Fumu Yiwemi Yaumaliro ya Israyeli

YOSIYA wakaŵa na vilimika 8 pera apo wakamba kuwusa mafuko ghaŵiri gha kumwera gha Israyeli. Uwu ni msinkhu ucoko comene kuti munthu waŵe fumu. Ntheura pakwamba ŵanthu ŵanyake ŵalara ŵakamovwira kuwusa caru.

Yosiya wakati waŵa fumu kwa vilimika seveni, wakamba kupenja Yehova. Wakalondezga ciyelezgero ca mafumu ghawemi nga ni Davide, Yehoshafati na Hezekiya. Apo wakaŵa wacali mucoko, Yosiya wakacita cinthu cinyake na cikanga.

Kwa nyengo yitali Ŵaisrayeli ŵakaŵa ŵanthu ŵaheni comene. Ŵakasopanga ŵaciuta ŵautesi. Ŵakasindamilanga vikozgo. Antheura Yosiya wakaluta na ŵanalume ŵake na kuyamba kuwuskamo kusopa kwautesi mu caru. Iyi yikaŵa nchito yikuru comene cifukwa ŵanthu ŵanandi ŵakasopanga ŵaciuta ŵautesi. Wona Yosiya na ŵanalume ŵake ŵakudumura vikozgo pa cithuzithuzi apa.

Pamanyuma pake, Yosiya wakasora ŵanalume ŵatatu kulaŵilira mulimo wa kunozga tempele la Yehova. Ndarama zikasonkheka ndipo zikapelekeka ku ŵanalume aŵa kuti ŵalipilire nchito iyo yikeneranga kucitika. Peneapo ŵakanozganga tempele, Hilikiya, musofi mukuru, wakasanga cinthu cinyake cakuzirwa comene mu tempele. Wakasanga buku la malango ilo Yehova wakatuma Mozesi kulemba vilimika vinandi kumanyuma. Likazgeŵa kwa vilimika vinandi.

Buku ili likatolekera kwa Yosiya, ndipo wakapempha kuti liŵazgike pamaso pake. Peneapo wakategherezganga, Yosiya wakawona kuti ŵanthu ŵakatondeka kusunga dango la Yehova. Wakacita citima comene na ici, mwantheura wakapalura vyakuvwara vyake, nga ni umo ukuwonera apa. Iye wakati: ‘Yehova watikwiyira comene cifukwa ŵadada ŵithu ŵakasunga yayi malango agho ghali kulembeka mu buku ili.’

Yosiya wakatuma Hilikiya, musofi mukuru, kuti wafumbe ico Yehova wakati wacitenge. Hilikiya wakaluta kukafumba kwa Huda, nchimi yanakazi. Huda wakamuphalira uthenga uwu wakufuma kwa Yehova kuti wakaphalire Yosiya: ‘Yerusalemu na ŵanthu wose ŵalangikenge cifukwa ŵakusopa ŵaciuta ŵautesi, ndiposo cifukwa cakuti caru cazula na uheni. Kweni cifukwa cakuti iwe, Yosiya, wacita ico nchiwemi, cilango ici cizenge para iwe wafwa.’