1. Kasi Chiuta Ndiyo Wakupangiska Masuzgo?

Chifukwa Wuli Ntchakuzirwa Kumanya?

Ŵanthu ŵanandi ŵakuleka kusopa Chiuta chifukwa ŵakughanaghana kuti ndiyo wakupangiska masuzgo.

Fundo Iyo Mukwenera Kughanaghanirapo

Ŵalongozgi ŵanandi ŵakusambizga kuti Chiuta ndiyo wakupangiska masuzgo. Mwachiyelezgero, ŵanyake ŵakuyowoya kuti:

• Masoka gha chilengiwa ntchilango chakufuma kwa Chiuta.

• Ŵana ŵakufwa chifukwa Chiuta wakukhumba kusazgirako ŵangelo kuchanya.

• Chiuta wakunjilirapo pa nkhondo, chinthu icho ŵanthu ŵakusuzgika nacho chomene.

Kweni kasi ivyo ŵalongozgi ŵamatchalitchi ŵakusambizga vingaŵa vyautesi? Wuli usange Chiuta wakukolerana navyo yayi?

Ivyo Baibolo Likuyowoya

Ni Chiuta yayi wakupangiska masuzgo.

Waŵenge kuti ndiyo wakupangiska mphanyi vikupambana chomene na mikhaliro yake iyo yikuzunulika mu Baibolo. Mwachiyelezgero Baibolo likuti:

“Nthowa zake zose mburunji. . . . Iyo ni murunji na wakunyoloka.”—DOTORONOME 32:4.

“Chiuta waunenesko wangachita uheni chara, Wankhongonozose wangachita kwananga chara!”—YOBU 34:10.

“Wankhongonozose wakubendezga urunji chara.”—YOBU 34:12.

Chiuta wakutinkha visopa ivyo vikumuyowoyera mautesi.

Ivi ni visopa vyose ivyo vikusambizga kuti Chiuta ndiyo wakupangiska masuzgo kweniso ivyo vikunjilirapo pa nkhondo na vivulupi.

Baibolo likuti: “Ntchimi zikuchima mautesi mu zina lane. Nindazitumepo panji kuzilangura panji kuyowoya nazo. Ivyo zikuchima kwa imwe ni mboniwoni yautesi . . . na uryarya wa mu mtima wawo.”—YEREMIYA 14:14.

Yesu wakasuska visopa vyaupusikizgi.

Iyo wakati: “Ni waliyose yayi uyo wakuyowoya kwa ine kuti, ‘Fumu, Fumu,’ wazamunjira mu Ufumu wa kuchanya, kweni yekha uyo wakuchita khumbo la Adada awo ŵali kuchanya. Mu zuŵa ilo, ŵanandi ŵazamuyowoya kwa ine kuti, ‘Fumu, Fumu, asi tikachimanga mu zina linu, na kufumiska viŵanda mu zina linu, ndiposo kuchita milimo yankhongono yinandi mu zina linu?’ Penepapo nizamuŵaphalira kuti: ‘Nkhamumanyani chara! Fumaniko kwa ine, imwe mukuchita viheni!’”—MATEYU 7:21-23.