Munda Wakutowa

WONA umo caru cikuwonekera! Cilicose nchakutowa! Wona utheka na makuni, maluŵa na nyama. Kasi ungalongora zovu na nkharamu?

Kasi munda wakutowa uwu ukaŵako wuli? Tiye tiwone umo Ciuta wakanozgera caru kuti ise tikhalemo.

Cakwamba, Ciuta wakalenga utheka kuti umere pa caru. Ndipo wakalenga mitundu yose ya vyakumera vicokovicoko na vivwati na makuni. Vyakumera ivi vikupangiska caru kuŵa cakutowa. Kweni vikucita vinandi kuluska apa. Vinandi mwa vinthu ivi vikutipa vyakurya ivyo vikunowa comene.

Pamanyuma pake Ciuta wakalenga somba kuti ziskambenge mu maji na viyuni kuti vidukenge mu mlengalenga. Wakalenga ncheŵe, ŵacona na mahaci; nyama zikuluzikuru na zicokozicoko. Kasi ni nyama wuli izo zikukhala pafupi na nyumba yakwako? Kasi tikwenera kukondwa yayi kuti Ciuta wakalenga vinthu vyose ivi cifukwa ca ise?

Paumaliro, Ciuta wakapanga cigaŵa cinyake kuŵa malo ghapadera comene. Wakathya malo agha munda wa Edeni. Ukaŵa uwemi comene. Cilicose cikaŵa cakutowa. Ndipo Ciuta wakakhumbanga kuti caru cose ciŵe cakutowa nga ni munda uwo wakapanga.

Kweni laŵiskaso cithuzithuzi ca munda uwu. Kasi ukumanya ico Ciuta wakawona kuti mukaŵavya? Tiye tiwone.