Ivyo Mlengi Withu Wakutisambizga Vikutipa Chigomezgo
Chiuta wali kutilayizga kuti sonosono apa wachitenge vinthu vyakukondweska chomene. Iyo wamazgenge masuzgo na kuŵapa ŵanthu umoyo wakukondweska pa charu chapasi. (Salimo 37:11) Chifukwa wuli tingagomezga layizgo ili? Ntchifukwa chakuti “Chiuta wali nga ni munthu yayi, kuti watete utesi.” (Maŵazgo 23:19) Wonani vinthu vinyake viwemi ivyo Mlengi withu wazamuchita.
Chiuta Wazamuparanya Ŵanthu Ŵaheni
“Para muheni wakuphuka nga mbutheka ndipo ŵakwananga wose ŵakutikitira, chilato chake ntchakuti ŵaparanyike muyirayira.”—SALIMO 92:7.
Nga umo tikawonera mu nkhani iyo yajumpha, ŵanthu ŵakulutilira kuchita vinthu viheni. Ivi vikwenera kutizizika yayi, chifukwa Baibolo likayowoyerathu pa 2 Timote 3:1-5 kuti ŵanthu ŵazamuŵa ŵaheni chomene mu “mazuŵa ghaumaliro.” Kasi ni mazuŵa ghaumaliro wa vichi? Ni umaliro wa charu chiheni cha ŵanthu ŵambura kupulikira Chiuta. Sonosono apa Chiuta waparanyenge wose awo ŵakukana kusintha nthowa zawo ziheni. Ŵanthu ŵawemi ŵekha awo ŵakupulikira Chiuta ndiwo ŵazamukhala pa charu chapasi. Baibolo likuti: “Ŵarunji ŵazamuhara charu chapasi, ndipo ŵazamukhala mwenemumo muyirayira.”—Salimo 37:29.
Chiuta Wazamuparanya Satana
“Chiuta, uyo wakupeleka mtende wazamung’anyira pasi Satana.”—ŴAROMA 16:20.
Para ŵanthu ŵaheni wose ŵaparanyika kusazgapo Satana na viŵanda, pa charu chose chapasi pazamuŵa mtende. Mlengi withu wakutilayizga kuti: “Palije na yumoza uyo [wazamumuwofyani].”—Mika 4:4.
Chiuta Wazamumazga Matenda na Nyifwa
“Hema la Chiuta lili na ŵanthu . . . Wazamufyura masozi ghose ku maso ghawo, ndipo nyifwa yizamuŵakoso yayi. Kuzamuŵavya kutengera panji kulira, kutampha nesi vyakuŵinya.”—CHIVUMBUZI 21:3, 4.
Masuzgo na ulwari kuzamuŵavya chifukwa Chiuta wazamuwuskapo viheni vyose ivyo vikuchitika chifukwa cha Satana, Adamu, Eva kweniso ivyo tikubudiska. Ntheura nanga ni “nyifwa yizamuŵakoso yayi.” Ŵanthu awo ŵakutemwa na kupulikira Mlengi wawo ŵazamukhala kwamuyirayira. Kweni kasi ni nkhu uko ŵazamukhala?
Mlengi Withu Wazamuzgora Charu Chapasi Kuŵa Paradiso
“Mapopa na charu chambura maji vizamusekelera, chipalamba chizamukondwa na kuzota nga ni luŵa la safuroni.”—YESAYA 35:1.
Para Chiuta wamazga viheni vyose, charu chapasi chizamuzgoka paradiso. Chizamuŵa na malo ghakutowa gha makuni na minda ndipo muzamuŵa vyakurya vinandi. (Salimo 72:16) Nyanja na milonga vizamuŵa vyakutowa ndipo muzamuŵa vyamoyo vinandi. Nakuti ŵanthu ŵazamukumbukaso yayi kuti charu chapasi chikaŵa cha kunangika. Ŵanthu ŵazamuzenga na kuŵa na nyumba zawo na zawo. Ndipo pazamuŵavya uyo wazamusoŵa nyumba, kuŵa na njara panji ukavu.—Yesaya 65:21, 22.
Chiuta Wazamuwuska Ŵakufwa
“Kuzamuŵa chiwuka.”—MILIMO 24:15.
Kasi mungatemwa kuti muzakaŵawoneso ŵabali ŵinu awo ŵali kufwa? Chiuta Wankhongonozose wazamuŵawuska na kukhala pa charu chapasi cha Paradiso. Muzamuŵamanya, ndipo nawo ŵazamumumanyani. Ghanaghanirani waka umo imwe na iwo muzamukondwera! Chifukwa wuli tili na chigomezgo chose kuti ivi vizamuchitika? Chifukwa Baibolo likuyowoya za ŵanthu ŵalara na ŵana wuwo, awo ŵakawuskika ŵati ŵafwa, ndipo ŵakakumanaso na mbumba zawo. Nakuti Yesu kanandi waka wakawuska ŵakufwa panthazi pa ŵanthu ŵanandi.—Luka 8:49-56; Yohane 11:11-14, 38-44.