Ŵanthu Ŵali Kuleka Kuchindika Ŵanyawo

CHIFUKWA WULI NTCHAKUZIRWA KUCHINDIKA ŴANJI?

Kuchindika ŵanji kukuchepeska kugazgana kweniso kukovwira kuti vinthu vileke kufika paheni chomene para pawuka masuzgo.

Ntharika yinyake ya mu Baibolo yikuti: “Zgoro lakuzika likuwezga ukali, kweni mazgu ghakukalipa ghakwambiska mbembe.” (Zintharika 15:1) Kuyowoya kweniso kuchita vinthu mwambura ntchindi, kukuyana waka na kuthira mafuta pa moto uwo ukugolera, ndipo kanandi umaliro wake ukuŵa uheni.
Yesu wakati: “Mulomo ukuyowoya ivyo vili kuzura mu mtima.” (Mateyu 12:34) Kuyowoya mwambura ntchindi kungavumbura umo ise tiliri nadi pa nkhani ya umo tikuwonera ŵanthu awo tikupambana mtundu, fuko, charu, ŵasambazi panji ŵakavu, ŵakusambira panji ŵambura kusambira.

Kusanda uko kwachitika sonosono apa mu vyaru 28, ŵanthu ŵakujumpha 32,000 iyo ni 65 peresenti ya awo ŵakafumbika, ŵakayowoya kuti pasono nkharo ya ŵanthu yanangika chomene. Ndipo ŵanthu ŵakuchindikana yayi kuluska kumanyuma kose.

IVYO IMWE MUNGACHITA

Muchindikenge ŵanthu wose kwali nkhu sukulu panji ku ntchito, nanga mungaŵa kuti mukukolerana nawo yayi. Penjerezgani vinthu ivyo mungakolerana nawo. Ivi vizamumovwirani kuti muleke kuŵasuska waka pa chilichose panji kuŵeruzga.

“Lekani kweruzga kuti muleke kweruzgika.” —Mateyu 7:1.

Ivyo imwe mungatemwa kuti ŵanji ŵamuchitiraninge ndivyo namwe muŵachitirenge. Usange ndimwe walusungu ndipo mukuchita vinthu makora na ŵanyinu, nawo ŵangamuchitirani mwakuyana waka.

“Ivyo mukukhumba kuti ŵanthu ŵamuchitiraninge, ndivyo namwe muŵachitirenge.”—Luka 6:31.

Mugowokenge. Manyani kuti munthu wangachitira dala yayi kuti wamukhuŵazgani panji kumukwiyiskani. Ntheura para munthu wamuyowoyerani panji kumuchitirani vinthu mwambura lusungu, sulaniko waka.

“Munthu wamahara wakuwezgako ukali wake, ndipo mbutozi kwa iyo kusulako maubudi.” —Zintharika 19:11.

Mu Nyumba ya Ufumu ya Ŵakaboni ŵa Yehova pambere maungano gha mpingo ghandambe. Ŵanthu awo mbakupambana msinkhu kweniso kwakukulira, ŵakutawuzgana na kuchezga mwakukondwa.

IVYO TIKUCHITA

Mu vigaŵa ivyo Ŵakaboni ŵa Yehova ŵakukhala kweniso kugwira ntchito, ŵakulongora ŵanji ntchindi ndipo ŵakovwira ŵanyawo kuti ndimo nawo ŵachitirenge.

Tikusambira Baibolo kwaulere na ŵanthu wose, kweni tikuchichizga ŵanthu yayi kuti ŵenderenge vigomezgo vithu panji maghanoghano ghithu. M’malo mwake, tikulondezga ulongozgi wa mu Baibolo pakuphalirako ŵanji uthenga withu “mwakuzika ndiposo na ntchindi zikuru.”—1 Petrosi 3:15; 2 Timote 2:24.

Tikukana sankho ndipo tikupokelera ŵanthu ŵa mtundu uliwose ku maungano ghithu gha mpingo, awo ŵakukhumba kusambira ivyo Baibolo likusambizga. Tikuzizipizgirana na ‘kuchindika ŵanthu ŵa mtundu uliwose.’—1 Petrosi 2:17.

Tikuchindika ŵamazaza ŵa boma ilo likuwusa. (Ŵaroma 13:1) Tikupulikira malango kweniso tikupeleka misonkho. Nangauli tikunjilirapo yayi pa ndyali, kweni tikuchindika ivyo waliyose wasankha pa nkhani iyi.