Umoyo wa Masuzgo Ukamba

KUWARO kwa munda wa Edeni, Adamu na Heva ŵakaŵa na masuzgo ghanandi. Ŵakenelanga kugwira nchito mwankhongono kuti ŵasange cakurya. Mu malo mwa makuni ghakutowa ghakupambika vipasi, minga na nthura ndivyo vikayamba kumera posepose. Ici ndico cikacitika apo Adamu na Heva ŵakakana kupulikira Ciuta na kuleka kuŵa mabwezi Ghake.

Kweni ciheni comene kuluska apa cikaŵa cakuti Adamu na Heva ŵakayamba kufwa. Kumbukira kuti Ciuta wakaŵacenjezga kuti ŵafwenge para ŵangarya cipasi ca khuni linyake. Pa zuŵa leneilo ŵakalyera ŵakayamba kufwa. Mwee, nawo mbucindere uwo ŵakacita mwakuleka kupulikira Ciuta!

Ŵana wose ŵa Adamu na Heva ŵakababika pamanyuma pakuti Ciuta wawuskamo ŵapapi ŵawo mu munda wa Edeni. Ici cikung’anamura kuti ŵana nawo ŵakeneranga kucekura na kufwa.

Usange Adamu na Heva ŵapulikirenge Yehova, umoyo wawo na wa ŵana ŵawo ukatenge uŵenge wacimwemwe. Ŵakatenge ŵakhalenge kwamuyirayira ndiposo mwacimwemwe pa caru. Palije uyo wakatenge wacekurenge, kulwara na kufwa.

Ciuta wakukhumba kuti ŵanthu ŵakhalenge kwamuyirayira ndiposo mwakukondwa, ndipo wakulayizga kuti zuŵa linyake ndimo ŵazamukhalira. Caru cose cizamuŵa cakutowa pera cara, kweniso ŵanthu wose ŵazamuŵa na umoyo uwemi wambura kulwara. Ndipo waliyose pa caru wazamuŵa bwezi liwemi la munthu waliyose ndiposo na Ciuta.

Kweni Heva wakaŵaso bwezi la Ciuta cara. Mwantheura apo wakababanga ŵana, cikaŵa cipusu yayi kwa iyo. Wakapulikanga vyakuŵinya. Kuleka kupulikira Yehova kukiziska citima cikuru kwa iyo, kasi ukuzomerezga yayi?

Adamu na Heva ŵakaŵa na ŵana ŵanalume na ŵana ŵanakazi ŵanandi. Peneapo mwana wawo mwanalume wakwamba wakababika, ŵakamuthya Kayini. Waciŵiri ŵakamuthya Abelu. Nchivici cikacitika kwa iwo? Kasi ukumanya?