Yosiya Wakatemwanga Dango la Chiuta

Yosiya wakaŵa fumu ya Yuda apo wakaŵa na vyaka 8. Mu nyengo yira, ŵanthu ŵakachitanga mayere na kusopa vikozgo. Apo Yosiya wakaŵa na vyaka 16, wakasambira kusopa Yehova munthowa yakwenelera. Wakati wafika vyaka 20, wakamba kuwuskamo vikozgo na majotchero mu charu chose. Apo wakaŵa na vyaka 26, Yosiya wakatuma ŵanthu kuti ŵanozge tempile la Yehova.

Hilikiya, wasembe mukuru, wakasanga buku la Dango la Yehova mu tempile. Panji buku ili ndilo wakalemba Mozesi. Shafani, mulembi wa themba, wakiza na buku kwa Yosiya ndipo wakaliŵazga. Apo Yosiya wakapulikizganga, wakawona kuti ŵanthu ŵakaleka kupulikira Yehova vyaka vinandi. Fumu Yosiya yikati kwa Hilikiya: ‘Yehova watikwiyira chomene. Luta ukayowoye nayo. Yehova watiphalirenge chakuti tichite.’ Yehova wakazgora kwizira mwa ntchimi yanakazi Hulida, wakati: ‘Ŵanthu ŵa mu Yuda ŵanileka. Ŵalangikenge, kweni mu nyengo ya Yosiya yayi, chifukwa iyo wajiyuyura.’

Yosiya wakati wapulika uthenga uwu wakaluta ku tempile, ndipo wakachema ŵanthu wose ŵa mu Yuda. Kufuma apo, wakaŵaŵazgira Dango la Yehova. Yosiya na ŵanthu wose ŵakapangana kuti ŵapulikirenge Yehova na mtima wawo wose.

Mtundu wa Yuda ukaleka kuchita Paska vyaka vinandi. Kweni Yosiya wakati waŵazga mu Dango kuti Paska likwenera kuchitika chaka chilichose, wakaphalira ŵanthu kuti: ‘Tiŵenge na Paska kwa Yehova.’ Yosiya wakanozga sembe zinandi kweniso wakimika ŵanthu ŵakuti ŵimbenge pa tempile. Kufuma apo, mtundu wose ukachita Paska kweniso Chiphikiro cha Vingwa Vyambura Nthukumusi, icho chikatora mazuŵa 7. Kakaŵa kakwamba kuti ŵanthu ŵachite Paska lanthena kufuma mu nyengo ya Samuyeli. Yosiya wakatemwanga nadi Dango la Chiuta. Kasi iwe ukukondwa kusambira vya Yehova?