Kasi Chikuchitika Ntchivichi Para Munthu Wafwa?

Kasi pali mubwezi winu uyo wali kufwa? Panyengo yakusuzga iyi, panji mukajifumba kuti: ‘Kasi chikuchitika ntchivichi para munthu wafwa? Kasi tizamuŵawonaso ŵabwezi ŵithu?’ Mu sambiro ili kweniso lakulondezgapo, tisangenge mazgoro ghakupembuzga ghakufuma mu Baibolo.

1. Kasi chikuchitika ntchivichi para munthu wafwa?

Yesu wakayaniska nyifwa na tulo tuzito. Munthu uyo wagona tulo tuzito wakumanya yayi ivyo vikuchitika. Kasi nyifwa yikuyana wuli na tulo? Para munthu wafwa wakupulika vyakuŵinya yayi. Wakuchita phukwa yayi, nanga wangaŵa kuti wakaŵatemwanga chomene ŵabwezi na ŵamumbumba yake. Baibolo likuti “ŵakufwa ŵakumanya kalikose chara.”—Ŵazgani Mupharazgi 9:5.

2. Kasi tikusanga chandulo wuli para tamanya unenesko wakukhwaskana na nyifwa?

Ŵanthu ŵanandi ŵakopa chomene kufwa kweniso uyo wafwa! Kweni mungapembuzgika para mwamanya ivyo Baibolo likuyowoya pa nkhani ya nyifwa. Yesu wakati: “Unenesko umufwaturaninge.” (Yohane 8:32) Mwakupambana na ivyo visopa vinyake vikusambizga, Baibolo likusambizgapo yayi kuti munthu wali na mzimu uwo ukulutilira kuŵa na umoyo para wafwa. Ntheura munthu wakusuzgika yayi para wafwa. Pakuti ŵakufwa ŵakumanya kalikose yayi, ŵangatipweteka yayi. Ntheura tikwenera yayi kusopa ŵakufwa, panji kughanaghana kuti para taleka kuchita vinthu vinyake tiŵakwiyiskenge.

Ŵanthu ŵanyake ŵakuti ŵakuyowoyeskana na ŵakufwa. Kweni ivi vingachitika yayi. Nga umo tasambilira kale, ŵakufwa “ŵakumanya kalikose yayi.” Ŵanthu awo ŵakuti ŵakuyowoyeskana na ŵakufwa ŵakuteta. Unenesko ngwakuti ŵakuyowoyeskana na viŵanda ivyo vikujizgora kuŵa ŵanthu awo ŵali kufwa. Ntheura para tamanya icho chikuchitika para munthu wafwa, tikuvikilirika ku viŵanda. Yehova wakutichenjezga kuti tileke kuyowoyeskana na ŵakufwa chifukwa wakumanya kuti viŵanda vingatipweteka.—Ŵazgani Dotoronome 18:10-12.

3. Manyani icho chikuchitika para munthu wafwa

Ŵanthu ŵakugomezga vinthu vyakupambanapambana pa ivyo vikuchitika para munthu wafwa. Vigomezgo vinyake ni vyautesi.

• Kasi uko mukukhala ŵanthu ŵakugomezga vichi?

VIDIYO: Kasi Para Munthu Wafwa Wakuŵa Wuli?—Yakudumura (1:19)

Ŵazgani Mupharazgi 3:20, kufuma apo dumbiskanani mafumbo agha:

• Kuyana na lemba ili, kasi ntchivichi chikuchitika para munthu wafwa?

• Kasi pali chinyake icho chikulutilira kuŵa chamoyo para munthu wafwa?

Baibolo likutiphalira za nyifwa ya Lazaro mubwezi wa Yesu. Ŵazgani Yohane 11:11-14, na kuwona ivyo Yesu wakayowoya pa nkhani ya Lazaro. Kufuma apo dumbiskanani mafumbo agha:

• Kasi Yesu wakayaniska nyifwa na vichi?

• Kasi ivi vikulongora kuti chikuchitika ntchivichi para munthu wafwa?

• Kasi mukuwona kuti ivyo Baibolo likuyowoya pa nkhani ya ŵakufwa ni vyakupulikikwa?

4. Tikusanga chandulo para tamanya unenesko wakukhwaskana na ivyo vikuchitika para munthu wafwa

Para tamanya unenesko wakukhwaskana na ŵakufwa, tikopaso ŵakufwa yayi. Ŵazgani Mupharazgi 9:10, kufuma apo dumbiskanani fumbo ili:

• Kasi ŵakufwa ŵangatipweteka?

Para tamanya ivyo Baibolo likuyowoya pa nkhani ya ŵakufwa, vikutovwira kuti tileke kuŵawopa panji kuŵasopa. Ŵazgani Yesaya 8:19 na Chivumbuzi 4:11, kufuma apo dumbiskanani fumbo ili:

• Kasi mukuwona kuti Yehova wakuŵawona wuli ŵanthu awo ŵakusopa panji kupenja wovwiri ku ŵanthu awo ŵali kufwa?

5. Tikupembuzgika para tamanya unenesko pa nkhani ya nyifwa

Ŵanthu ŵanandi ŵakusambizgika kuti Chiuta wamuŵalanga para ŵafwa chifukwa cha vinthu viheni ivyo ŵakachitanga. Kweni tikupembuzgika chomene kumanya kuti palije uyo wakusuzgika para wafwa, nanga ni uyo wakachitanga vinthu viheni chomene. Ŵazgani Ŵaroma 6:7, kufuma apo dumbiskanani fumbo ili:

• Baibolo likusambizga kuti para munthu wafwa, ndikuti wafwatuka ku zakwananga zake. Kasi mukughanaghana kuti awo ŵali kufwa ŵakusuzgika chifukwa cha zakwananga izo ŵakachitanga?

Para tamumanya makora Yehova, tikumanyaso kuti wangalanga yayi munthu para wafwa. Ŵazgani Dotoronome 32:4 na 1 Yohane 4:8, kufuma apo dumbiskanani mafumbo agha:

• Kasi Chiuta uyo wali na mikhaliro iyo taŵazga mu mavesi agha wangasuzga munthu uyo wali kufwa?

• Kasi mukuwona kuti unenesko wakukhwaskana na ŵakufwa ngwakupembuzga? Chifukwa wuli?

MWAKUDUMURA

Para munthu wafwa umoyo wake ukumalira papo. Ŵakufwa ŵakusuzgika yayi ndipo ŵangatipweteka yayi.

Kuweleramo

• Kasi ntchivichi chikuchitika para munthu wafwa?

• Kasi unenesko wakukhwaskana na ŵakufwa ukutovwira wuli?

• Kasi unenesko wakukhwaskana na ŵakufwa ukutipembuzga wuli?

SANGANI FUNDO ZAKUSAZGIKIRA

Wonani ivyo mazgu ghakuti “umoyo” ghakung’anamura mu Baibolo.

“Kasi Umoyo Ni Vichi?” (Nkhani ya pa Intaneti)

Wonani usange kuli nadi malo gha helo agho Chiuta wakusuzgirako ŵaheni para ŵafwa.

Kasi Kuli Nadi Malo gha Helo Uko Chiuta Wakulangirako Ŵanthu Kwamuyirayira? (3:07)

Kasi tikwenera kopa ŵanthu ŵakufwa?

Mizimu ya Ŵakufwa—Kasi Yingamovwirani Panji Kumupwetekani? Kasi Yiliko Nadi? (burosha)

Wonani umo mwanalume munyake wakapembuzgikira wati wamanya unenesko wa ivyo vikuchitika para munthu wafwa.

“Nkhakondwa Chomene na Mazgoro Ghakupulikikwa Makora gha mu Baibolo” (Gongwe la Mulinda, Febuluwale 1, 2015)