Kasi Mabwezi gha Ciuta Mbanjani?

Yesu Kristu ni Mwana wa Yehova ndiposo bwezi lake lakutemweka comene. Peneapo wakaŵa wandize pacaru capasi nga ni muntu, Yesu wakakhalanga kucanya nga ncilengiwa ca pacanya ca kumzimu. (Yohane 17:5) Panyuma pake wakiza pacaru capasi kuzakasambizga ŵantu unenesko wakuyowoya za Ciuta. (Yohane 18:37) Iye wakapereka umoyo wake wa wuntu kuponoskera ŵantu ŵakupulikira ku kwananga na nyifwa. (Ŵaroma 6:23) Yesu sono ni Themba la Ufumu wa Ciuta, boma lakucanya leneilo lizamwiziska Paradiso pacaru ici capasi.—Civumbuzi 19:16.

Ŵangelo nawo ni mabwezi gha Ciuta. Ŵangelo kuti ŵakakhalapo pacaru capasi nga mbantu cara. Iwo ŵakalengekera kucanya pambere Ciuta wakaŵa wandalenge caru capasi. (Job 38:4-7) Pali mamiliyoni ghanandi gha ŵangelo. (Daniel 7:10) Mabwezi gha Ciuta ghakucanya agha ghakukhumba kuti ŵantu ŵasambire unenesko wakuyowoya za Yehova.—Civumbuzi 14:6, 7.

Ciuta wali na mabwezi pacaru capasi; iye wakuŵacema iwo ŵakaboni wake. Mu khoti kaboni wakuphara ivyo wakumanya za muntu panji cintu cinyake. Ŵakaboni ŵa Yehova ŵakuphalira ŵanji ivyo ŵakumanya pakuyowoya za Yehova na khumbo lake. (Yesaya 43:10) Nga mbangelo, Ŵakaboni ŵakukhumba kumovwirani kusambira unenesko wakuyowoya za Yehova. Iwo ŵakukhumba kuti imwe namwe muŵe bwezi la Ciuta.