Ivyo Ŵanyake Ŵakugomezga

Ŵahindu

ŵakugomezga kuti munthu wakusuzgika chifukwa cha viheni ivyo wakuchita sono panji ivyo wakachita kumanyuma. Iwo ŵakugomezga kuti para munthu wafwa wakubabikaso kunyake. Ndipo ŵakuti munthu wakuleka kusuzgika para wafika pa moksha, (kung’anamura kuleka kubabikaso). Ndipo ŵakuti pa nyengo iyi wakuŵa kuti wafwatuka ku masuzgo ghose.

Ŵasilamu

ŵakugomezga kuti masuzgo ntchilango ku awo ŵakuchita kwananga kweniso kuyezga awo ŵakusopa usange ŵali na chipulikano. Dr. Sayyid Syeed wakati: “Masuzgo ghakutikumbuska kuti tiwongenge pa ivyo Chiuta wakutichitira kweniso kuti tiwovwirenge awo ŵakusuzgika.”—President of the Islamic Society of North America.

Ŵayuda

ŵakugomezga kuti munthu wakusuzgika chifukwa cha ivyo wakuchita. Ŵayuda ŵanyake ŵakuyowoya kuti kuzamuŵa chiwuka ndipo pamanyuma ŵanthu ŵawemi awo ŵakasuzgikanga, vinthu vizamuŵayendera makora. Mwakuyana na chisambizgo cha Kabala, Ŵayuda ŵakugomezgaso kuti munthu wakuŵa na mwaŵi unandi wakuti wanganozga ivyo wakabudiskanga chifukwa para wafwa mzimu wake ukukababikaso kunyake.

Ŵabuda

ŵakugomezga kuti taŵanthu tikusuzgika ndiposo kufwa na kubabikaso kanandi waka m’paka apo tizamulekera kughanaghana viheni, kuvidokera panji kuvichita. Iwo ŵakugomezga kuti para munthu wamba kuchita viwemi wakufika pa nirvana (panji kuti wakuleka kusanganaso na masuzgo).

Ŵachikonfushani

ŵakugomezga kuti tikusuzgika chifukwa cha “ivyo tikutondeka kuchita makora.” Iwo ŵakugomezgaso kuti nangauli munthu wangayezgayezga kuti wachepeskeko masuzgo, kweni wakutondeka chifukwa chakuti pali “mizimu yinyake yankhongono chomene iyo yikupangiska. Ndipo munthu wakwenera kuzomerezga waka ivyo mizimu yikukhumba.”—A Dictionary of Comparative Religion.

Ŵanyake Ŵakugomezga

kuti ŵafwiti panji vyamasalamusi ndivyo vikupangiska masuzgo. Kuyana na ivyo ŵakugomezga, ŵakuti vyamasalamusi vingapangiska kuti munthu wasangane na mwaŵi panji soka mu chikaya ndipo masuzgo ghangamara pekha para ŵanthu ŵangachitapo kanthu kanyake. Ŵakugomezgaso kuti para munthu walwara wangachira pekha para wangapoka munkhwala ku ng’anga.

Ŵakhristu

ŵakugomezga kuti taŵanthu tikusuzgika chifukwa cha ŵanthu ŵaŵiri ŵakwambilira, nga umo buku la Genizesi likulongosolera. Ndipouli matchalitchi ghanandi ghakusambizga fundo iyi mu nthowa yinyake. Mwachiyelezgero, Ŵakatolika ŵanyake ŵakuti para munthu wakusuzgika ndikuti ni ‘sembe kwa Chiuta.’ Kweniso ŵakugomezga kuti para munthu munyake wakusuzgika ndikuti munyake wakusanga mtende.