Kasi Ncici Ico Cikucitika pa Nyifwa?

Nyifwa nkulekana na umoyo. Nyifwa yili nga ni tulo tukuru. (Yohane 11:11-14) Ŵakufwa kuti ŵakupulika, kuwona, kuyowoya, panji kughanaghana za cilicose cara. (Mupharazgi 9:5, 10) Cisopo cautesi cikusambizga kuti ŵakufwa ŵakuya ku caru ca mizimu kuti ŵakakhale na ŵapapi ŵawo ŵakufwa ŵakale. Kweni ici ncisambizgo ca Baibolo cara.

Ŵakufwa ŵangatovwira cara, ndiposo ŵangatipweteka cara. Ŵantu ŵanandi ŵakunozga viphikiro vyakukumbukira ŵantu ŵakufwa na kupereka sembe izo ŵakugomezga kuti ŵantu ŵakufwa ŵangakondweskeka nazo. Ivi vikumukondweska cara Ciuta cifukwa nvyakuzikika pa mautesi gha Satana. Ivi vingaŵakondweska cara ŵakufwa, cifukwa iwo ŵalije umoyo. Tikwenera cara kuwopa panji kusopa ŵakufwa. Tikwenera kusopa Ciuta pera.—Mateyu 4:10.

Ŵakufwa ŵazamuŵaso na umoyo. Yehova ŵazamuwuskira ŵakufwa ku umoyo wa mu paradiso pacaru capasi. Nyengo ya ciuka iyi yicali kuntazi. (Yohane 5:28, 29; Milimo 24:15) Ciuta wangawuska ŵakufwa nga ndi umo imwe mungawuskira muntu uyo wali mu tulo.—Marko 5:22, 23, 41, 42.

Ghanoghano lautesi lakuti tikufwa cara lathandazgika na Satana Diabolosi. Satana na viŵanda vyake ŵakucitiska ŵantu kughanaghana kuti mizimu ya ŵantu ŵakufwa njamoyo ndipo yikupangiska maurwari na masuzgo ghanyake. Satana wakupuruska ŵantu, nyengo zinyake wakugwiriskira ncito maloto na mboniwoni. Yehova wakutinka ŵantu awo ŵakuyezgayezga kuyowoya na ŵakufwa.—Duteronome 18:10-12.