Teŵeterani Yehova, Lekani Kuteŵetera Satana
Ise tose tili na khumbo la kusanka. Kwali tikukhumba kuteŵetera Yehova panji Satana na viŵanda vyake. Tingateŵetera cara wose pamoza. Mwee, naco nciweme kuteŵetera Yehova!
Yehova Ni Muweme
Nga ni umo tawonera, viŵanda vikukondwa para vikupweteka na kupusika ŵantu. Yehova ndimo wakucitira ntena cara. Wakutemwa ŵantu nga ni mupapi uyo wakutemwa ŵana ŵake. Iye ni Mupi wa “vyawanangwa viweme vyose, na vyawanangwa vyakufiskika vyose.” (Yakobe 1:17) Ŵantu ŵake wakuŵanora cara cintu ico nciweme, nanga kungaŵa kuti kucita ntena kukumutayiska vinandi.—Ŵaefeso 2:4-7.
Aghanaghanani waka vintu ivyo Yesu, Mwana wa Ciuta wakacita pano pa caru capasi. Wakajula mulomo wa mbuwu na kucizga ŵantu ŵambura kulaŵiska. Wakacizga ŵantu ŵavyoni na ŵakupendera. Wakafumiska viŵanda na kucizga mitundu yose ya matenda. Cifukwa ca nkongono ya Ciuta, Yesu wakawuska nanga mbakufwa.—Mateyu 9:32-35; 15:30, 31; Luka 7:11-15.
Mu malo mwa kuyowoya utesi kuti watipusike, Ciuta nyengo zose wakuyowoya unenesko. Iye wakupuruska waliyose cara.—Maŵazgo 23:19.
Lekani Kucita Maluso Ghaukazuzi
Nga ni umo rutatavi rukutaŵira membe, ŵantu ŵanandi ŵakuzingika na mitheto ndiposo na utesi. Iwo ŵakopa ŵakufwa. Ŵakopa viŵanda. Ŵakufipa mtima na mafingo, mintondwe, nyanga, na vintumwa. Iwo ŵakukakika na vigomezgo na maluso ghakuzikika pa utesi wa Satana Diabolosi. Ŵateŵeti ŵa Ciuta ŵakopa cara vintu vya nga ni ivi.
Yehova ngwankongono comene kuruska Satana. Usange muteŵeterenge Yehova, iye wamuthaskaninge ku viŵanda. (Yakobe 4:7) Nyanga zigwirenge ncito yayi pa imwe. Mwaciyerezgero, ku Nigeria, fwiti ziŵiri zikacita mayere kuti zikome Kaboni wa Yehova uyo wakakana kufumamo mu tawuni yinyake. Apo mayere ghakati ghatondeka, fwiti yimoza yikatentema comene, ndipo yikiza kwa Kaboni yura na kupempa cigowokero.
Usange viŵanda vikumusuzgani, cemani pa zina la Yehova ndipo iye wamuthaskaninge. (Zintharika 18:10) Kweni, Ciuta kuti wamuvikilirani mukwenera kulekerathu kucita mikhaliro ya kugomezga mizimu na kusopa viŵanda. Ŵasopi ŵa Ciuta mu Efeso wakale nawo ndimo ŵakacitira. Ŵakawunjika na kotca mabuku ghose ghakusambizga masaramusi. (Milimo 19:19, 20) Lero, ŵateŵeti ŵa Ciuta nawo ndimo ŵakwenera kucitiraso. Tayani nyanga, vintumwa, mpiyi, mabuku ghakusambizga mayere, na cilicose ico cikukhwaskana na kugomezga mizimu.
Rondezgani Kusopa Kwaunenesko
Usange mukukhumba kukondweska Ciuta, kuleka waka kusopa kwautesi na kuleka kucita vintu viheni nkhwakukwanira cara. Mukwenera kurondezga kusopa kwaunenesko na mwampu winu wose. Baibolo likuyowoya ivyo vikukhumbikwa:
Koleranani na Ŵakaboni ŵa Yehova
Satana na viŵanda vyake ŵali na ŵantu pano pasi awo ŵakusambizga na kucita vintu viheni. Yehova nayo waliso na ŵantu ŵake. Iwo ŵakucemeka Ŵakaboni ŵa Yehova. (Yesaya 43:10) Pacaru cose capasi pali Ŵakaboni ŵakujumpa pa mamiliyoni ghanayi. Wose ŵakuyezgayezga kucita vintu viweme na kusambizga ŵantu unenesko. Mu vyaru vinandi, mungaŵasanga pa Nyumba ya Ufumu, kwenekuko ŵam’mupokelerani na cimwemwe.
Ncito yawo ndiyo kovwira ŵanji kuti ŵateŵetere Ciuta. Iwo ŵazamusambira namwe Baibolo panyumba pinu, kumovwirani kuti mumanye kusopa Yehova mu ntowa yakwenelera. Ivi ŵamucitiraninge kwawanangwa. Ŵakaboni mbakukondwa kusambizga unenesko cifukwa ŵakutemwa ŵantu ndiposo ŵakutemwa Yehova Ciuta.
[Cithuzithuzi pa peji 23]
Yesu, Mwana wa Ciuta, wakarongora citemwa pa ŵantu mwa kuŵacizga
[Cithuzithuzi pa peji 24]
Ŵaefeso ŵakawotca mabuku ghawo ghakusambizga masaramusi
[Cithuzithuzi pa peji 25]
Ŵazgani Baibolo.—Yohane 17:3
[Cithuzithuzi pa peji 25]
Fikani pa maungano gha Cikristu.—Ŵahebere 10:24, 25
[Cithuzithuzi pa peji 26]
Pharazgani ku ŵanyinu.—Mateyu 24:14
[Cithuzithuzi pa peji 26]
Pemperani kwa Yehova.—Ŵafilipi 4:6, 7
[Cithuzithuzi pa peji 26]
Bapatizikani.—Milimo 2:41
[Cithuzithuzi pa peji 27]
Ŵakaboni ŵa Yehova ŵamovwiraninge kuti muteŵetere Ciuta