Rongorani Kuruta Pantazi

PANYENGO yakudanga apo mukayamba kugwiriskira ncito marango gha mu Baibolo, igho mwapacoko-pacoko ghakamba kusinta kaghanaghaniro kinu, kayowoyero kinu ndiposo nkaro yinu. Kusinta kose uku mutepanji kukacitika pambere mukaŵa mundalembeske mu Sukulu ya Uteŵeti wa Ciuta. Mwambura kukayika, mwapatulira kale umoyo winu kwa Yehova. Kasi ici cikung’anamura kuti mungareka kuruta pantazi? Napacoko pose. Ubapatizo winu ni jando waka la vyose.

Musambiri Timote wakateŵeteranga nga ndi murara Wacikristu panyengo iyo Paulos wakamuphalira kuti ‘waghanaghanirepo,’ NW) pa urongozgi uwo ukaperekeka kwa iye na mauteŵeti agho ghakapika kwa iye. Iye wakeneranga ‘kuvifukatira nkanira’ vyeneivyi, kuti ‘ŵose ŵawone umo wakarutiranga makora pantazi.’ (1 Tim. 4:12-15) Usange mwayamba waka kusambira unenesko, kwali muli na cimanyisko cinandi Cacikristu, cilato cinu ciŵe cakuti murutilire kuruta pantazi.

Cimanyisko na Kusinta

Pa Ŵaefeso 3:14-19, tikuŵazga kuti mpostole Paulos wakaŵarombera Ŵakristu ŵanyake kuti ‘ŵaŵenge vinkhara pakupulikiska . . . usani na utali na kuzongoka’ kwa unenesko. Mwakusazgirapo, Yesu wakapereka vyawanangwa mu ŵanarumi kuti visambizge, kucenya na kukhozga mpingo. Kuranguruka pa Mazgu gha Ciuta nyengo zose pamoza na kugwiriskira ncito urongozgi wakufuma ku ŵasambizgi ŵa cimanyisko, vingatovwira kuti ‘tikule’ mwauzimu.—Efe. 4:11-15.

Kukura uku kukusazgapo ‘kuzgoka ŵapya mu mzimu wa mano ghinu.’ Ici cikung’anamura kuŵa na kaghanaghaniro kakukolerana na khumbo la Ciuta na Kristu. Cikukhumbikwira kuti nyengo zose tiyezgeyezge kughanaghana nga ndi umo iwo ŵakukhumbira kuti ‘tivware wuntu wupya.’ (Efe. 4:23, 24) Peneapo mukuŵazga nkani za mu Makani Ghawemi, kasi mukuwona kuti nkani za umoyo wa Kristu ni bambiro lakuti murondezge? Kasi mukutemwa kuti musanke yinyake mwa mikhaliro ya Yesu na kuyezgayezga kuyirondezga?—1 Pet. 2:21.

Nkani izo mukuyowoya zingarongora ukuru wa kuruta pantazi uko mwapanga. Awo ŵavwara wuntu wupya kuti ŵakuyowoya utesi cara, ŵakuyowoya uheni cara, ndiposo ŵakutuka cara. Mu malo mwake, ‘ŵakuzenga . . . kuti ŵapereke wezi kwa aŵo ŵakupulika.’ (Efe. 4:25, 26, 29, 31; 5:3, 4; Yuda 16) Fundo na nkani zinyake izo ŵakuyowoya ku malo ghaudesi na pa maungano gha mpingo vikurongora kuti unenesko ukusinta nadi umoyo wawo.

Usange muli kureka kuŵa “ŵakuyungwa-yungwa, ŵakupungwa-pungwa mu mpepo yose ya cisambizgo,” ici naco ncirongolero cakuti mukuruta pantazi. (Efe. 4:14) Kasi mukucita wuli, mwaciyerezgero, usange kucaru kwiza maluso ghapya, kacitiro kavintu ako ŵantu ŵanandi ŵakukakhozgera, panji mitundu yakupambana-pambana ya vyakusanguruska? Kasi mukulegherezga vintu vyauzimu kuti mukasanguruke? Nkaro yanteura iyi yikujandizga umoyo winu wauzimu kuti wuleke kukura. Mwee, nawo ni mahara para mungajiwombolera nyengo kuti mucite vintu vyauzimu!—Efe. 5:15, 16.

Umo mukucitira vintu na ŵanyinu nakoso kungarongora kuruta kwinu pantazi mwauzimu. Kasi mwasambira kuŵa ‘ŵa mtima wa cisungusungu, ŵakugowokera’ ŵabali na ŵadumbu ŵinu?—Efe. 4:32.

Kuruta kwinu pantazi mwakucita vintu mu ntowa iyo Yehova wakukhumba kukwenera kuwoneka mu mpingo na kunyumba kwinu. Kukwenera kuwonekaso kusukulu, kumalo ghanyake uko mukusangana na ŵantu na uko mukugwira ncito. (Efe. 5:21–6:9) Usange mu malo ghose agha mukurongora makora comene mikhaliro yakuzomerezgeka na Ciuta, ipo mbwenu kuruta kwinu pantazi kukuwonekerathu.

Gwiriskirani Ncito Cawanangwa Cinu

Yehova walikupereka maluso ghakupambana-pambana kwa waliyose wa ise. Iye wakukhumba kuti tighagwiriskire ncito maluso agha kuwovwira ŵanji, ndipo mwa ntowa iyi tingarongora ucizi wake ku ŵanyithu. Pakuyowoyapo za fundo iyi, mpostole Petros wakalemba kuti: “Kwakulingana na umo muntu na muntu wali kupokerera cawanangwa, muteŵeteranenge naco mwaŵene, nga mbalinda-ŵarara ŵaweme ŵa . . . Ciuta.” (1 Pet. 4:10) Kasi ndi mwauli umo imwe mukucitira pa cigaŵa ici?

Petros wakarutirizga kuyowoya kuti: “Usange muntu wakuyowoya, wayowoyenge nga ndi para ndi mavumbuliro gha Ciuta.” (1 Pet. 4:11) Vesi ili likudidimizga fundo yakuti waliyose wakwenera kuyowoya mwakukolerana ndendende na Mazgu gha Ciuta, kuti Ciuta wacindikike. Ntowa yithu ya kayowoyero yikwenera kucindikaso Yehova. Masambiro gha mu Sukulu ya Uteŵeti wa Ciuta ghangamovwirani kuti mugwiriskire ncito makora cawanangwa cinu kucindikira Ciuta mwakovwira ŵanji. Mwakuŵa na cilato canteura ici, kasi ndi mwauli umo mungapimira kuruta kwinu pantazi mu sukulu?

Mu malo mwakughanaghanira waka unandi wa urongozgi wa kayowoyero uwo mwagwilirapo ncito makora mu sukulu mu nkani zakupambana-pambana izo mukapika, kweni imwe wonani umo masambiro agho ghasintira luso lwa sembe zinu za marumbo. Sukulu yikutinozgekereska kuti tiŵe ŵapharazgi ŵaluso mu uteŵeti wa m’munda. Anteura jifumbani kuti: ‘Kasi nkunozgekera ivyo namuyowoya mu uteŵeti wa m’munda? Kasi nasambira kurongora cimwemwe ku ŵantu awo nkuŵapharazgira? Kasi nkudumbiskana na ŵantu mu ntowa yakuti niŵe na maulendo ghakuwelerako mwakuŵafumba mafumbo ghakuti nizakazgore nyengo yinyake? Usange nkucitiska sambiro la Baibolo na muntu yunji, kasi nkuŵa na cilato cakuti niŵe musambizgi waluso comene?’

Lekani kughanaghana kuti mwaruta pantazi cifukwa ca mwaŵi wa mauteŵeti agho muli kupika. Kuruta kwinu pantazi kuti kukuwoneka mu nkani cara, kweni kukuwoneka naumo mukucitira na nkani izo zikuperekeka kwa imwe. Usange mwapika nkani zakuti mukasambizge, jifumbani kuti: ‘Kasi nkugwiriskira nadi ncito luso lwa kusambizga? Kasi nkayowoya nkani yane mu ntowa yakuti ŵategherezgi ŵane ŵakandula nayo?’

Cikhuŵirizgo cakuti mugwiriskire ncito cawanangwa cinu cikung’anamura kuti imwe ndimwe mwambepo kucitapo kantu. Kasi mukupempa ŵanyinu kuti muteŵetere nawo mu uteŵeti wa m’munda? Kasi mukupatura nyengo yakuti movwire ŵanyinu awo muli nawo mpingo umoza, comene-comene awo mbacasono, ŵawukirano panji awo mbakukomwa? Kasi mukujipereka kuti mutozge Nyumba ya Ufumu panji kovwira mu ntowa zakupambana-pambana pa maungano gha cigaŵa na gha dera? Kasi mungacita upayiniya wakovwira mwezi na mwezi? Kasi mungakwaniska kucita upayiniya wanyengo zose panji kukawovwira mpingo uwo wuli na vyakusoŵa vinandi? Usange ndimwe mbali, kasi mungakwaniriska viyeneresko vya mu Malemba vya ŵateŵeti ŵakuteŵetera panji ŵarara? Kujipereka kwinu na mtima wose kuti mupereke wovwiri na kuzomerezga ncito iyo yapika kwa imwe ncirongolero cakuti mukuruta pantazi.—Sal. 110:3.

Uwemi Wakuŵa na Cimanyisko Cinandi

Usange mukujiwona kuti ndimwe wakupereŵera cifukwa cakuti mulije cimanyisko cinandi mu umoyo Wacikristu, lekani kutaya mtima. Mazgu gha Ciuta ghangapangiska ‘muzereza kuŵa wamahara.’ (Sal. 19:7; 119:130; Zinth. 1:1-4) Kugwiriskira ncito urongozgi wa mu Baibolo kukutipangiska kuti tisange candulo kufuma ku vinjeru vya Yehova. Vinjeru ivi nvyakuzirwa comene kuruska kusambira kufuma mu vyakukumana navyo pera. Kweni ndipera, peneapo tikuruta pantazi mu uteŵeti wa Yehova, tikusangaso cimanyisko cakuzirwa comene. Kasi ni mwauli umo tingagwiriskira ncito makora cimanyisko ici?

Cifukwa ca kukumana na mikhaliro yakupambana-pambana mu umoyo, nyengo zinyake muntu wangayezgeka mwa kughanaghana kuti: ‘Ka nili kukumanapo kale na ukhaliro uwu. Nkumanya umo ningacitira.’ Kasi kaghanaghaniro kanteura aka kangarongora kuti muntu wali na vinjeru? Lemba la Zintharika 3:7 likucenjezga kuti: “Ungajinenanga weka wavinjeru.” Cimanyisko cikutovwira kuti ticite makora vintu peneapo tikukumana na mikhaliro yinyake mu umoyo. Usange tikuruta nadi pantazi mu umoyo withu wauzimu, mbwenu cimanyisko ico tili naco citipangiskenge kuti timanye kuti tikukhumbikwira thumbiko la Yehova kuti tisange candulo. Anteura, kuruta kwithu pantazi kuti kukuwoneka cifukwa ca kujithemba kuti timaranenge nalo suzgo ilo cara, kweni kukuwoneka usange tikugomezga Yehova kuti warongozge umoyo withu. Kukurongorekaso para tikusimikizgira kuti palije cintu ico cingacitika kwambura kuti Ciuta wacizomerezga kucitika, ndiposo tikwenera kurutirizga kuŵa na cigomezgo na kukuriska ubwezi withu na Ŵadada ŵithu ŵakucanya.

Rutirizgani Kutambazukira Kuntazi

Nangauli mpostole Paulos wakaŵa muntu wakukhoma mwauzimu ndiposo Mkristu wakuphakazgika, kweni wakamanya kukhumbikwa kwa kurutirizga ‘kutambazukira kuntazi’ kuti wasange umoyo. (Fil. 3:13-16) Kasi namwe mukucita mwanteura?

Kasi mwapanga kuruta pantazi kukuru? Pimani kuruta kwinu pantazi mwakuwona umo mwajivwalikira imwe mwaŵene wuntu upya, umo mwajilambikira ku muwuso wa Yehova, ndiposo umo mukugwiriskilira ncito vyawanangwa vinu kuti mutumbike Yehova. Peneapo mukusanga candulo na masambiro gha Sukulu ya Uteŵeti wa Ciuta, kayowoyero na kasambizgiro kinu kakwenera kukolerana ndendende na mikhaliro iyo yalongosoreka mu Mazgu gha Ciuta. Nyengo zose mukwenera kufwilirapo pa vintu ivyo vyayowoyeka pacanya apa. Enya, vigwiriskireni ncito ivyo, ndipo kuruta kwinu pantazi kuzamuwoneka makora nkanira.