SAMBIRO 48
Musankhenge Mwamahara Ŵabwezi
Ŵabwezi ŵapamtima ŵakutovwira kuti tikondwenge, ndipo ŵakutikhozga para tasangana na masuzgo. Kweni Baibolo likutichenjezga kuti ni waliyose yayi uyo wangaŵa mubwezi muwemi. Kasi tingachita wuli kuti tisankhenge ŵabwezi ŵawemi? Wonani fundo zakulondezgapo izi.
1. Ŵabwezi ŵithu ŵangatovwira panji kutinanga
Kanandi taŵanthu tikutemwa kutolera nkharo ya ŵanthu awo tikuchezga nawo. Kwali tikuchezga nawo pa intaneti panji maso na maso, kweni unenesko ngwakuti ŵanthu awo tikuchezga nawo ŵangapangiska kuti tiŵe na nkharo yiwemi panji yiheni. Baibolo likuti, “uyo wakwenda na ŵavinjeru waŵenge wavinjeru, kweni uyo wakuchita vinthu pamoza na vindere [ŵanthu awo ŵakumutemwa yayi Yehova] wapwetekekenge.” (Zintharika 13:20) Ŵabwezi awo ŵakutemwa Yehova ŵangamovwirani kuti muŵe paubwezi wakukhora na iyo kweniso kuti musankhenge vinthu mwamahara. Kweni ŵabwezi awo ŵakusopa Yehova yayi, ŵangatipangiska kuti tinange ubwezi withu na iyo. Lekani Baibolo likutichiska kuti tikwenera kusankha mwamahara ŵabwezi. Para ŵabwezi ŵithu ŵakutemwa Chiuta, ŵatovwirenge kuti tichitenge vinthu mwamahara ndipo nase tiŵawovwirenge. Tilutilirenge “kukhwimiskana na kuzengana.”—1 Ŵatesalonika 5:11.
2. Kasi Yehova wakuŵawona wuli ŵabwezi ŵinu?
Nyengo zose Yehova wakusankha mwamahara ŵabwezi ŵake. Iyo “wakuŵa mubwezi wa ŵakunyoloka.” (Zintharika 3:32) Kasi Yehova wangajipulika wuli para tili paubwezi na ŵanthu awo ŵakumutemwa yayi? Wangakondwa yayi! (Ŵazgani Yakobe 4:4.) Kweni para tikusankha ŵabwezi awo ŵali na nkharo yiwemi, Yehova wakondwenge chomene ndipo tiŵenge nayo paubwezi wakukhora.—Salimo 15:1-4.
MANYANI VINANDI
Wonani uwemi wa kusankha mwamahara ŵabwezi, kweniso ivyo mungachita kuti musankhenge ŵabwezi awo ŵangamovwirani.
3. Muŵe maso na mendezgano ghaheni
Mendezgano ghaheni ni para ukuchezga na ŵanthu awo ŵakutemwa yayi Chiuta kweniso fundo zake. Wonelerani VIDIYO, kufuma apo dumbiskanani fumbo ili.
Kasi tingendezgana wuli na ŵanthu ŵaheni kwambura kumanya?
Ŵazgani 1 Ŵakorinte 15:33, kufuma apo dumbiskanani mafumbo agha:
Kasi ni ŵanthu wuli awo ŵangaŵa mendezgano ghaheni kwa imwe? Chifukwa wuli?
Ŵazgani Salimo 119:63, kufuma apo dumbiskanani fumbo ili:
Kasi mungamumanya wuli munthu usange ni mubwezi muwemi panji yayi?
Apulo limoza lakuvunda lingananga maapulo ghose. Kasi mubwezi muheni wangananga wuli nkharo yinu?
4. Tingaŵa paubwezi uwemi na munthu waliyose
Baibolo likuzunura za Davide na Yonatani. Nangauli Yonatani wakaŵa mulara chomene kwa Davide, kweniso wakaŵa mwana wa themba, kweni ŵakaŵa paubwezi wa kandapo nane nikandepo. Ŵazgani 1 Samuyeli 18:1, kufuma apo dumbiskanani fumbo ili:
Chifukwa wuli ŵabwezi ŵithu ŵakwenera kuŵa ŵanthanga yithu pera yayi panji awo tikuyana nawo vyakuchita?
Ŵazgani Ŵaroma 1:11, 12, kufuma apo dumbiskanani fumbo ili:
Kasi ŵabwezi awo ŵakutemwa Yehova ŵangakhozgana wuli?
Mu vidiyo iyi, wonani umo mubali muwukirano wakusangira ŵabwezi ku malo uko wakhazganga yayi. Wonelerani VIDIYO, kufuma apo dumbiskanani mafumbo agha.
Kuyana na ivyo mwawona mu vidiyo, chifukwa wuli ŵapapi ŵa Akil ŵakafipanga mtima na ŵabwezi ŵa mwana wawo?
Chifukwa wuli pakwamba Akil wakaŵatemwanga chomene ŵabwezi ŵake aŵa?
Kasi wakachita wuli kuti wamazge phukwa?
5. Kasi tingachita wuli kuti tisange ŵabwezi ŵawemi?
Wonani ivyo mungachita kuti musange ŵabwezi ŵawemi kweniso umo namwe mungaŵira mubwezi muwemi. Wonelerani VIDIYO.
Ŵazgani Zintharika 18:24 na 27:17, kufuma apo dumbiskanani mafumbo agha:
Kasi ŵabwezi ŵanadi ŵakovwirana wuli?
Kasi imwe muli nayo mubwezi wanadi? Usange mulije, kasi mungachita wuli kuti muŵe nayo?
Ŵazgani Ŵafilipi 2:4, kufuma apo dumbiskanani fumbo ili:
Kuti muŵe na ŵabwezi ŵawemi, namwe mukwenera kuŵa mubwezi muwemi. Kasi mungachita wuli nthena?
Kuti tiŵe na ŵabwezi ŵawemi, nase tikwenera kuŵa mubwezi muwemi
IVYO ŴANYAKE ŴAKUYOWOYA: “Ntchiwemi kuŵa waka paubwezi na munthu waliyose kuluska kuŵavya mubwezi.”
Kasi imwe mukuti wuli?
MWAKUDUMURA
Yehova wakukondwa chomene para tikusankha mwamahara ŵabwezi, ndipo nase vinthu vikutiyendera makora.
Kuweleramo
Chifukwa wuli Yehova wakukhumba kuti tisankhenge ŵabwezi ŵawemi?
Kasi mbanthu wuli awo tikwenera yayi kuŵa nawo paubwezi?
Kasi mungachita wuli kuti muŵe paubwezi na ŵanthu ŵawemi?
SANGANI FUNDO ZAKUSAZGIKIRA
Wonani umo ŵabwezi ŵawemi ŵangatovwilira para tasangana na masuzgo.
“Khozgani Ubwezi Winu Pambere Umaliro Undafike” (Gongwe la Mulinda, Novembala 2019)
Wonani ivyo mungachita kuti musankhe ŵabwezi ŵawemi.
Kasi mukwenera kumanya vichi pa nkhani yakuŵa na ŵabwezi pa Intaneti?
Mu nkhani ya mutu wakuti “Nkhakhumbanga Chomene Kuŵa na Dada,” wonani ivyo vikapangiska mwanalume munyake kuti wasankheso makora ŵanthu awo wakachezganga nawo.
“Baibolo Likusintha Umoyo wa Ŵanthu” (Gongwe la Mulinda, Epulero 1, 2012)