Pa Nyengo ya Chiwowota, Mbanjani Ŵakategherezga? Mbanjani Ŵakazerezga?

Ŵanthu ŵanandi mu nyengo ya Nowa ŵakachitanga vinthu viheni. Genizesi 6:5

Adamu na Eva ŵakaŵa na ŵana ndipo ŵanthu ŵakandana pa charu chapasi. Pakajumpha nyengo, ndipo ŵangelo ŵanyake ŵakakolerana na Satana.

Ŵakiza pa charu chapasi na kujizgora nga mbanthu na chilato chakuti ŵatore ŵanakazi. Ŵanakazi ŵakababa ŵana awo ŵakaŵa vinkhara vyakofya ndiposo vyankhongono.

Charu chikazura na ŵanthu awo ŵakachitanga vinthu viheni. Baibolo likuti: ‘Uheni wa ŵanthu . . . ukaŵa ukuru mu charu, na kuti malanguruko ghose gha maghanoghano gha mitima yawo ghakaŵa ghaheni pera lutaluta.’

Nowa wakapulikira Chiuta na kuzenga chingalaŵa. Genizesi 6:13, 14, 18, 19, 22

Nowa wakaŵa munthu muwemi. Yehova wakaphalira Nowa kuti waparanyenge ŵanthu ŵaheni na chiwowota.

Kweniso Chiuta wakaphalira Nowa kuti wazenge boti likuru chomene, lakuchemeka ngalaŵa, ndipo wanjizgemo ŵamunyumba yake na mtundu uliwose wa vinyama.

Nowa wakachenjezga ŵanthu kuti kwizenge Chiwowota, kweni ŵakakana kutegherezga. Ŵanji ŵakamusekanga Nowa; ndipo ŵanyake ŵakamutinkhanga.

Chingalaŵa chikati chamara kuzengeka, Nowa wakatora vinyama na kuvinjizga mukati.