Mukwenera Kusambira za Ciuta

Kuti muŵe bwezi la Ciuta, mukwenera kusambira za iye. Kasi mabwezi ghinu ghakulimanya zina linu na kuligwiriskira ncito? Enya, ŵakucita mwanteura. Ciuta nayo wakukhumba kuti imwe mulimanye zina lake na kuligwiriskira ncito. Zina la Ciuta ni Yehova. (Salmo 83:18; Mateyu 6:9) Mukweneraso kumanya ivyo iye wakutemwa na ivyo wakutinka. Mukwenera kumanya awo ni mabwezi ghake ndiposo awo mbarwani ŵake. Cikutora nyengo kuti mumanye yunji makora. Baibolo likuyowoya kuti ncamahara kuŵa na nyengo yapadera yakusambilira za Yehova.—Ŵaefeso 5:15, 16.

Mabwezi gha Ciuta ghakucita vintu ivyo vikumukondweska iye. Aghanaghanirani za mabwezi ghinu. Usange mukughayuyura na kucita vintu vyeneivyo igho ghakutinkana navyo, kasi igho ghazamulutilira kuŵa mabwezi ghinu? Cara! Mu ntowa yeneiyi pera, usange mukukhumba kuŵa bwezi la Ciuta, mukwenera kucita vintu ivyo iye wakukondweskeka navyo.—Yohane 4:24.

Kuti ni visopo vyose cara vikurongozgera ku ubwezi na Ciuta. Yesu, mweneuyo ni bwezi leneco la Ciuta, wakayowoya za ntowa ziŵiri. Ntowa yimoza njisani ndipo njakuzura na ŵantu. Ntowa iyo njakurongozgera ku paraniko. Ntowa yinyake njifinyi ndipo ŵantu ŵacoko ndiwo ŵakwendamo. Ntowa iyo njakurongozgera ku umoyo wamuyirayira. Ici cikung’anamura kuti usange mukukhumba kuti muŵe pa ubwezi na Ciuta, mukwenera kusambira ntowa yiweme yakumusopera iye.—Mateyu 7:13, 14.