Sambiro 11
Vigomezgo na Maluso Gheneagho Ghakumukwiyiska Ciuta
Ndi mtundu ngu wa vigomezgo na maluso vyeneivyo niviheni? (1)
Kasi Ŵakristu ŵakwenera kugomezga kuti Ciuta ngwa Utatu? (2)
Cifukwa ncici Ŵakristu ŵaunenesko ŵakukondwerera nawo yayi Krisimasi, Istara, na mazuŵa ghakubabikira? (3, 4)
Kasi ŵakufwa ŵangapweteka ŵamoyo? (5) Kasi Yesu wakafwira pa mpinjika? (6) Kasi ncakuzirwa uli kukondweska Ciuta? (7)
1. Kuti ni vigomezgo na maluso ghose yayi ivyo ni viheni. Kweni Ciuta nta wakuvizomerezga usange vina malufura kufuma ku cisopa citesi panji vikulimbana na visambizgo vya Baibolo.—Mateyu 15:6.
2. Utatu: Kasi Yehova ngwa Utatu—ŵantu ŵatatu mu Ciuta yumoza? Cara! Yehova, Ŵadada, ndiyo “Ciuta mweneco yekha.” (Yohane 17:3; Marko 12:29) Yesu ndi Mwana Wake muŵere, ndipo ngwakujilambika kwa Ciuta. (1 Ŵakorinte 11:3) Ŵawiske mbakuru na Mwana. (Yohane 14:28) Mzimu utuŵa ndi muntu cara; ndi nkongono yakugwira ncito ya Ciuta.—Genesis 1:2; Milimo 2:18.
3. Krisimasi na Istara: Yesu kuti wakababika pa December 25 cara. Wakababika pafupifupi na October 1, nyengo ya caka peneapo ŵaliska ŵakakhalanga mu thondo ŵakalindiriranga mskambo wawo wa mberere na usiku. (Luka 2:8-12) Yesu kuti wakaphalirapo Ŵakristu kukondwelera kubabiwa kwake cara. Kwene, wakalangura ŵasambiri ŵake kukumbukira, panji kukumbukaso, nyifwa yake. (Luka 22:19, 20) Krisimasi na maluso ghake vyakufumila ku visopa vyautesi vyamwaka. Mwanteura pera na Istara na maluso ghake, nga ndi kugwiriskira ncito kwa masumbi na ŵakalulu. Ŵakristu ŵakutendekera kuti ŵakakondwelerapo Krisimasi nesi Istara pera yayi, nga ndi umo Ŵakristu ŵaunenesko sono ŵakulekera.
4. Mazuŵa Ghakubabikira: Viphikiro viŵiri pera vya mazuŵa ghakubabikira ivyo vikuyowoyeka mu Baibolo ndi ivyo vikacitika na ŵantu aŵo kuti ŵakasopanga Yehova cara. (Genesis 40:20-22; Marko 6:21, 22, 24-27) Ŵakristu ŵakutendekera kuti ŵakakondwelerapo mazuŵa gha kubabikira cara. Kaluso ka kukondwelera mazuŵa yakubabikira kakufumira ku visopa vyautesi vyakale. Ŵakristu ŵaunenesko ŵakupereka vyawanangwa nakucezgeraso pamoza panyengo zinyake mukati mwa caka.
5. Kopa Ŵakufwa: Ŵakufwa ŵangacita kalikose cara nesi kupulika kalikose. Tingawovwira cara, nakuteso iwo ŵangatipweteka cara. (Salmo 146:4; Mupharazgi 9:5, 10) Moyo ukufwa; kuti ukuŵaso wamoyo panyuma panyifwa cara. (Ezekiel 18:4, NW) Nyengo zinyake ŵangelo ŵaheni, ŵakucemeka viŵanda, ŵakuyezgelera kuŵa mizimu ya ŵakufwa. Maluso ghalighose agho ghakunjizgamo wofi panji kusopa ŵakufwa ngaheni.—Yesaya 8:19.
6. Mpinjika: Yesu kuti wakafwira pa mpinjika cara. Wakafwira pa mlongoti, panji pa khuni. Lizgu Lacigiriki lakung’anamulika “mpinjika” mu ma Baibolo ghanandi likung’anamula khuni limoza pera. Cimanyikwiro ca mpinjika ciri kufumira ku visopa vya utesi vyamwaka. Ŵakristu ŵakutendekera kuti ŵakagwiriskira ncito mpinjika cara mukusopa kwawo. Ipo, kasi mukughanaghana kuti nkwakurondora kugwiriskira ncito mpinjika mu kusopa?—Duteronome 7:26; 1 Ŵakorinte 10:14.
7. Cingaŵa cinonono nadi kuleka vinji vya vigomezgo na maluso agha. Ŵabali na ŵabwezi ŵangayezga kumukhuŵirizgani imwe kuti muleke kusinta vigomezgo vinu. Kweni kukondweska Ciuta nkwakuzirwa comene kuruska kukondweska ŵantu.—Zintharika 29:25; Mateyu 10:36, 37.
[Cithuzithuzi pa peji 22]
Ciuta kuti ngwa Utatu cara
[Cithuzithuzi pa peji 23]
Krisimasi na Istara vikufumira ku visopa vyautesi vyakale
[Cithuzithuzi pa peji 23]
Palije cifukwa cakusopera ŵakufwa panji kuŵawopa