VYAKOVWIRA MABANJA
Umo Mungachitira Kuti Muwezgengeko Ukali
Mfumu panji muwoli winu wangamukwiyiskani ndipo imwe mukulongora nga kuti vyose vili waka makora. Kweni munyinu wakuwona kuti vinthu vili makora yayi, ndipo wakumufumbani. Ivi vikupangiska kuti mukwiye chomene. Kasi mungawezga wuli ukali winu para vyaŵa nthena?
Ivyo mukwenera kumanya
Ukali ungaŵika umoyo winu pangozi. Kafukufuku wakulongora kuti para munthu wakuwezga yayi ukali wangalwara matenda gha BP, nthenda ya mtima, kusuzgika maghanoghano, na suzgo la munthumbo. Ukali ungapangiskaso munthu kusoŵa tulo, kufipa mtima chomene, sitiroko na matenda ghanyake. Lekani Baibolo likuti: ‘Taya ukali . . . chifukwa ungakulongozgera ku uheni.’—Salimo 37:8, mazgu ghamusi.
Kusunga ukali kungakupwetekeska. Usange mukuleka kuwezga ukali vingayana na kulwara nthenda yakofya iyo mukuyimanya yayi. Mwachiyelezgero, mungamba mtima wa kughanaghanira viheni ŵanyinu kweniso kususka waka chilichose. Mtima uwu ungapangiska kuti chiŵe chakusuzga kukhala na munyinu ndipo masuzgo ghanganjira munthengwa yinu.
Ivyo mungachita
Wonani viwemi mwa munyinu. Lembani vinthu vitatu ivyo munyinu wakuchita makora. Nyengo yinyake para munyinu wamukwiyiskani, ghanaghanirani vinthu vitatu ivyo mukalemba. Ivi vimovwiraninge kuwezgako ukali.
Fundo ya mu Baibolo: “Longorani kuti muli ŵakuwonga.”—Ŵakolose 3:15.
Muŵe na mtima wakugowoka. Chakwamba, yezgani kuwona vinthu umo munyinu wakuwonera. Ivi vimovwiraninge kuti mulengerenge chitima munyinu. (1 Petrosi 3:8) Pamanyuma, jifumbani kuti, ‘Kasi nakwiya pa vifukwa vyakuti ningagowoka yayi?’
Fundo ya mu Baibolo: “Mbutozi . . . kusulako maubudi.”—Zintharika 19:11.
Yowoyani maghanoghano ghinu mwantchindi. Mwachiyelezgero, mungayowoya kuti, “Mukujitemwa chomene pakuleka kuniyimbira foni na kuniphalira uko muli.” M’malo mwake, mungayowoya kuti, “Nkhufipa mtima para kwafipa ndipo imwe mundize, chifukwa nkhumanya yayi usange muli makora.” Para muyowoyenge maghanoghano ghinu mwakuzikira viwovwirenge kuti muwezgeko ukali.
Fundo ya mu Baibolo: “Ivyo mukuyowoya viŵenge vyakukondweska nyengo zose, vyakulungika na mchere.”—Ŵakolose 4:6.
Tegherezgani mwantchindi. Para mwayowoya mwaghanoghano ghinu, lekani munyinu nayo wayowoye maghanoghano ghake kwambura kumudumulizga. Usange nayo wamalizga kuyowoya, werezganiso ivyo wayowoya kuti muwone usange mwapulikiska. Kutegherezga nkhwakovwira chomene kuti muwezgeko ukali.
Fundo ya mu Baibolo: “Munthu waliyose wapulikenge luŵiro, wazikirenge pakuyowoya.”—Yakobe 1:19.