Ncenjezgo ya Nyengo Yamwaka

Yehova wazamuzomerezga cara ŵantu ŵaheni kunanga Paradiso. Ndi mabwezi ghake ghekha agho ghazamukhalamo. Kasi ncici ico cizamuŵacitikira ŵantu ŵaheni? Kuti tisange zgoro, aghanaghanirani za nkani yaunenesko iyo yikamucitikira Nowa. Nowa wakakhala na umoyo virimika vikwi vinandi ivyo vyajumpa. Iye wakaŵa muntu muweme mweneuyo nyengo zose wakayezgayezganga comene kucita khumbo la Yehova. Kweni ŵantu ŵanyake pacaru capasi ŵakatemwanga kucita vintu viheni. Nteura Yehova wakamuphalira Nowa kuti Iye wiziskenge cigumula kuti waparanye ŵantu wose ŵaheni. Iye wakamuphaliraso Nowa kuti wazenge cingaraŵa mwakuti iye na mbumba yake ŵaleke kufwa para Cigumula cafika.—Genesis 6:9-18.

Nowa na mbumba yake ŵakazenga cingaraŵa. Nowa wakaŵacenjezga ŵantu kuti Cigumula cizenge, kweni iwo ŵakamupulikira cara. Iwo ŵakalutirizga kucita vintu viheni. Peneapo cingaraŵa cikamara kuzengeka, Nowa wakanjizga vinyama mu cingaraŵa, ndipo panyuma pake iye na mbumba yake nawoso ŵakanjira mukati. Panyuma pake Yehova wakarokweska vura yikuru. Vura yeneiyo yikarokwa mazuŵa 40 muhanya na usiku. Ndipo maji ghakazura caru cose.—Genesis 7:7-12.

Ŵantu ŵaheni ŵakafwa, kweni Nowa na mbumba yake ŵakaponoskeka. Yehova wakaŵaponoska iwo ku Cigumula na kuŵanjizga mu caru cakutozgeka ku uheni. (Genesis 7:22, 23) Baibolo likuyowoya kuti yikwizaso nyengo peneapo Yehova wazamuparanya wose awo ŵakukana kucita ico nciweme. Ŵantu ŵaweme ŵazamuparanyika cara. Iwo ŵazamukhala mu Paradiso pacaru capasi kwamuyirayira.—2 Petros 2:5, 6, 9.

Mazuŵa ghano ŵantu ŵanandi ŵakucita vintu viheni. Caru cazura na masuzgo. Yehova wakutuma Ŵakaboni ŵake mwakuwerezga-werezga kuti ŵacenjezge ŵantu, kweni ŵanandi ŵakukhumba cara kupulikira ku mazgu gha Yehova. Iwo ŵakukhumba cara kusinta ntowa zawo. Ŵakukhumba cara kuzomerezga ivyo Ciuta wakuyowoya vyakukhwaskana na ciweme na ciheni. Kasi ncici ico cizamuŵacitikira ŵantu ŵaheni aŵa? Kasi iwo ŵazamusinta zuŵa linyake? Ŵanandi ŵazamusinta cara. Nyengo yikwiza peneapo ŵantu ŵaheni ŵazamuparanyika ndipo ŵazamuŵaso na umoyo cara.—Salmo 92:7.

Caru capasi cizamuparanyika cara; kweni cizamuzgoreka kuŵa paradiso. Wose awo ŵazamuŵa mabwezi gha Ciuta ŵazamukhala kwamuyirayira mu Paradiso pacaru capasi.—Salmo 37:29.