Kujikora Para Takwiya
Baibolo likutichenjezga za nkharo izo zingananga umoyo withu na kutichiska kuti tiŵenge na nkharo ziwemi.
UKALI
FUNDO YA MU BAIBOLO: “Munthu wambura kukalipa luŵiro ni muwemi kuluska munthu wankhongono.”—Zintharika 16:32.
IVYO FUNDO IYI YIKUNG’ANAMURA: Usange takwiya tikusanga chandulo para tikujikora. Nangauli nyengo zinyake tingakwiya, kweni vinthu vinganangika para tingakwiya mwakujumphizga. Kafukufuku uyo wachitika sonosono apa, wakulongora kuti para munthu wakwiya kanandi wakuyowoya na kuchita vinthu ivyo pamanyuma wakuzakadandawura navyo.
IVYO MUNGACHITA: Sambirani kujikora pambere mundakwiye chomene. Ŵanthu ŵanyake ŵakughanaghana kuti para munthu ni mukali chomene ndikuti wali na nkhongono, kweni unenesko ngwakuti ukali ntchimanyikwiro cha nkhongono yayi. Baibolo likuti “munthu uyo wakutondeka kujiwezga ku ukali, wali nga ni msumba uwo wagumulika, wambura linga.” (Zintharika 25:28) Nthowa yiwemi yakuwezgera ukali nkhupulikiska dankha ivyo vyachitika, pambere mundalongore ukali. “Munthu wamahara wakuwezgako ukali wake.” (Zintharika 19:11) Tikwenera kupulikiska dankha nkhani yose, pambere tindachitepo kanthu ndipo ivi vingatovwira kuti mtima withu ukhale pasi.
MUWONGENGE
FUNDO YA MU BAIBOLO: “Longorani kuti muli ŵakuwonga.”—Ŵakolose 3:15.
IVYO FUNDO IYI YIKUNG’ANAMURA: Munthu uyo wakuwonga wakuŵa wakukondwa. Nanga ni ŵanthu awo ŵali kutaya ŵakutemweka ŵawo panji vinthu vinyake vyakuzirwa, ŵakuzomerezga fundo iyi. Ŵanthu aŵa ŵakuyowoya kuti ŵakuŵa ŵakukondwa chifukwa ŵakuŵika maghanoghano pa vinthu ivyo ŵali navyo kuluska kughanaghanira ivyo ŵali kutaya.
IVYO MUNGACHITA: Zuŵa lililose lembani vinthu viwemi ivyo mungawonga nanga vingaŵa vichokovichoko. Ivi vingaŵa vinthu nga, nkhuŵala kwa zuŵa, ntchezgo ziwemi na ŵanthu awo mukuŵatemwa panji kuwonga kuti muli ŵamoyo zuŵa ilo. Para mukuwonga vinthu viwemi ivyo muli navyo, muŵenge ŵakukondwa ndipo ivi vimovwiraninge kuti muleke kusuzgika maghanoghano.
Kweniso ntchakuzirwa chomene kughanaghanira viwemi ivyo ŵamubanja linu kweniso ŵabwezi ŵinu ŵakuchita makora, ivyo mungaŵawonga. Ndipo para mwamanya ivyo mungaŵawonga, ŵaphalirani. Mungaŵaphalira maso na maso, kuŵalembera kalata, imelo panji meseji. Para mwachita nthena, ubwezi winu na ŵanji ukhorenge kweniso muŵenge ŵakukondwa pakumanya kuti, mukuchitira ŵanji viwemi.—Milimo 20:35.
FUNDO ZINYAKE ZA MU BAIBOLO
Mungachita dawunilodi Baibolo lakuchita kutegherezga pa intaneti. Likusangika pa jw.org mu viyowoyero 40
GEGANI MPHINDANO.
“Kwambiska zawe vili nga nkhujulira maji. Pambere mbembe yindambe, iwe fumapo.”—ZINTHARIKA 17:14.
LEKANI KWENJERWA CHOMENE NA VYAMUNTHAZI.
“Kwenjerwa napachoko chara vya zuŵa lakulondezgapo, chifukwa zuŵa lakulondezgapo liŵenge na vyenjezgo vyake. Zuŵa lililose lili na masuzgo ghake.”—MATEYU 6:34.
GHANAGHANIRANIPO DANKHA PAMBERE MUNDAKWIYE.
“Kaghanaghaniro kawemi kakusungilirenge, ndipo umanyi ukuvikilirenge.”—ZINTHARIKA 2:11.