Longorani Ntchindi ku Ŵanji

1. Chifukwa wuli ŵanthu ŵakukondwa para ŵakulongoreka ntchindi? (Zintharika 22:1)

KASI mukukondwa para ŵanji ŵakulongora kuti ŵakumuchindikani? Mwambura kukayika mukukondwa. Munthu waliyose wakukhumba kujipulika kuti wakuchindikika. Tikujipulika makora para ŵanji ŵakulongora kuti ŵakutichindika. Lekani Baibolo likuyowoya kuti “ntchiwemi kuchindikika kuluska kuŵa na siliva na golide”!—Ŵazgani Zintharika 22:1.

2-3. Chifukwa wuli ni nyengo zose yayi apo ntchipusu kulongora ntchindi, ndipo tiwonenge vichi mu nkhani iyi?

² Ni nyengo zose yayi apo chingaŵa chipusu kulongora ntchindi ku ŵanji. Chifukwa chimoza ntchakuti kanandi tikuwona ivyo ŵanyithu ŵakubudiska. Kweniso tikukhala mu nyengo izo ŵanthu ŵanandi ŵalije ntchindi. Kweni ise tikwenera kuŵa ŵakupambanako. Chifukwa wuli? Chifukwa Yehova wakukhumba kuti tichindikenge “ŵanthu ŵa mtundu uliwose.”—1 Pet. 2:17.

³ Mu nkhani iyi tiwonenge ng’anamuro la kulongora ntchindi ku ŵanji kweniso umo tingalongolera ntchindi ku (1) ŵamumbumba yithu, (2) ŵasopi ŵanyithu, na (3) ŵanthu awo Mbakaboni yayi. Ndipo chomene, tiwonenge umo tingalongolera ntchindi nanga mphanyengo iyo ntchakusuzga kuchita nthena.

KASI KUCHINDIKA ŴANJI CHIKUNG’ANAMURACHI?

4. Kasi kuchindika ŵanji chikung’anamurachi?

⁴ Kasi mungalilongosora wuli lizgu lakuti ntchindi? Lizgu lakuti “ntchindi,” chomene likung’anamura umo tikuwonera munthu munyake. Panji chifukwa cha mikhaliro yiwemi iyo wali nayo, ivyo wakwaniskapo kuchita, kweniso udindo uwo wali nawo, tingamba kumuchindika na kumuwona kuti ngwakuzirwa. Kweniso lizgu ili likung’anamura umo tikuchitira vinthu na munthu munyake. Ntheura kuti tilongore kuti tikuchindika ŵanji, tikwenera kuchita nawo vinthu munthowa yakuti ŵajipulikenge kuti mbakuzirwa, mbapadera, kweniso ŵakuwongeka chomene. Kweni ntchindi zithu zikwenera kufumira mu mtima.—Mat. 15:8.

5. Kasi ntchivichi chingatovwira kuti tichindikenge ŵanji?

⁵ Yehova wakukhumba kuti tichindikenge ŵanji. Mwachiyelezgero, wakutiphalira kuti tichindikenge “ŵamazaza ŵalara.” (Rom. 13:1, 7) Kweni ŵanyake ŵangayowoya kuti, “Kwa ine ni suzgo yayi kuchindika ŵanthu, chikuru nawo ŵakuchita vyakwenelera.” Kasi kaghanaghaniro aka nkhakwenelera? Ise taŵateŵeti ŵa Yehova tikumanya kuti tikuchindika ŵanthu chifukwa cha ivyo ŵakuchita yayi. Kweni chomene tikuŵachindika chifukwa chakuti tikutemwa Yehova kweniso tikukhumba kumukondweska.—Josh. 4:14; 1 Pet. 3:15.

6. Kasi ntchamachitiko kuchindika munthu uyo wakutichindika yayi? Longosorani. (Wonaniso chithuzi.)

⁶ Ŵanyake ŵangafumba kuti, ‘Kasi vingachitika nadi kuchindika munthu uyo wakutichindika yayi?’ Enya. Wonani viyelezgero vichoko waka ivi. Themba Sauli likamuyuyura mwana wake Yonatani pamaso pa ŵanthu. (1 Sam. 20:30-34) Ndipouli, Yonatani wakalutilira kuŵachindika adada ŵake na kulwera nawo lumoza nkhondo m’paka apo ŵakafwira. (Eks. 20:12; 2 Sam. 1:23) Wasembe Mukuru Eli wakanena Hana kuti waloŵera. (1 Sam. 1:12-14) Ndipouli, Hana wakayowoya nayo mwantchindi Eli, nangauli waliyose mu Israyeli wakamanyanga kuti Eli wakaŵasuskanga yayi ŵana ŵake awo ŵakachitanga vinthu viheni, chinthu icho wakeneranga kuchita pakuŵa dada wawo kweniso wasembe mukuru. (1 Sam. 1:15-18; 2:22-24) Ndipo ŵanthu ŵa mu Ateni ŵakamunyozanga Paulosi, pakumuchema kuti “muŵeleŵesi.” (Mil. 17:18) Nangauli vikaŵa nthena, Paulosi wakayowoya nawo mwantchindi. (Mil. 17:22) Viyelezgero ivi vikulongora kuti kutemwa Yehova kweniso kopa kumukwiyiska, ndivyo vikwenera kutichiska kuti tichindikenge ŵanji nanga chingaŵa chakusuzga. Tiyeni sono tidumbiskane awo tikwenera kuŵachindika kweniso chifukwa chake.

LONGORANI NTCHINDI KU ŴAMUMBUMBA YINU

7. Kasi ntchivichi chingapangiska kuti chitiŵire chakusuzga kuchindika ŵamumbumba yithu?

⁷ Suzgo. Kanandi tikuŵa lumoza na ŵamumbumba yithu. Ntheura tikumanya ivyo ŵakuchita makora na ivyo ŵakutondeka kuchita makora. Ŵanyake ŵangaŵa kuti ŵakulwara nthenda iyo yingapangiska kuti chiŵe chakusuzga kuŵapwelelera panji ŵangaŵa kuti ŵakusuzgika chomene maghanoghano. Ŵanyake mu mbumba ŵangatiyowoyera panji kutichitira vinthu ivyo vingatikhuŵazga. M’malo mwakuti panyumba ghaŵe malo ghawemi ghakupumulirako na ghamtende, ŵanyake ŵakwambiska mphindano mwa kuleka kuŵachindika ŵanyawo ŵamumbumba. Ndipo vyakufumapo vyake, mu mbumba mukuŵavya kukolerana. Nga umo nthenda ya nyamakazi yikupangiskira kuti thupi lileke kugwira ntchito mwakukolerana, para ŵanthu mu mbumba ŵakuchindikana yayi, vingapangiska kuti mbumba yitondeke kuchitira lumoza vinthu mwakukolerana. Mwakupambana na nthenda ya nyamakazi iyo tingayimazga yayi patekha, ntchamachitiko kuti ŵanthu mu mbumba ŵasambire kuŵa ŵantchindi na kwamba kuchindikana yumoza na munyake.

8. Chifukwa wuli ntchakuzirwa kulongora ntchindi ku ŵamumbumba yithu? (1 Timote 5:4, 8)

⁸ Chifukwa wuli tikwenera kulongora ntchindi? (Ŵazgani 1 Timote 5:4, 8.) Mu kalata yakwamba iyo wakalembera Timote, Paulosi wakalongosora umo ŵanthu mu mbumba ŵangachitira kuti ŵapwelelerane. Wakalongosora kuti chifukwa chikuru icho tikulongolera ntchindi ku ŵamumbumba yithu ntchakuti ndimo tikwenera waka kuchitira yayi, kweni tikukhumba “kusopa Chiuta mwakujipeleka.” Ichi chikung’anamura kuti tikuchita nthena chifukwa chakuti tikumutemwa Yehova kweniso ntchigaŵa cha kusopa kwithu. Yehova ndiyo wali kwambiska ndondomeko ya mbumba. (Efe. 3:14, 15) Ntheura para tikuchindika ŵamumbumba yithu, tikuchindikaso Yehova uyo wakambiska mbumba. Lekani ntchakuzirwa chomene kuti tilongorenge ntchindi ku ŵamumbumba yithu.

9. Kasi mfumu na muwoli ŵangalongorana wuli ntchindi? (Wonaniso vithuzi.)

⁹ Umo mungalongolera ntchindi. Mfumu uyo wakumuchindika muwoli wake wakulongora kuti muwoli wake ngwakuzirwa chomene kwa iyo, pa mzinda kweniso nanga kungaŵa kwaŵekha. (Zinth. 31:28; 1 Pet. 3:7) Wakumutimba yayi, wakumuyuyura yayi, panji kumupangiska kuti wajiwonenge wawakawaka. Ariel,a uyo wakukhala ku Argentina, wakuti: “Chifukwa chakuti muwoli wane ni mulwari, nyengo zinyake wakuyowoya vinthu ivyo vikunikhuŵazga. Para ivi vyachitika nkhujikumbuska kuti ivyo wakuyowoya panyengo iyo ndivyo wakung’anamura nadi yayi. Panyengo zanthena izi, nkhukumbuka lemba la 1 Ŵakorinte 13:5, ilo likunovwira kuti niyowoyenge nayo mwantchindi na kuleka kumukalipira.” (Zinth. 19:11) Muwoli wakumuchindika mfumu wake para wakuyowoya viwemi vya iyo ku ŵanji. (Efe. 5:33) Iyo wakugega kumunyoza, kumuyowoyera milangwe yakumunena, panji kumuchema mazina ghakulengeska; chifukwa wakumanya kuti kuchita nthena kungananga nthengwa yake. (Zinth. 14:1) Mudumbu munyake wa ku Italy uyo mfumu wake wakusuzgika na nthenda yakusuzgika maghanoghano wakuti: “Nyengo zinyake nkhuwona nga mfumu wane wakutalulira para wakwenjerwa na vinthu vinyake. Kumasinda uku, mazgu ghane kweniso umo nkhachitiranga kumaso vikalongoranga kuti nkhamuchindikanga yayi mfumu wane. Kweni icho chikanovwira chomene nkhuchezga na ŵabwezi ŵane awo ŵakayowoyanga mwantchindi para ŵakuyowoya vya ŵanji, ndipo ivi vikanovwira kuti nimuchindikenge chomene mfumu wane.”

10. Kasi ŵana ŵangalongora wuli kuti ŵakuŵachindika ŵapapi ŵawo?

¹⁰ Mwaŵawukirano, pulikirani malango agho ŵapapi ŵinu ŵali kumuŵikirani mu mbumba yinu. (Efe. 6:1-3) Muyowoyenge mwantchindi na ŵapapi ŵinu. (Eks. 21:17) Apo ŵakuchekura, ŵapapi ŵinu ŵakhumbenge chomene wovwiri winu. Chitani vyose ivyo mungafiska kuti muŵapwelelere. Ghanaghanirani chiyelezgero cha María, uyo adada ŵake Mbakaboni ŵa Yehova yayi. Adada ŵake ŵati ŵalwara, ŵakachitanga vinthu ivyo vikapangiskanga kuti chiŵe chakusuzga kuŵapwelelera. Iyo wakuti: “Nkhalomba kuti Yehova wanovwire kuŵa wantchindi kwa adada ŵane kweniso kuti nilongorenge kuti nkhuŵachindika nadi. Nkhamanya kuti usange Yehova wakunituma kuti niŵachindikenge ŵapapi ŵane, mbwenu wanganipaso nkhongono zakuchitira nthena. Mukuluta kwa nyengo, nkhawamo kuti adada ŵakwenera kusintha dankha nkharo yawo yayi kuti ine niŵalongore ntchindi.” Para tikulongora ntchindi ŵamumbumba yithu nanga ni apo ntchakusuzga kuchita nthena, tikulongora kuti tikuchindika ndondomeko ya Yehova.

LONGORANI NTCHINDI KU ŴASOPI ŴANYINU

11. Chifukwa wuli chingaŵa chakusuzga kulongora ntchindi ku ŵasopi ŵanyithu?

¹¹ Suzgo. Ŵasopi ŵanyithu ŵakulondezga fundo za mu Baibolo; kweni nyengo zinyake ŵangatichitira vinthu mwambura lusungu, kuteruzga mwambura urunji, panji kutikwenyerezga. Para musopi munyithu watipangiska kuŵa na “chifukwa chakudandawulira,” vingatisuzga kuti tilutilire kumulongora ntchindi. (Kol. 3:13) Kasi ntchivichi chingatovwira kuti tilutilire kumulongora ntchindi?

12. Chifukwa wuli ntchakuzirwa kuŵalongora ntchindi ŵasopi ŵanyithu? (2 Petrosi 2:9-12)

¹² Chifukwa wuli tikwenera kulongora ntchindi? (Ŵazgani 2 Petrosi 2:9-12.) Mu kalata yake yachiŵiri, Petrosi wakati ŵanyake mu mpingo wa Ŵakhristu ŵakwambilira, ŵakayowoyanga mwambura ntchindi vyakukhwaskana na “awo Chiuta waŵachindika,” awo mbalara Ŵachikhristu. Kasi ŵangelo ŵakugomezgeka awo ŵakawona ivi vikuchitika ŵakachita wuli? Ŵakayowoyapo lizgu liheni lililose yayi ku ŵanthu aŵa. Chifukwa wuli ŵakachita nthena? ‘Chifukwa chakuti ŵakuchindika Yehova.’ Ŵangelo ŵakufikapo aŵa ŵakakana kuyowoya mwaukali ku ŵanthu ŵakujikuzga aŵa. M’malo mwake, ŵakalekera Yehova kuti ndiyo weruzge na kuŵachenya. (Rom. 14:10-12; yaniskani na Yuda 9.) Tingasambirako ku ŵangelo aŵa. Ŵangelo ŵakaŵayuyura yayi ŵanthu aŵa, ntheura nase tili na chifukwa chakukwana cha kulekera kuyuyura ŵabali na ŵadumbu ŵithu awo ŵakumutemwa Yehova. Tikwenera ‘kuŵa pakwamba ndise’ kuŵachindika. (Rom. 12:10) Para tichitenge nthena tilongorenge kuti tikuchindika Yehova.

13-14. Kasi tingalongora wuli kuti tikuŵachindika awo tikuwungana nawo? Yowoyani viyelezgero. (Wonaniso vithuzi.)

¹³ Umo mungalongolera ntchindi. Ŵalara, para mukusambizga ŵanji, nyengo zose yezgayezgani kuti muchitenge vinthu mwachitemwa. (Filim. 8, 9) Usange mukukhumba kumupa munyake ulongozgi, chitani mwalusungu, kweniso mupani ulongozgi pa nyengo iyo mundakwiye. Ŵadumbu namwe mungawovwirapo kuti mu mpingo ŵanthu ŵalutilire kuchindikana para mukugega kusesa panji kuyowoyera utesi ŵanyinu. (Tito 2:3-5) Tose tingalongora kuti tikuŵachindika ŵalara ŵa mpingo para tikukolerana nawo kweniso kuŵawonga pa milimo iyo ŵakuchita nga nkhuchitiska maungano, kudangilira pa ntchito yakupharazga, na kovwira awo ‘ŵapuluka kwambura kumanya.’—Gal. 6:1; 1 Tim. 5:17.

¹⁴ Mudumbu munyake zina lake Rocío wakayowoya kuti nyengo yinyake chikamuŵira chakusuzga kuchindika mubali uyo wakamupa ulongozgi. Iyo wakuti: “Nkhawonanga kuti wakayowoyanga nane mwambura lusungu. Apo nkhaŵa kunyumba, nkhayowoyanga viheni vya iyo. Nangauli nkhayezgeskanga kuleka kuwoneskera pakweru umo nkhujipulikira, kweni mu mtima nkhakayikiranga usange wakukhumba kunovwira nadi ndipo nkhapulikira yayi ulongozgi wake.” Kasi ntchivichi chikamovwira Rocío? Iyo wakuti: “Pa ndondomeko yane yakuŵazga Baibolo, nkhaŵazga lemba la 1 Ŵatesalonika 5:12, 13. Nkhati nawamo kuti nkhamuchindikanga yayi mubali uyu, njuŵi yane yikamba kunisuzga. Nkhalomba kwa Yehova kweniso nkhapenjerezga mu mabuku ghithu nkhani zakudunjika izo zinganovwira kusintha wunthu wane. Pamanyuma nkhawamo kuti suzgo wakaŵa mubali uyu yayi, kweni ine chifukwa cha kujikuzga. Pasono namanya kuti nkhwenera kuŵa wakujiyuyura kuti nichindike ŵanji. Nichali kugwilirapo ntchito kuti nichindikenge chomene ŵanji, ndipo nkhuwona kuti Yehova wakukondwa nane pa ivyo nkhuyezgayezga kuchita.”

LONGORANI NTCHINDI KU ŴANTHU AWO MBAKABONI YAYI

15. Chifukwa wuli vingatisuzga kuchindika ŵanthu awo Mbakaboni yayi?

¹⁵ Suzgo. Kanandi mu uteŵeti tikusangana na ŵanthu awo ŵakuwoneka kuti ŵakuwutemwa yayi unenesko wa mu Baibolo. (Efe. 4:18) Ŵanyake ŵakukana kutegherezga uthenga withu chifukwa cha umo ŵali kukulira. Nyengo zinyake awo tikugwira nawo ntchito panji kusambira nawo sukulu mbakusuzga pakuchita nawo vinthu, panjiso mabwana ghithu panji ŵasambizgi ŵithu nawoso mbakusuzga. Para nyengo yajumphapo, tingaleka kuŵachindika ŵanthu ŵanthena kweniso kuchita nawo vinthu nga umo tikachitiranga pakwamba.

16. Chifukwa wuli ntchakuzirwa kulongora kuti tikuŵachindika ŵanthu awo ŵakuteŵetera Yehova yayi? (1 Petrosi 2:12; 3:15)

¹⁶ Chifukwa wuli tikwenera kulongora ntchindi? Kumbukani kuti Yehova wakuŵikako mahara pa umo tikuchitira na ŵanthu awo ŵakumuteŵetera yayi. Mpositole Petrosi wakakumbuska Ŵakhristu kuti nkharo yawo yiwemi yingachiska ŵanthu ŵanyake kuti “ŵapeleke uchindami kwa Chiuta.” Ntheura, wakaŵaphalira kuti ŵavikilirenge chipulikano chawo “mwakuzika ndiposo na ntchindi zikuru.” (Ŵazgani 1 Petrosi 2:12; 3:15.) Kwali ŵali panthazi pa khoti chifukwa cha chipulikano chawo panji ŵakudumbiskana na ŵazengezgani ŵawo, Ŵakhristu ŵakeneranga kuchita vinthu nga ni para ŵali panthazi pa Chiuta. Nakuti Yehova wakuwona na kutegherezga ivyo tikuyowoya na umo tikuyowoyera. Ichi ntchifukwa chakukwana chakuchitira vinthu mwantchindi na ŵanthu awo Mbakaboni yayi.

17. Kasi tingalongora wuli ntchindi ku ŵanthu awo Mbakaboni yayi?

¹⁷ Umo tingalongolera ntchindi. Para tili mu uteŵeti, tikwenera yayi kuchita vinthu nga kuti tikuŵayuyura ŵanthu awo ŵakumanya vichoko chomene vya mu Baibolo panji kuŵawona kuti palije icho ŵakumanyapo. M’malo mwake, tikwenera kuŵawona kuti mbakuzirwa kwa Chiuta kweniso kuti ŵakutiluska pa vinyake. (Hag. 2:7; Fil. 2:3) Usange munthu munyake wamunenani chifukwa cha vigomezgo vinu, gegani kuwezgera nga nkhumuyowoyeraso mazgu ghamsinjiro. (1 Pet. 2:23) Para mwayowoya chinthu chinyake icho pamanyuma mungadandawura nacho, phepiskani mwaluŵiro. Kasi mungalongora wuli ntchindi ku awo mukugwira nawo ntchito? Mulimbikirenge ntchito ndipo yezgani kuwonamo viwemi mu awo mukugwira nawo kweniso abwana ŵinu. (Tito 2:9, 10) Usange ndimwe ŵanenesko, kweniso ŵakulimbikira pa ntchito, mukondweskenge Chiuta nanga vingaŵa kuti ŵanthu ŵanyake ŵakukondwa namwe yayi.—Kol. 3:22, 23.

18. Chifukwa wuli ntchakuzirwa kusambira kuŵa na ntchindi kweniso kuchindika ŵanji?

¹⁸ Tili na vifukwa viwemi vyakuŵira ŵantchindi kweniso kuchindikira ŵanji. Tawona kuti para tikulongora ntchindi ŵamumbumba yithu, tikuchindika Mutu withu mukuru, Yehova. Mwakuyana waka, para tikuchindika ŵabali na ŵadumbu ŵithu, tikuchindikaso Adada ŵithu ŵakuchanya. Ndipo para tikulongora ntchindi ŵanthu awo ŵakusopa Yehova yayi, tikovwira kuti chiŵe chipusu ku ŵanthu aŵa kupeleka uchindami, panji kumuchindika Chiuta withu mukuru. Nanga vingaŵa kuti ŵanthu ŵanyake ŵakutichindika yayi, kweni nyengo zose ntchakuzirwa kuŵalongora ntchindi ŵanthu aŵa. Chifukwa wuli? Chifukwa Yehova watitumbikenge. Iyo wakulayizga kuti: “Awo ŵakunichindika niŵachindikenge.”—1 Sam. 2:30.