Dina Wakanjira mu Suzgo

KASI waŵawona ŵanthu awo Dina wakuluta kukaŵacezgera? Wakuluta kukacezga na ŵasungwana ŵanyake ŵa mu caru ca Kenani. Kasi ŵadada ŵake, a Yakobe, ŵakondwenge na ici? Kuti tizgore fumbo ili, kumbuka umo Abrahamu na Yisake ŵakawonelanga ŵanakazi ŵa mu Kenani.

Kasi Abrahamu wakakhumba kuti mwana wake Yisake watore mwanakazi mu Kenani? Yayi, napacoko pose. Kasi Yisake na Rabeka ŵakakhumba kuti mwana wawo Yakobe watore mwanakazi wa mu Kenani? Yayi, ŵakakhumba cara. Kasi ukumanya cifukwa cake?

Cikaŵa cifukwa cakuti ŵanthu ŵa mu Kenani ŵakasopanga ŵaciuta ŵautesi. Ŵakaŵa ŵanthu ŵawemi yayi ŵakuti munthu wangatora panji kutengwako, ndiposo ŵakaŵa ŵanthu ŵawemi yayi kukolana nawo ubwezi. Ntheura tingasimikizga kuti Yakobe wakatenge wakondwenge yayi kuti mwana wake wakolane ubwezi na ŵasungwana ŵa mu Kenani.

Dina wakanjira nadi mu suzgo. Kasi wamuwona mwanalume uyo wakulaŵiska Dina pa cithuzithuzi apa? Zina lake ni Shekemu. Zuŵa linyake apo Dina wakaluta kukacezga, Shekemu wakamutora na kumucicizga kuti wagone naye. Ici cikaŵa cinthu ciheni, cifukwa ŵanalume na ŵanakazi awo ŵatorana ndiwo ŵekha ŵakwenera kugona pamoza. Cinthu ciheni ico Shekemu wakacita kwa Dina cikayambiska masuzgo ghanandi.

Ŵadumbu ŵa Dina ŵakati ŵapulika, ŵakakwiya comene. Simiyoni na Levi, ŵakakalipa comene mwakuti ŵakatora malupanga na kunjira mu msumba ndipo ŵakaŵasanga ŵanalume ŵa mu msumba mwamabuci. Iwo na ŵabali ŵawo ŵakakoma Shekemu na ŵanalume ŵanyake wose. Yakobe wakakwiya cifukwa ca cinthu ciheni ico ŵana ŵake ŵakacita.

Kasi masuzgo ghose agha ghakayamba wuli? Ghakayamba cifukwa cakuti Dina wakakolana ubwezi na ŵanthu awo ŵakapulikilanga cara malango gha Ciuta. Ise tingatemwa cara kukolana ubwezi na ŵanthu ŵantheura aŵa, asi nthena?