Viŵanda Vikulimbikiska Ŵantu Kuti Ŵagarukire Ciuta
Ncifukwa wuli Satana na viŵanda vyake ŵakulimbikira comene kuti ŵapusike ŵantu? Cifukwa ncakuti ŵakukhumba kuti ise tirondezge ucigaruka wawo. Ŵakukhumba kuti ise tiŵasopenge. Ŵakukhumba kuti tigomezge utesi wawo na kucita ivyo Yehova wakutinka. Milimo yawo yinandi yikusazgapo mitheto yakukhwaskana na ŵakufwa.
Nyifwa ya muntu uyo tikumutemwa yikupweteka comene maghanoghano, ndipo ncakawiro na cakwenelera kulira. Apo mubwezi wake Lazaro wakafwa, Yesu “wakalira.”—Yohane 11:35.
Pali mitheto yinandi yakukhwaskana na ŵakufwa, ndipo yinandi mwa iyi njakupambana-pambana pacaru cose. Yinyake yikukanizgika cara na marango gha Baibolo. Kweni ndipouli, pali mitheto yinyake iyo njakuzikika pa utesi wakuti ŵakufwa mbamoyo ndipo ŵakuwona ŵantu ŵamoyo. Kutchezera panyifwa, kulira kwambura kukoreka, na viphikiro vinyake vyose ivyo vikucitika cifukwa cakuti ŵakopa kukwiyiska mizimu ya ŵakufwa. Pakuti ŵakufwa “ŵakumanya kantu cara,” wose awo ŵakucita mitheto iyi ŵakukhozgera utesi wa Satana.—Mupharazgi 9:5.
Viphikiro vinyake panji mitheto yikucitika cifukwa cakuti ŵantu ŵakugomezga kuti ŵakufwa ŵakukhumba covwiro kwa ŵamoyo ndiposo kuti ŵakufwa ŵangapweteka ŵamoyo usange ŵandaŵazikiske mtima. Ku vyaru vinyake kumeta na kupereka sembe kukucitika para pajumpa mazuŵa 40 panji caka cimoza kufuma apo muntu wakafwira. Ici ŵakuti cikucitika kuti wovwire wakufwa uyo ‘kwambukira’ ku caru ca mizimu. Cinyake ico ŵantu ŵanandi ŵakucita ndico kupereka cakurya na cakumwa ku ŵakufwa.
Kacitiro kose aka nkaheni pera cifukwa kakwandaniska utesi wa Satana pakuyowoya za ŵakufwa. Kasi Yehova wangazomerezga kuti ise ticitenge mitheto yakuzikika pa visambizgo vya viŵanda? Napacoko-pose!—2 Ŵakorinte 6:14-18.
Ŵateŵeti ŵa Ciuta waunenesko ŵakunjizgikamo cara mu mitheto iyo yikukhozgera utesi wa Satana. Mu malo mwake, mwacitemwa, ŵakulimbikira kovwira ŵamoyo na kuŵasanguluska. Iwo ŵakumanya kuti para muntu wafwa, Yehova yekha ndiyo wakumanya za muntu uyo.—Job 14:14, 15.
Ciuta Wakutinka Kugomezga Mizimu
Ŵantu ŵanyake ŵakuyowoya na viŵanda mwakudunjika panji kwizira mu vyanusi. Uku nkugomezga mizimu. Kuwukwa, ufwiti, kucita mayere, kuloska, na kufumba ŵakufwa, vyose ivi vili mu gulu la kugomezga mizimu.
Baibolo likukanirathu nkanira kucita vintu ivi, likuti: ‘Wareke kusangikamo mukati mwinu muntu uyo . . . wakucita maula, panji wakupwerera zinyengo, panji wakuwukwa na minkwara, panji canusi, panji wamintondwe, panji wakufumba ku mizimu, panji fwiti, panji wakufumba ku ŵakufwa. Cifukwa ŵose ŵeneawo ŵakucita ivi mbukazuzi kwa Yehova.’—Duteronome 18:10-12.
Ncifukwa wuli Yehova wakuticenjezga kuleka kucita maluso agha?
Kuti tikhale makora, Yehova wakuticenjezga kuleka kunjizgika mu kacitiro kose ka kugomezga mizimu. Iye wakutemwa na kupwererera ŵantu, ndipo wakumanya kuti awo ŵakucita maluso agha ŵapwetekekenge.
Muntu yumoza uyo wakacitanga maluso agha ni Nilda wa ku Brazil, mweneuyo wakayowoyanga na mizimu. Viŵanda vikamusuzga comene. Iye wakuti: “Mizimu . . . yikanikora ndipo yikanitumanga kucita ici na ici. Nkasintasintanga, niŵepo wamahara, nizgokepo cindere, pamanyuma pake nkarwara ntenda ya maghanoghano. Viŵanda vikaniyuzga comene kwakuti nkahangayikirathu nkanira. Nkamba kumwa minkhwara yakuzweteska wongo, kumwa phere na kukhweŵa hona kwambura kuleka. Nkarutilira kucita kaluso aka kwa vyaka vinandi.”
Nyengo yikati yajumpapo, na covwiro ca Yehova na Ŵakaboni ŵake, Nilda wakawombokwa ku viŵanda ndipo sono wali na umoyo uweme, wakusangwa. Iye wakuti: “Nkumupempani mose kuti mungayezganga cara kuyowoya na mizimu [yiheni] nanga lingaŵa zuŵa limoza.”
[Cithuzithuzi pa peji 19]
Mitheto yinyake njakuzikika pa utesi wakuti ŵakufwa ŵakutiwona
[Cithuzithuzi pa peji 20]
Mitheto yinyake njakuzikika pa utesi wakuti ŵakufwa ŵakukhumba covwiro
[Cithuzithuzi pa peji 21]
Ciuta wakunyanyara na maluso agha. Iye wakukhumba kuti timusopenge iye pera.—Exodus 20:5
[Cithuzithuzi pa peji 22]
Awo ŵakugomezga mizimu ŵakupwetekeka. Ŵangataya nyumba yawo, wanangwa wawo, na umoyo wawo wuwo