Caru Capasi ca Paradiso

Yehova wazamuwuskapo viheni vyose ivyo Satana wacita. Yehova waŵika Yesu kuŵa Themba pacaru cose capasi. Mu ufumu wake, caru cose capasi cizamuzgoka paradiso.—Daniel 7:13, 14; Luka 23:43.

Yehova wakulayizga vintu ivi:

CAKURYA CINANDI: ‘Caru cizamupambika vipambi vyake; Ciuta, Ciuta withu, wazamutitumbika.’ “Kuŵenge fumpha ya vyakurya mu caru; [vizarenge, NW] na pa mapiri pacanya.”—Salmo 62:6; 72:16.

KUZAMUŴAVYA NKONDO: “Zaninge muwone milimo ya Yehova, umo wacitira maparaniko mu caru. Ndiye wakurekeska nkondo kumpererekezgo za vyaru.”—Salmo 46:8, 9.

ŴAHENI ŴAZAMUMARA: “Ŵaheni tiŵadumulikenge; . . . Kwakhala kanyengo, ndipo muheni kuti tiwaŵepo cara; tiuŵanike malo ghake kweni iye nta waŵengemo.”—Salmo 37:9, 10.

KUZAMUŴAVYA URWARI, VYAKUŴINYA, NA NYIFWA: “Penepapo maso gha vinthuru ghamkujurika, makutu gha ŵakumangwa nagho ghamkubanuka; ndipo mugonti wadukenge nga ndi mpala, lulimi lwa mbuwu lwimbenge.”—Yesaya 35:5, 6.

“Ndipo Ciuta . . . wati waŵenge pamoza nawo, . . . Ndipo wati wafyurenge sozi lose ku maso ghaŵo; ndipo nyifwa kuti yiti yiŵengekoso cara; panji nesi citengero kuti citi ciŵengekoso cara, nesi kulira, panji nesi kuŵinya: cifukwa vyakudanga viri kuruta.”—Civumbuzi 21:3, 4.

Mwakupambana na ivyo Satana na viŵanda ŵakucita, Yehova wakuteta cara. Vyose ivyo wakulayizga vikucitika. (Luka 1:36, 37) Yehova wakumutemwani ndipo wakukhumba kuti muzakakhale mu Paradiso uyo wakwiza. Mwanteura kumanani na Ŵakaboni ŵa Yehova kuti musambire vinandi pakuyowoya za unenesko uwo wuli mu Mazgu gha Ciuta. Usange mu umoyo winu murondezgenge unenesko, mbwenu mufwatukenge ku wuzga wa visambizgo vyautesi, mayere, na uburu. Mu nyengo yakuntazi, muzamufwatuka ku kwananga na nyifwa. Yesu wakayowoya kuti: “Muti mumanyiskenge unenesko, ndipo unenesko uti umuzgorani ŵanangwa.”—Yohane 8:32.