Mozesi na Aroni Ŵakawonana na Faro

MOZESI wakati wafika ku Egupto, wakaphalira mukuru wake Aroni vyose vyakukhwaskana na minthondwe. Apo Mozesi na Aroni ŵakalongora Ŵaisrayeli minthondwe iyi, ŵanthu wose ŵakagomezga kuti Yehova wakaŵa nawo.

Mozesi na Aroni ŵakaluta kukawonana na Faro. Ŵakamuphalira kuti: ‘Yehova Ciuta wa Israyeli wakuti, “Zomelezga ŵanthu ŵane kuti ŵalute mu mapopa kuti ŵakanisope mazuŵa ghatatu.” ‘Kweni Faro wakazgora kuti: ‘Nkhumumanya yayi Yehova. Nizomerezgenge cara kuti Ŵaisrayeli ŵalute.’

Faro wakakwiya cifukwa ŵanthu ŵakakhumbanga kulekezga milimo yawo kuti ŵakasope Yehova. Antheura wakasazgirako milimo yawo kuluska pakwamba. Ŵaisrayeli ŵakakwiyira Mozesi cifukwa ca nkhaza izo Ŵaegupto ŵakaŵacitilanga, ndipo Mozesi citima cikamukora comene. Kweni Yehova wakamuphalira kuti waleke kufipa mtima. Yehova wakati: ‘Nipangiskenge Faro kuti wazomerezge ŵanthu kuluta.’

Mozesi na Aroni ŵakalutaso kukawonana na Faro. Pa nyengo iyi ŵakacita munthondwe. Aroni wakaponya pasi ndodo yake, ndipo yikazgoka njoka yikuru. Ŵanalume ŵamahara ŵa Faro nawo ŵakaponya pasi ndodo zawo, ndipo zikazgoka njoka. Kweni, wonani! Njoka ya Aroni yikurya njoka za ŵanalume ŵamahara. Faro wakakana nipera kuzomerezga Ŵaisrayeli kuti ŵalute.

Ntheura nyengo yikakwana yakuti Yehova wamupe sambiro Faro. Kasi ukumanya umo wakacitira? Wakatuma vilengo 10, panji masuzgo ghakuru, pa Egupto.

Pamanyuma pa vilengo vinandi, Faro wakacema Mozesi, ndipo wakati: ‘Lekeska cilengo, ndipo niŵalekenge Ŵaisrayeli kuti ŵalute.’ Kweni para cilengo caleka, Faro wakasinthanga maghanoghano ghake. Wakakananga kuzomerezga ŵanthu kuti ŵalute. Kweni, paumaliro pake, pamanyuma pa cilengo ca nambara 10, Faro wakazomerezga Ŵaisrayeli kuluta.

Kasi ukuvimanya vilengo 10 ivi? Jula peji lakulondezgapo ndipo tiye tivisambire.