Sambirani Kufuma mu Mazgu gha Ciuta
Kasi Tingasankha Wuli Ŵabwezi Ŵawemi?
Nkhani iyi yili na mafumbo agho panji muli kujifumbapo ndipo yikulongora uko mungasanga mazgoro mu Baibolo linu. Ŵakaboni ŵa Yehova ŵaŵenge ŵakukondwa kudumbiskana namwe mazgoro ghake.
1. Cifukwa wuli tikwenera kuŵa maso pakusankha ŵabwezi?
Taŵanandi tikukhumba kuti ŵanyithu ŵatitemwenge. Kanandi tikucita ivyo ŵanyithu ŵakucita cifukwa ca kukhumba kutemweka. Lekani nchipusu comene kutolera nkharo ya ŵabwezi ŵithu. Ntheura, ŵabwezi awo tikusankha ŵangatipangiska kuti tiŵe munthu muwemi panji muheni.—Ŵazgani Zintharika 4:23; 13:20.
Davide, uyo wakalembako Baibolo, wakasankhanga makora ŵabwezi ŵake. Wakatemwananga na ŵanthu awo ŵakamovwiranga kuti walutilire kuŵa wakugomezgeka kwa Ciuta. (Salmo 26:4, 5, 11, 12) Mwaciyelezgero, Davide wakatemwananga comene na Jonatani cifukwa Jonatani wakamuciskanga kuti wagomezgenge Yehova.—Ŵazgani 1 Samuel 23:16-18.
2. Kasi mungaŵa wuli mubwezi wa Ciuta?
Nangauli Yehova ni Ciuta wankhongonozose, kweni tingaŵa nayo paubwezi. Mwaciyelezgero, Abrahamu wakaŵa mubwezi wa Ciuta. Abrahamu wakagomezganga na kupulikira Yehova, ntheura Yehova wakamuwonanga kuŵa mubwezi wake. (Genesis 22:2, 9-12; Yakobe 2:21-23) Para tikugomezga Yehova na kucita ivyo wakutiphalira, nase tingaŵa ŵabwezi ŵake.—Ŵazgani Salmo 15:1, 2.
3. Kasi mungasanga candulo wuli cifukwa ca kuŵa na ŵabwezi ŵawemi?
Ŵanthu awo mbabwezi ŵinu nadi ŵakuŵa ŵakugomezgeka ndipo ŵakumovwirani kuti mucitenge viwemi. (Zintharika 17:17; 18:24) Mwaciyelezgero, nangauli Jonatani wakaŵa mulara kwa Davide panji na vilimika 30 ndipo ndiyo wakeneranga kuŵa themba lakulondezgapo la Israyeli, kweni wakaŵa ku cigaŵa ca Davide cifukwa Ciuta wakasora Davide kuŵa themba. Kweniso, ŵabwezi ŵanadi ŵakuŵa na cikanga kumususkani para ŵawona kuti mukucita vinthu mwambura mahara. (Salmo 141:5) Ŵabwezi awo ŵakutemwa Ciuta ŵamovwiraninge kuti muŵe na nkharo yiwemi.—Ŵazgani 1 Ŵakorinte 15:33.
Ku Nyumba ya Ufumu ya Ŵakaboni ŵa Yehova mwamusanga ŵanthu awo ŵakutemwa kucita viwemi. Mwamusangako ŵabwezi awo ŵamuciskaninge kuti mukondweskenge Ciuta.—Ŵazgani Ŵahebere 10:24, 25.
Ndipouli, nyengo zinyake ŵabwezi awo ŵakutemwa Ciuta ŵangatikhuŵazga. Lekani kukhuŵara luŵiro na maubudi ghawo. (Mupharazgi 7:9, 20-22) Kumbukani kuti palije mubwezi uyo wakuleka kubudiska. Kweni ico tikwenera kumanya nchakuti ŵabwezi awo ŵakutemwa Ciuta mbakuzirwa comene. Mazgu gha Ciuta ghakuticiska kuti tileke kuŵika comene mahara ku maubudi gha Ŵakhristu ŵanyithu.—Ŵazgani Ŵakolose 3:13.
4. Wuli usange ŵanthu awo ŵakuwoneka kuŵa ŵabwezi ŵithu ŵakutinena?
Ŵanthu ŵanandi para ŵamba kusambira Mazgu gha Ciuta ŵakusanga kuti ŵabwezi ŵawo ŵakale ŵakuŵanena. Panji ŵabwezi aŵa ŵakumanya yayi ulongozgi wakovwira uwo uli mu Baibolo ndiposo ivyo muzamusanga kunthazi cifukwa ca kuliŵazga. Panji mungaŵawovwira.—Ŵazgani Ŵakolose 4:6.
Kweni nyengo zinyake ŵabwezi aŵa ŵangagoska makani ghawemi agho ghali mu Mazgu gha Ciuta. (2 Petrosi 3:3, 4) Ŵanyake ŵangamunyozani para mukukhumba kucita viwemi. (1 Petrosi 4:4) Para vyanthena ivi vyamucitikirani, mukwenera kusankha usange mukukhumba kuŵa mubwezi wawo panji kuŵa mubwezi wa Ciuta. Para mwasankha kuŵa mubwezi wa Ciuta, mwasankha bwezi lakuluska mubwezi waliyose uyo munthu wangaŵa nayo.—Ŵazgani Yakobe 4:4, 8.
Kuti mumanye vinandi, wonani cipaturo 12 na 19 mu buku ili, Kasi Baibolo Likusambizgaci Comenecomene? lakupharazgika na Ŵakaboni ŵa Yehova.