Yakobe Wakaŵa na Mbumba Yikuru

WONA mbumba yikuru iyi. Aŵa ni ŵana 12 ŵa Yakobe. Wakaŵaso na ŵana ŵanakazi. Kasi ukughamanya mazina gha ŵana aŵa? Tiye tisambire ghanyake mwa mazina ghawo.

Leya wakababa Rubeni, Simiyoni, Levi na Yuda. Rakelo wakati wawona kuti wakubaba cara, wakaŵa na citima cikuru. Antheura wakapeleka Biliha, muteŵeti wake, kwa Yakobe, ndipo Biliha wakababa ŵana ŵaŵiri, Dani na Nafutali. Leya nayo wakapeleka Zipa muteŵeti wake kwa Yakobe, ndipo Zipa wakababa Gadi na Aseri. Paumaliro pake Leya wakababaso ŵana ŵaŵiri, Isakara na Zebuloni.

Mukuluta kwa nyengo Rakelo wakababa mwana. Wakamuthya Yosefe. Kunthazi uku tisambirenge vinandi vyakukhwaskana na Yosefe, cifukwa wakaŵa munthu wakuzirwa comene. Aŵa ndiwo ŵana ŵanalume 11 awo Yakobe wakababa apo wakakhalanga na Labani wiske wa Rakelo.

Yakobe wakaŵaso na ŵana ŵanakazi, kweni Baibolo likutiphalira zina la mwana yumoza pera. Zina lake likaŵa Dina.

Nyengo yikakwana yakuti Yakobe wamuleke Labani na kuwelera ku Kenani. Wakawunganya mbumba yake, mberere na ng’ombe, na kuyamba ulendo utali.

Pakati pajumpha nyengo yicoko waka Yakobe na mbumba yake ŵakati ŵawelera ku Kenani, Rakelo wakababa mwana munyake. Ici cikacitika mukati mu ulendo. Rakelo wakasuzgika comene, ndipo wakafwa wakati wababa mwana. Kweni mwana uyo wakababa wakaŵa makora. Yakobe wakamuthya Benjamini.

Tikwenera kukumbukanga mazina gha ŵana 12 ŵa Yakobe cifukwa mtundu wose wa Israyeli ukafumira mwa iwo. Ndipo mazina gha mafuko 12 gha Israyeli ghakafuma ku ŵana 10 ŵa Yakobe na ŵana ŵaŵiri ŵa Yosefe. Yisake wakakhala vilimika vinandi pamanyuma pa kubabika kwa ŵana aŵa, ndipo wakwenera kuti wakakondwa comene kuŵa na ŵazukuru ŵanandi. Kweni tiye tiwone ico cikacitikira muzukuru wake mwanakazi Dina.