Sambirani Kufuma mu Mazgu gha Ciuta

Kasi Mungamanya Wuli Cisopa Caunenesko?

Nkhani iyi yili na mafumbo agho panji muli kujifumbapo ndipo yikulongora uko mungasanga mazgoro mu Baibolo linu. Ŵakaboni ŵa Yehova ŵaŵenge ŵakukondwa kudumbiskana namwe mazgoro ghake.

1. Kasi pali cisopa cimoza pera caunenesko?

Yesu wakasambizga ŵalondezgi ŵake za cisopa cimoza caunenesko. Cili nga ni nthowa iyo yikulongozgera ku umoyo. Pakuyowoya za nthowa iyi Yesu wakati: “Mbacoko awo ŵakuyisanga.” (Mateyu 7:14) Ciuta wakuzomerezga kusopa uko kukukolerana na Mazgu ghake agho mbunenesko. Wose awo ŵakusopa mwaunenesko ŵali na cipulikano cimoza.—Ŵazgani Yohane 4:23, 24; 14:6; Ŵaefeso 4:4, 5.

2. Cifukwa wuli visopa vinandi vikuti ni Vyacikhristu?

Nchimi zitesi zananga Cikhristu ndipo zikucita vinthu kuti zisangirepo candulo. Yesu wakayowoyerathu kuti nchimi zitesi zikujizgora nga ni “mberere” zake, kweni zikucita vinthu nga ni mphumphi zanjara. (Mateyu 7:13-15, 21, 23) Cikhristu cautesi cikamba comenecomene ŵapositole ŵa Yesu ŵakati ŵafwa.—Ŵazgani Milimo 20:29, 30.

3. Kasi ni vinthu wuli ivyo cisopa caunenesko cikucita?

Awo ŵakusopa mwaunenesko ŵakucindika Baibolo kuti ni Mazgu gha Ciuta. Ŵakuyezgayezga kulondezga ivyo likuyowoya. Ntheura, cisopa caunenesko cikupambana na cisopa ico cikusambizga maghanoghano gha ŵanthu. (Mateyu 15:7-9) Awo ŵakusopa mwaunenesko ŵakucita vinthu ivyo ŵakusambizga.—Ŵazgani Yohane 17:17; 2 Timote 3:16, 17.

Cisopa caunenesko cikucindika zina la Ciuta, lakuti Yehova. Yesu wakamanyiska ŵanthu zina la Ciuta. Wakawovwira ŵanthu kumanya Ciuta, ndipo wakaŵasambizga kuti ŵalombenge kuti zina la Ciuta lituŵiskike. (Mateyu 6:9) Uko mukukhala, kasi nchisopa nchini ico cikuciska ŵanthu kuti ŵagwiliskirenge nchito zina la Ciuta?—Ŵazgani Yohane 17:26; Ŵaroma 10:13, 14.

4. Kasi mungamanya wuli awo ŵakusopa mwaunenesko?

Ŵakhristu ŵaunenesko ŵakupharazga Ufumu wa Ciuta. Ciuta wakatuma Yesu kuti wapharazge za Ufumu. Ufumu wa Ciuta ndiwo wekha ungawombora ŵanthu. Yesu wakalutilira kuyowoya za ufumu uwu mpaka pa zuŵa ilo wakafwira. (Luka 4:43; 8:1; 23:42, 43) Wakaphalira ŵalondezgi ŵake kuti ŵapharazge za ufumu wa Ciuta. Usange munthu munyake wakwiza kwa imwe na kuyowoya namwe vya Ufumu wa Ciuta, kasi wakwenera kuti ngwa cisopa wuli?—Ŵazgani Mateyu 10:7; 24:14.

Ŵalondezgi ŵa Yesu ŵali ku cigaŵa ca caru ciheni ici yayi. Ŵakunjilirapo yayi pa ndyali panji mphindano za mu vikaya. (Yohane 17:16) Kweniso, ŵakutolera yayi vyakucitika viheni ivyo vikucitika mu caru.—Ŵazgani Yakobe 1:27; 4:4.

5. Kasi cimanyikwiro cikuru ca Ŵakhristu ŵaunenesko nchivici?

Ŵakhristu ŵaunenesko ŵakutemwana zanadi. Ŵakucindika ŵanthu ŵa mitundu yose cifukwa cakuti ŵakulondezga Mazgu gha Ciuta. Nangauli cisopa cautesi kanandi cikukhozgera nkhondo za mu vyaru, awo ŵakusopa mwaunenesko ŵakukana kucita nthena. (Mika 4:1-4) Kweniso awo ŵali mu cisopa caunenesko ŵakumalira nyengo yawo na cuma cawo pa kovwira na kukhozga ŵanji.—Ŵazgani Yohane 13:34, 35; 1 Yohane 4:20, 21.

Kasi nchisopa wuli ico cikusambizga nadi Mazgu gha Ciuta, cikucindika zina la Ciuta, ndiposo cikupharazga za Ufumu wa Ciuta kuti ndiwo wekha ungawombora ŵanthu? Kasi nchisopa nchi ico ŵanthu ŵake ŵakutemwana zanadi, ndiposo ŵakucitako yayi nkhondo? Ukaboni ukulongora kuti Mbakaboni ŵa Yehova.—1 Yohane 3:10-12.

Kuti mumanye vinandi, wonani cipaturo 15 mu buku ili, Kasi Baibolo Likusambizgaci Comenecomene? lakupharazgika na Ŵakaboni ŵa Yehova.

[Cithuzithuzi pa peji 16]

“Ŵakuzomera pakweru kuti ŵakumanya Ciuta, kweni ŵakumukana na milimo yawo.”—Tito 1:16