Chiuta Wakalenga Kuchanya na Charu Chapasi

Yehova Chiuta ndiyo wali kutilenga. Ndiyo wali kupanga vinthu vyose. Wali kupanga vinthu ivyo tikuviwona na ivyo tikuleka kuviwona. Pambere wandapange ivyo tikuviwona, wakapanga ŵangelo ŵanandi chomene. Kasi ŵangelo ukuŵamanya? Yehova ndiyo wakapanga ŵangelo. Ŵangelo ŵakuyana na iyo. Pakuti Chiuta tingamuwona yayi, ŵangelo nawo tingaŵawona yayi. Mungelo wakwamba uyo Yehova wakapanga, wakamba kumovwira kupanga vinthu vinyake. Mungelo wakwamba uyu wakawovwira Yehova kupanga nyenyezi, mapulaneti, na vinthu vinyake. Pulaneti linyake ndilo tikukhalamo. Pulaneti ili likuchemeka charu chapasi. Charu ichi ntchakutowa chomene.

Yehova wakanozga charu kuti mukhalenge vinyama na ŵanthu. Wakapanga zuŵa kuti liŵalenge pa charu chapasi. Wakapanga mapiri, nyanja, na madambo.

Kasi Yehova wakati wachitengeso vichi? Yehova wakati: ‘Nipangenge utheka, vyakumera, na makuni.’ Pa charu pakayamba kumera vipasi vyakupambanapambana, mphangwe, na maluŵa. Yehova wakapanga vinyama vyakupambanapambana. Vinyama vinyake vikuduka muchanya, vinyake vikukhala mu maji, ndipo vinyake vikukhwaŵa pasi. Wakapanga tunyama tuchokotuchoko nga ni kalulu, na vinyama vikuruvikuru nga ni zovu. Kasi iwe ukutemwa nyama wuli?

Kufuma apo, Yehova wakaphalira mungelo wakwamba kuti: “Tipange munthu.” Ŵanthu wakaŵapanga kuti ŵapambanenge na vinyama. Wakaŵapa mahara kuti ŵapangenge vinthu vinyake. Kweniso wakaŵapanga kuti ŵayowoyenge, kuseka, na kuseŵera. Wakakhumbanga kuti ŵanthu ŵapwelelerenge charu na vinyama. Kasi ukumumanya munthu wakwamba uyo Chiuta wakapanga? Tiye tiwone.