuti muzakasange vitumbiko mu Ufumu uwu?

KASI MPHAWULI APO UFUMU WA CHIUTA WIZIRENGE?

Baibolo likayowoyerathu vinthu vyapadera ivyo vizamuchitika kulongora kuti Ufumu wa Chiuta uli pafupi. Vinthu ivi ni: Nkhondo ya pa charu chose, njara, matenda, vindindindi vinandi, kweniso kwandana kwa vinthu viheni. Vyose ivi vikupanga “chimanyikwiro.”—Mateyu 24:3, 7, 12; Luka 21:11; Chivumbuzi 6:2-8.

Baibolo likayowoyerathu kuti: “Mu mazuŵa ghaumaliro kuzamuŵa nyengo zinonono na zakusuzga. Pakuti ŵanthu ŵazamuŵa ŵakujitemwa, ŵakutemwa ndalama, . . . ŵambura kupulikira ŵapapi, ŵambura kuwonga, ŵambura kugomezgeka, ŵambura chitemwa, ŵanonono, ŵakusesa, ŵambura kujikora, ŵakofya, ŵambura kutemwa uwemi, . . . ŵakujitukumura na kunotha, ŵakutemwa vyakusanguluska m’malo mwa kutemwa Chiuta.” (2 Timote 3:1-4) Kale napo, ŵanthu ŵanyake ŵakaŵa nayo mikhaliro iyi. Kweni mazuŵa ghano ndipo vyafika paheni chomene.

Mauchimi agha ghakamba kufiskika mu 1914. Nadi, ŵakumanya mbiri, ŵandyali, kweniso ŵakulemba mabuku, ŵali kuyowoyapo umo charu chikasinthira pamanyuma pa 1914. Mwachiyelezgero, kaswiri munyake wakumanya vya mbiri wa ku Denmark, zina lake Peter Munch wakalemba kuti: “Nkhondo iyo yikachitika mu 1914, yikasintha chomene vinthu mu mbiri ya ŵanthu. Pambere chaka ichi chindafike, ŵanthu ŵakawonanga kuti vinthu mu charu vikwenda makora chomene, . . . kweni yikafika nyengo ya masoka, kwenjerwa, kutinkhana, ndipo pa charu chose pakaŵavya chivikiliro.”

Chakukondweska ntchakuti pamanyuma pa vinthu ivi, pa charu pazamuŵa mtende. Vinthu viheni ivyo vikuchitika vikulongora kuti Ufumu uwo uzamulamulira pa charu chose chapasi uli pafupi. Apo Yesu wakayowoyanga za vimanyikwiro ivyo vizamuchitika mu nyengo yaumaliro, wakayowoyaposo chinthu chakukondweska, wakati: “Makani ghawemi agha gha Ufumu, ghazamupharazgika mu charu chose chapasi kuti uŵe ukaboni ku mitundu yose, penepapo ndipo umaliro wizenge.”—Mateyu 24:14.

Kanandi uthenga uwo Ŵakaboni ŵa Yehova ŵakupharazga ukuŵa wa makani ghawemi. Lekani magazini agho ŵakufumiska ghakumanyikwa kuti Gongwe la Mulinda Likupharazga Ufumu wa Yehova. Magazini agha ghakusangika mu viyowoyero vyakujumpha 338 ndipo kanandi Gongwe la Mulinda likuyowoya vinthu vyakukondweska ivyo Ufumu wa Chiuta uzamuchitira ŵanthu na charu.

KASI UFUMU WA CHIUTA UZAMULAMULIRA WULI?

Pali vinthu vinayi vyakuzirwa ivyo vikuzgora fumbo ili:

1. Ufumu uwu uzamugwiliskira ntchito mulongozgi waliyose yayi wandyali.

2. Ŵalongozgi ŵandyali pa charu chose ŵazamukhumba yayi kuthera ndipo ŵazamukhumba kwimikana na Ufumu wa Chiuta.—Salimo 2:2-9.

3. Ufumu wa Chiuta uzamuparanya maufumu gha ndyali agho ghakulutilira kulamulira ŵanthu. (Daniyeli 2:44; Chivumbuzi 19:17-21) Nkhondo yaumaliro ya pa charu chose iyi yikuchemeka kuti Aramagedoni.—Chivumbuzi 16:14, 16.

4. Wose awo ŵakupulikira Ufumu wa Chiuta ŵazamupona pa Aramagedoni na kunjira mu charu chiphya umo muzamuŵa mtende. Baibolo likuti ŵanthu aŵa ŵakupanga “mzinda ukuru” ndipo ŵakwenera kuti ŵazamuŵa mamiliyoni ghanandi.—Chivumbuzi 7:9, 10, 13, 14.

KASI MUNGACHITA WULI KUTI MUZAKASANGE VITUMBIKO MU UFUMU UWU?

Chinthu chakwamba chakuzirwa kuti tizakasange vitumbiko mu Ufumu wa Chiuta ntchakuti tikwenera kusambira. Nadi, Yesu wakayowoya kwa Adada ŵake mu lurombo kuti: “Kuti ŵaŵe na umoyo wamuyirayira, ŵakwenera kumumanyani imwe Chiuta waunenesko yekha, ndiposo Yesu Khristu, uyo mukamutuma.”—Yohane 17:3.

Para ŵanthu ŵamumanya Yehova Chiuta, vinthu vikuŵayendera makora. Wonani vinthu viŵiri: Chakwamba, ŵakuŵa na chipulikano mwa iyo. Chipulikano ichi chikujintha pa ukaboni wanadi, ndipo chikuŵawovwira kuti ŵaŵe na chigomezgo chakuti Ufumu wa Chiuta ngwanadi ndipo uli pafupi. (Ŵahebere 11:1) Chachiŵiri, ŵakwamba kumutemwa chomene Chiuta na ŵazengezgani. Chifukwa chakuti ŵakumutemwa Chiuta, ŵakwamba kumupulikira na mtima wose. Pakuti ŵakutemwa ŵazengezgani ŵawo, ŵakupulikira mazgu gha Yesu ghakuti: “Ivyo mukukhumba kuti ŵanthu ŵamuchitiraninge, ndivyo namwe muŵachitirenge.”—Luka 6:31.

Nga ni dada wachitemwa, Mlengi withu wakutikhumbira viwemi chomene. Iyo wakukhumba kuti tizakaŵe na umoyo uwo Baibolo likuti “umoyo wanadi.” (1 Timote 6:19) Mazuŵa ghano tili na“umoyo wanadi” yayi. Ŵanthu ŵanandi ŵakukhala mwakusuzgikira. Kuti muŵe waka na chithuzithuzi cha umo “moyo wanadi” uzamuŵira, wonani vinthu vinyake vyakukondweska ivyo Ufumu wa Chiuta uzamuchitira ŵanthu.