CHIGAŴA 8

Kanani Cisopo Cautesi; Rondezgani Cisopo Caunenesko

1. Pakuyowoya za kusopa, kasi ŵantu ŵali na mwaŵi wakusanka vici mazuŵa ghano?

YESU wakayowoya kuti: “Uyo wali kumo na ine cara wakwimikana nane.” (Mateyu 12:30) Tingaŵa ku cigaŵa ca Yehova panji ca Satana. Ŵantu ŵanandi ŵakughanaghana kuti ŵakuteŵetera Ciuta, kweni Baibolo likuyowoya kuti Satana “wakupuruska caru cose capasi.” (Civumbuzi 12:9) Ŵantu ŵanandi ŵakugomezga kuti ŵakusopa Ciuta, kweni ŵakuteŵetera Satana Diabolosi! Mazuŵa ghano ŵantu ŵakwenera kupanga cakusanka: Ŵakwenera kusanka kuteŵetera Yehova, “Ciuta wa unenesko,” panji Satana “wiske wa utesi.”—Salmo 31:5; Yohane 8:44.

Fumanimo mu Cisopo Cautesi

2. Ni ntowa wuli iyo Satana wakugwiriskira ncito kujandizga ŵantu kuti ŵaleke kusopa Yehova?

² Ncintu ca mahara comene kusanka kuteŵetera Yehova, ncakusanka ico Ciuta wakukondwa naco. Kweni Satana wakukondwa cara na muntu uyo wakuteŵetera Ciuta ndipo wakumusuzga. Iye wakugwiriskira ncito mabwezi ghithu, viŵaro vya mbumba yithu na ŵantu ŵanji kutiyuyura panji kutisuska. Yesu wakacenjezgerathu kuti: “Ndipo ŵa mu nyumba ya muntu ŵati ŵaŵenge ŵalwani ŵake.”—Mateyu 10:36.

3. Usange mbumba yinu panji mabwezi ghinu ghakususka kasopero kinu, Kasi mungacitaci?

³ Usange ivi vyamucitikirani imwe, ni mwauli umo mungacitira? Ŵantu ŵanandi ŵakumanya kuti kasopero kawo nkambura kuzomerezgeka, kweni ŵakuziulika kuti ŵafumemo mu cisopo ico. Ŵakughanaghana kuti nkuwura kugomezgeka ku mbumba zawo usange wangafumamo. Kasi agha ni mahara? Usange mwamanya kuti viŵaro vya mbumba yinu vikugwiriskira ncito munkwara uwo ngulwani ku umoyo wawo, kasi imwe mungaŵacenjezga cara kuti munkwara uwo uwapwetekenge? Mungakolerana nawo cara kugwiriskira ncito munkwara uwo, kasi ndimo mungacitira ntena?

4. Kasi ni vintu wuli vyakukhwaskana na kusopa ivyo Joshua wakaŵaphalira Ŵaisrayeli mu nyengo yake?

⁴ Joshua wakaciska Ŵaisrayeli kuti ŵaleke kucita maluso ghaheni gha cisopo na visambizgo vya ŵapapi ŵawo. Iye wakati: ‘Sono muopani Yehova na kumuteŵetera mu urunji na mu unenesko; mufumyemo ŵaciuta aŵo ŵawiskemwe ŵakateŵeteranga sirya lira la mronga, na mu Egupto; imwe teŵeterani Yehova.’ (Joshua 24:14) Joshua wakaŵa wakugomezgeka kwa Ciuta, ndipo Yehova wakamutumbika. Usange tili ŵakugomezgeka kwa Yehova, iye wazamutitumbika.—2 Samuel 22:26.

Visambizgo vya Cisopo—Caunenesko na Cautesi

Utatu: Visopo vinandi vikusambizga kuti Ciuta ngwa Utatu. Vikuyowoya kuti “Wiske ni Ciuta, Mwana [Yesu] ni Ciuta, Mzimu Utuŵa ni Ciuta, kweni, aŵa kuti ni ŵa Ciuta ŵatatu ŵakupambana cara, kweni ni Ciuta yumoza.”

Mu Baibolo mulije lizgu lakuti “Utatu,” ndipo likusambizga cara kuti Yehova ni ŵantu ŵatatu awo ŵakupanga muntu yumoza. Yehova yekha ndiyo Ciuta. Lemba la 1 Ŵakorinte 8:6 likuyowoya kuti: “Kuli Ciuta yumoza, Ŵawiske.” Yehova Ngwapacanya Nkanira. Yesu Kristu ni Ciuta yayi, kweni ni “Mwana wa Ciuta.” (1 Yohane 4:15) Mwakuyana waka, mzimu utuŵa ni Ciuta yayi. Ndiposo mzimu utuŵa ni muntu yayi. Ni nkongono ya Ciuta iyo wakuyigwiriskira ncito.—Milimo 1:8; Ŵaefeso 5:18.
Umoyo: Visopo vinandi vikusambizga kuti umoyo ni cintu ico cikukhala mukati mwa muntu ndipo cikufwa yayi. Baibolo likusambizga kuti umoyo ni muntu, ndipo mbunenesko kuti muntu wakufwa.—Genesis 2:7; Ezekiel 18:4.
Helo wamoto: Visopo vyautesi vikusambizga kuti umoyo wa ŵantu ŵakwananga ukurangika mu helo wamoto kwamuyirayira. Kweni Baibolo likusambizga kuti ŵakufwa “ŵakumanya kantu cara.” (Mupharazgi 9:5) Baibolo likutisambizgaso kuti “Ciuta nkutemwa.” (1 Yohane 4:8) Yehova, Ciuta wacitemwa, wangasuzga yayi ŵantu na moto.

Bokosi: Kasi Baibolo likusambizgaci za Utatu, umoyo, na helo wamoto?

Tayani Vintu Vyose Ivyo Vikugwiriskirika Ncito pa Kusopa Kwautesi

5. Ncifukwa wuli tikwenera kutaya vintu vyose ivyo vikukolerana na mayere?

⁵ Kufumamo mu cisopo cautesi kukung’anamuraso kuti tikwenera kuparanya vintu vyose ivyo vikukhwaskana na mayere ivyo tingaŵa navyo, nga ni vintumwa, makhoza gha mayere, na vinyake vyanteura. Ici ncakukhumbikwa cifukwa cikurongora kuti tikugomezga comene mwa Yehova.

6. Kasi Ŵakristu ŵakudanga ŵakacitaci na mabuku ghawo ghakukhwaskana na mayere?

⁶ Aghanaghanirani ivyo Ŵakristu ŵanji ŵakudanga ŵakacita penepapo ŵakasanka kurondezga cisopo caunenesko. Baibolo likuyowoya kuti: “Ŵanandi ŵa aŵo ŵakacitanga mayere ŵakawunjika mabuku ghaŵo, ŵakaghoca pa maso pa ŵose.”—Milimo 19:19.

7. Tingacita wuli usange viŵanda vikutisuzga?

⁷ Ŵanji awo ŵakuteŵetera Yehova, kale ŵakacitanga ufwiti panji mayere, viŵanda vingaŵasuzga. Usange ici camucitikirani, muphalirani Yehova mwakukwezga mazgu mu lurombo, mwakugwiriskira zina lake. Iye wazamumovwirani.—Zintharika 18:10; Yakobe 4:7.

8. Ni mwauli umo Ŵakristu ŵaunenesko ŵakuwonera vikozgo, na vithuzithuzi ivyo vikugwiriskirika ncito mu cisopo cautesi?

⁸ Ŵantu awo ŵakukhumba kuteŵetera Yehova ŵakwenera cara kusunga cikozgo cilicose panji cithuzithuzi ico ncito yake nkovwira pa kusopa kwautesi. Ŵakristu ŵaunenesko ‘ŵakwenda mu cipulikano, mukuwona cara.’ (2 Ŵakorinte 5:7) Iwo ŵakucindika marango gha Ciuta agho ghakukanizga kugwiriskira cikozgo cilicose pa kusopa.—Exodus 20:4, 5.

Koleranani na Ŵantu ŵa Yehova

9. Kasi ni urongozgi wuli uwo Baibolo likupereka wakukhwaskana na kuŵa ŵamahara?

⁹ Baibolo likuyowoya kuti: “Uyo wakwenda na ŵavinjeru naye tiwaŵe wavinjeru.” (Zintharika 13:20) Usange tikukhumba kuti tiŵe ŵamahara, tikwenera kwenda ndiposo kukolerana na Ŵakaboni ŵa Yehova. Iwo ni ŵantu awo ŵakwenda mu ntowa iyo yikurongozgera ku umoyo.—Mateyu 7:14.

10. Kasi Ŵakaboni ŵa Yehova ŵangamovwirani wuli kuti muteŵetere Ciuta?

¹⁰ Ŵakaboni ŵakupwererera nadi ŵantu. Mulimo wawo ngwakovwira ŵantu ŵanenesko mtima kupulikiska unenesko wa Baibolo uwo ukurongozgera ku umoyo wamuyirayira. Ŵangamovwirani mwa kusambira namwe Baibolo kwa wanangwa. Ŵazamuzgora mafumbo ghinu na kumusambizgani umo mungagwiriskilira ncito mazgu gha Ciuta mu umoyo winu.—Yohane 17:3.

11. Kasi maungano gha Cikristu ghangamovwirani wuli?

¹¹ Pa maungano ghawo, gheneagho ghakucitikira mu Nyumba ya Ufumu, muzamusambirako vinandi ivyo Yehova wakukhumba. Khumbo linu la kurondezga cisopo caunenesko lizamukhozgeka. Ndipo muzamusambiraso umo mungawovwilira ŵanji kusambira unenesko wa Baibolo.—Ŵahebere 10:24, 25.

Maungano gha Ŵakaboni ŵa Yehova mu Nyumba ya Ufumu

12. Kasi lurombo lungamovwirani wuli kuteŵetera Ciuta?

¹² Penepapo mukusambira za khumbo la Yehova na cilato cake, muzamupulikiska makora na kuwongera ntowa zake zacitemwa. Khumbo linu lakucita vintu ivyo vikumukondweska likwenera kukura ndipo mukweneraso kutceŵa kucita vintu ivyo iye wakutinka. Kumbukirani kuti mungayowoya na Yehova mu lurombo, kumupempa kuti wamovwireni kuti mucitenge vintu ivyo ni viwemi na kutceŵa kucita vintu ivyo ni viheni.—1 Ŵakorinte 6:9, 10; Ŵafilipi 4:6.

Banja likuŵerenga Baibolo pamoza — Kasi mungarondezga wuli cisopo caunenesko?

13. Kasi mungamukondweska wuli Yehova?

¹³ Penepapo mukukura mwauzimu, mwambura kukayikira muzamuwona kuti nkhwakukhumbikwa kuti mubapatizike, kuŵa Kaboni wa Yehova. Mwa kuteŵetera lumoza na ŵantu ŵa Yehova, muzamukondweska mtima wa Yehova. (Zintharika 27:11) Muzamuŵa yumoza wa ŵantu ŵacimwemwe awo Ciuta wakuyowoya kuti: “Nditi ndikhalenge mwa iŵo, nditi ndendenge mwa iŵo, ndipo nditi ndiŵenge Ciuta waŵo, ndipo iŵo ŵati ŵaŵenge ŵantu ŵane.”—2 Ŵakorinte 6:16.

Nkafwatuka ku Viŵanda

Zuŵa linyake na usiku penepapo nkaŵa mu tulo na mufumu wane, nkapulika muntu wakunicema katatu. Ndipo nkawona kuti utheka ukupatukana ku mtenje wa nyumba ndipo cintu cinyake cakofya ca nga ni bola cikaniwira pa nthumbo. Kweni mufumu wane wakawona kalikose cara. Nga ncakufumapo cake, thupi lane likotcanga comene ndipo nkasuzgika na kotca uku kwa myezi yinandi.

Yikati yajumpapo myezi yinkondi na umoza, nkapulikaso mazgu gheneghagho kunicemaso. Nyengo yeneiyo, nyumba yose yikawonekanga nga ni kuti yabira mu maji. Sato yikuru yikafuma mu maji ndipo yikenda pacoko-pacoko mwakuzingilira woko lane. Nkayezgayezga kuti niyisezge kweni nkatondeka. Nkaŵa na wofi. Mu kuruta kwanyengo maji na njoka vyose vikawukapo, ndipo nkapondomoskekera pasi mwa nkaza. Nkazirika kwa maora ghanandi. Nkapulika mazgu kuniphalira kuti niyambeso kucita ncito yane ya ung’anga iyo nkacitanga pakwamba mu cikaya. Penepapo nkacifumba zina lake ciŵanda ico cikayowoyanga nane, cikaniphalira zina ilo likung’anamura “muntu musambazi kweni wambura mwana.” Ico cikanilayizga kuti cinovwirenge kuti niŵe musambazi kwizira mu nkongono yakucizga.

Ŵantu ŵarwari ŵakizanga kwa ine kufumira ku vigaŵa vyakutali na pafupi wuwo. Pambere ŵandafike pa nyumba yane, ŵakawonekanga pa galasi lane lapadera. Ndipo para muntu wafika, nkamukoranga casa mwankongono ndipo matenda ghake panji suzgo lake pamoza na mukhwara uwo ukukhumbikwa nkavimanyanga nyengo yeneiyo. Ciŵanda ici cikaniphaliraso unandi wa makopara agho ŵantu ŵakwenera kulipira.

Nkasanganga makopara ghanandi na vyawanangwa cifukwa ca vyakufumapo viweme vya kumanya munkwara. “Nkazgoka musambazi,” kweni nkasambiraso ng’anamuro la “kuŵa wambura mwana.” Nyengo yiliyose para nababa mwana, mukuru wake wakudikana nayo wakatayikanga. Ici cikaŵa ca citima comene. Mu virimika 12 ivyo nkateŵetera ciŵanda ici, ŵana ŵane ŵankondi na yumoza ŵakapotera.

Nkamba kupempa covwiro kwa Ciuta. Nkapempera mwakuŵeyerera. Zuŵa linyake Ŵakaboni ŵa Yehova ŵakafika pa nyumba yane. Nangauli nyengo zose nkaŵacimbizganga, kweni zuŵa ilo nkaghanaghana kuti nipulike ivyo ŵayowoyenge. Penepapo tikadumbiskananga, nkamanya kuti nkateŵeteranga ciŵanda! Nkaghanaghana kuti nilekerethu kucita vintu vya mizimu.

Penepapo nkaciphalira ciŵanda ico za ici, ico cikanicenjezga kuti ningalekanga cara. Ndipouli, nkaciphalira kuti “sono nalekerathu kukolerana nawe.”

Nkawotca vintu vyose ivyo nkagwiriskiranga ncito pakucita maula. Nkasambiranga Baibolo na Ŵakaboni, nkazgoka muteŵeti wa Yehova, ndipo nkabapatizika mu 1973. Sono nili na ŵana ŵankondi ŵankongono. Mufumu wane nayo wakasambira ndipo ni Kaboni wakubapatizika.—Nga ni umo wakarongosolera Josephine Ikezu.

Bokosi: Ni mwauli umo mwanakazi munyake wakafwatukira ku viŵanda?