Sambiro 13
Ndi Mwauli Umo Mungasangira Cisopa Caunenesko?
Kasi ndi visopa vyose ivyo vikumukondweska Ciuta, panji ncimoza pera? (1)
Cifukwa ncici pali visopa vinandi ivyo vikujicema kuŵa vya Cikristu? (2)
Mungaŵamanya uli Ŵakristu ŵaunenesko? (3-7)
1. Yesu wakambiska cisopa cimoza Cacikristu caunenesko. Nteura pera lero pakwenera kuŵako gulu limoza, panji ciwuru, ca ŵasopi ŵaunenesko ŵa Yehova Ciuta. (Yohane 4:23, 24; Ŵaefeso 4:4, 5) Baibolo likusambizga kuti mbacoko waka ŵali mu ntowa yifinyi yakuya ku umoyo.—Mateyu 7:13, 14.
2. Baibolo likayowoyerathu kuti pamanyuma pa nyifwa ya ŵapostole, visambizgo vya utesi na macitiro gheneagho kuti ngacikristu cara mwapacokopacoko vyamukunjira mu mpingo wa Cikristu. Ŵantu ŵamukuguza ŵasambiri kuti ŵarondezge iŵo mumalo mwa Kristu. (Mateyu 7:15, 21-23; Milimo 20:29, 30) Ndico cifukwa tikuwonera visopa vinandi vyakupambana-pambana ivyo vikujicema ivyo vyene kuti nvya Cikristu. Kasi Ŵakristu ŵeneco tingaŵamanya uli?
3. Cimanyikwiro cakuwonekera comene ca Ŵakristu ŵaunenesko ndico cakuti ŵana citemwa caunenesko pakati pawo. (Yohane 13:34, 35) Iwo kuti ŵakusambizgika kuti ŵaghanaghanenge kuti ŵali makorako kuruska ŵantu ŵa mafuko ghanyake panji cikumba cinyake cara. Nesi kuti iŵo ŵakusambizgika kutinka ŵanji kufuma ku vyaru vinyake cara. (Milimo 10:34, 35) Nteura iwo ŵakurwako nkondo cara. Ŵakristu ŵaunenesko ŵakucitirana nga ndi ŵabali na ŵadumbu.—1 Yohane 4:20, 21.
4. Cimanyikwiro cinyake ca cisopa caunenesko ndico cakuti mamembala ghake ghakulicindika comene Baibolo. Iwo ŵakulizomera ilo kuŵa Mazgu gha Ciuta nakugomezga ivyo likuyowoya. (Yohane 17:17; 2 Timote 3:16, 17) Iwo ŵakuwona Mazgu gha Ciuta kuŵa cintu cakuzirwa comene kuruska maghanaghano gha wuntu panji tumaluso. (Mateyu 15:1-3, 7-9) Iwo ŵakuyezga kukhala na umoyo mwakugwiriskira ncito Baibolo mu zuŵa lirilose la umoyo wawo. Nteura kuti ŵakusambizga vinyake na kucita vinyake cara.—Tito 1:15, 16.
5. Cisopa caunenesko cikweneraso kucindika zina la Ciuta. (Mateyu 6:9) Yesu wakapanga zina la Ciuta, Yehova, kumanyikwa ku ŵanji. Ŵakristu ŵaunenesko ŵakwenera kucita mwakuyana waka. (Yohane 17:6, 26; Ŵaroma 10:13, 14) Kasi mbanjani mu cigaŵa cinu aŵo ŵakumanyiskako ŵanji za zina la Ciuta?
6. Ŵakristu ŵaunenesko ŵakwenera kupharazga za Ufumu wa Ciuta. Yesu ndivyo wakacita. Iye nyengo zose wakayowoyanga za Ufumu. (Luka 8:1) Iye wakalangura ŵasambiri ŵake kupharazga uthenga wakuyana waka uwu pa caru cose capasi. (Mateyu 24:14; 28:19, 20) Ŵakristu ŵaunenesko ŵakugomezga kuti Ufumu wa Ciuta ndiwo wekha wiziskenge mtende na cimango ceneco pa caru ici capasi.—Salmo 146:3-5.
7. Ŵasambiri ŵa Yesu ŵakwenera cara kuŵa cigaŵa ca caru ici ciheni. (Yohane 17:16) Iwo kuti ŵakunjizgikamo cara mu vyakucitika vyandyale za caru na mpindano. Iwo ŵakutceŵa mkhaliro wakupweteka, maluso, na makhaliro ghakuzara mu caru. (Yakobe 1:27; 4:4) Kasi mungalimanya gulu la cisopa mu cigaŵa cinu ilo lina vimanyikwiro vya Cikristu caunenesko ivi?
[Vithuzithuzi pa peji 26, 27]
Ŵakristu ŵaunenesko ŵakutemwana, ŵakucindika Baibolo, ndipo ŵakupharazga za Ufumu wa Ciuta