Ŵawukirano—Kasi Mucitengeci na Umoyo Winu?
“NKHUKHUMBA kuti nisange candulo cikuru na umoyo wane.” Ndimo wakayowoyera msungwana munyake. Mwambura kukayika namwe ndimo mukukhumbira. Kweni ni mwawuli umo mungasangira “candulo” na umoyo winu? Pa Wayilesi panji manyuzipepara, ŵanyinu na ŵasambizgi ŵinu ŵangayowoya kuti para munthu wali na ndalama zinandi na nchito yiwemi ndikuti vikumwendera!
Ndipouli, Baibolo likucenjezga ŵawukirano kuti kupenja vinthu vyakuthupi kulije candulo ndipo ‘ni suzgo ya mtima.’ (Mupharazgi 4:4) Cifukwa nchakuti mbawukirano ŵacoko waka awo ŵakusanga nadi vyuma na kumanyikwa. Ndipo awo ŵakucita nthena kanandi ŵakukhuŵara comene para vinthu vindacitike nga ni umo ŵakaghanaghaniranga. Muwukirano munyake wa ku Britain uyo wakapenjanga nchito yapacanya comene wakati: “Vili nga ni bokosi lambura kanthu.” Mbunenesko kuti nyengo zinyake nchito yingapeleka usambazi na kumanyikwa. Kweni yingamazga yayi ‘kusoŵerwa kwinu kwauzimu’. (Mateyu 5:3) Nakuti pa 1 Yohane 2:17, pakuticenjezga kuti “caru cikuluta.” Nanga mungasanga usambazi mu caru ici, uŵenge wa nyengo yicoko waka.
Lemba la Mupharazgi 12:1, likuciska ŵawukirano kuti: ‘Kumbukirani Mlengi winu penepapo mucali ŵawukirano.’ (Today’s English Version) Enya, nchiwemi kusankha kuteŵetera Yehova umoyo winu wose. Cakwamba mukwenera kufiska ivyo vikukhumbikwa kuti muteŵetere Ciuta. Kasi mungacita wuli? Ndipo ni vici ivyo vikukhumbikwa?
Ivyo Mungacita Kuti Muŵe Kaboni wa Yehova
Cakwamba, mukwenera kukhumba mwekha kuteŵetera Ciuta, ndipo khumbo ili likwiza lekha yayi nangauli ŵapapi ŵinu ŵangaŵa kuti Mbakhristu. Mukwenera kuŵa pa ubwezi na Yehova. Msungwana munyake wakati: “Kulomba kukovwira kuti muŵe pa ubwezi na Yehova.”—Salmo 62:8; Yakobe 4:8.
Lemba la Ŵaroma 12:2, likulongosora cinthu cinyake ico mukwenera kucita. Likuti: “mupime kwa mwaŵene ico nchiwemi na cakuzomerezgeka na khumbo lakufikapo la Ciuta.” Kasi nyengo zinyake mukukayikira ivyo mukusambira? Usange ni nthena, londezgani ivyo Baibolo likuyowoya na ‘kupima. . . mwaŵene’ kuti ivyo mukusambira mbunenesko! Penjerezgani. Ŵazgani Baibolo na mabuku ghakulongosora Baibolo. Kusambira za Ciuta kuti nkhumanya waka fundo cara. Ghanaghaniranipo ivyo mwasambira kuti vikhazikike mu mtima winu. Ndipo vimovwiraninge kuti mumutemwe comene Ciuta.—Salmo 1:2, 3.
Caciŵiri, mukwenera kuphalirako ŵanji ivyo mukusambira, nga ŵanyinu ŵa ku sukulu. Cinyake ico mungacita, nkhupharazga nyumba na nyumba. Para mukupharazga, mungakumana na uyo mukusambira nayo sukulu, ndipo soni zingamukorani. Kweni Baibolo likuti ‘tingakhozgekanga soni cara na makani ghawemi.’ (Ŵaroma 1:16) Mukupharazga uthenga wa umoyo na cilindizga ca munthazi! Palije cifukwa cakuŵira na soni.
Usange ŵapapi ŵinu Mbakhristu, mungaŵa kuti mukupharazgira lumoza. Kasi mukutemwa kwimilira waka panyumba kwambura kuyowoyapo cilicose panji mukumanya waka kupeleka magazini na mathirakiti? Kasi mungamupharazgira munthu panyumba yake na kumujulira Baibolo? Para vikumusuzgani, pemphani ŵapapi ŵinu panji ŵabali na ŵadumbu ŵakukhwima mwauzimu kuti ŵamovwirani. Mukwenera kuŵa na cilato kuti mufiske ivyo vikukhumbikwa kuti muŵe mupharazgi wambura kubapatizika wa makani ghawemi!
Mukuluta kwa nyengo muzamukhumba kujipatulira na kulayizga Ciuta kuti mumuteŵeterenge umoyo winu wose. (Ŵaroma 12:1) Ndipouli, kujipatulira kuti ni nkhani yakucitira kwa mwekha pera cara. Ciuta wakukhumba kuti tose ‘tizomere pakweru kuti tiponoskeke.’ (Ŵaroma 10:10) Panyengo ya kubapatizika, mukuzomera pakweru cipulikano cinu. Pamanyuma, mukubapatizika. (Mateyu 28:19, 20) Mbunenesko kuti ubapatizo tingawuwonanga mwakupepuka yayi. Kweni lekani kuzerezga kughanaghana kuti mungatondeka. Usange mukugomezga Yehova, iyo wazamumupani “nkhongono zakuluska zakawiro” kuti muŵe ŵakukhora.—2 Ŵakorinte 4:7; 1 Petrosi 5:10.
Para mwabapatizika, mukuŵa yumoza wa Ŵakaboni ŵa Yehova. (Yesaya 43:10) Ici cikukhwaska umo mucitirenge na umoyo winu. Uyo wajipatulira wakwenera ‘kujipata’. (Mateyu 16:24) Mukwenera ‘kupenja dankha ufumu’ wa Ciuta na kuleka kucita vinyake ivyo mwakhumbanga. (Mateyu 6:33) Mungaŵa na mwaŵi wakucita vinandi para mwajipatulira na kubapatizika. Vinyake ivyo mungacita ni ivi.
Mwaŵi wa Uteŵeti Wanyengo Zose
● Upayiniya ni umoza wa mwaŵi uwo tingaŵa nawo. Mupayiniya ni Mkhristu wakubapatizika wa ciyelezgero ciwemi uyo wakumalira maora 70 mwezi uliwose kupharazga makani ghawemi. Kumalira nyengo yinandi mu uteŵeti kumovwiraninge kuti muŵe na luso pakupharazga na kusambizga. Ŵapayiniya ŵanandi mbacimwemwe cifukwa ŵakovwira awo ŵakusambira nawo Baibolo kuŵa Ŵakaboni ŵakubapatizika. Kasi yilipo nchito yakukondweska na yakukhorweska ku caru uku?
Kuti ŵasange vinthu vyakukhumbikwa pa umoyo wawo, ŵapayiniya ŵanandi ŵakugwira maganyu. Ŵanji ŵakunozgekera kuzakacita upayiniya mwakusambira nchito ya mawoko ku sukulu panji ku ŵapapi ŵawo. Usange imwe na ŵapapi ŵinu mukukhumba kusazgirako masambiro para mwamalizga sekondare, mungaŵanga na cilato ca kuzakasanga ndalama zinandi yayi, kweni kusanga ndalama zakuti zizakamovwirani kufiska uteŵeti winu, panji na kwamba uteŵeti wanyengozose.
Mupayiniya wakuŵika mtima pa nchito ya ku caru cara, kweni uteŵeti wake—kovwira ŵanji kuti ŵasange umoyo! Kasi mwalekeraci kughanaghanira vya kucita upayiniya? Para munthu ni mupayiniya wakuŵa na mwaŵi wakucita milimo yinyake. Mwaciyelezgero, ŵapayiniya ŵanji ŵakusamukira ku vigaŵa uko ŵapharazgi ŵa Ufumu mbacoko. Ŵanyake ŵakusambira ciyowoyero cinyake na kuteŵetera na mpingo wa ciyowoyero ico panji nanga mungaŵa mu caru cinyake. Enya, upayiniya ngwacandulo comene!
● Sukulu Yakusambizga Baibolo ya Ŵakhristu Ŵakutorana nawo ni mwaŵi unyake. Sukulu iyi, yikusambizga ŵakutorana kuti ŵacite vinandi mu gulu la Yehova. Ŵanandi awo ŵasambira sukulu iyi ŵakutumika uko kukukhumbikwa wovwiri mu caru cawo. Ŵanji ŵangatumika ku caru cinyake usange ŵayowoya kuti ŵangafiska kukateŵetera mu caru ico. Awo ŵamalizga masambiro agha, ŵangacita upayiniya wapadera wa nyengo yicoko ku vigaŵa vyakutali ivyo kulijirethu ŵapharazgi, panji uko ŵapharazgi mbacoko
● Sukulu Yakusambizga Baibolo ya Ŵabali Ŵambura Kutora yili kwamba kuti yovwire ŵalara na ŵateŵeti ŵakovwira ŵambura kutora kuti ŵacitenge milimo yakusazgikira mu gulu la Yehova. Kwa myezi yiŵiri, ŵakusambira milimo ya ŵalara na ŵateŵeti ŵakovwira, umo gulu la Yehova likwendera na umo ŵangasambizgira pakweru. Ŵanyake mwa awo ŵasambira sukulu iyi ŵakutumika mu caru cawo ku malo agho ŵapharazgi mbacoko. Ŵanyake ŵakutumika ku vyaru vinyake usange ŵayowoya kuti ŵangakwaniska.
● Uteŵeti wa pa Beteli ni mwaŵi unyakeso uwo mungateŵetera nga wanchito wakujipeleka pa umoza wa minthavi ya Ŵakaboni ŵa Yehova. Ŵanyake ŵa mu mbumba ya Beteli ŵakucitako nchito yakunozga mabuku ghakulongosora za Baibolo. Ŵanji ŵakupika mauteŵeti ghanyake nga nkhupwelelera nyumba ya Beteli na ivyo vikukhumbikwa kwa awo ŵakuteŵetera pa Beteli. Ghose agha ni mauteŵeti ghakupatulika kwa Yehova. Mwakusazgirapo, awo ŵakuteŵetera pa Beteli mbacimwemwe cifukwa ŵakumanya kuti cilicose ico ŵakucita, cikovwira ŵabali ŵawo pa caru cose.
Nyengo zinyake ŵabali awo ŵali na maluso ghapadera ŵakucemeka kuti ŵakateŵetere pa Beteli. Kweni ŵanandi ŵakusambizgika para ŵafika. Awo ŵakuteŵetera pa Beteli ŵali na mtima wakuti ŵasange usambazi cara kweni iwo ŵakukhorwa na cakurya ico cikupelekeka, malo ghakugona, na tumakopara tucoko uto ŵakupika kuti ŵagure ivyo ŵakukhumba. Muwukirano munyake uyo wakuteŵetera pa Beteli wakati: “Mbuteŵeti wakukondweska comene! Tikuŵa ŵakutangwanika comene nkhanira, kweni nkhusanga vitumbiko vinandi cifukwa ca kuteŵetera kuno.”
● Uteŵeti wa pa caru cose ni uteŵeti wakuzenga minthavi na Nyumba za Ufumu. Ŵateŵeti aŵa ŵakuluta kukawovwira nchito ya kuzenga mu vyaru vyakuwaro. Uwu ni uteŵeti wakupatulika, nga ni uwo ŵakacita awo ŵakazenga tempele mu nyengo ya Solomoni. (1 Mathemba 8:13-18) Ŵateŵeti aŵa ŵakupwelelereka mwakuyana waka na awo ŵali pa Beteli. Ni mwaŵi wapadera kuti ŵabali na ŵadumbu aŵa ŵakuteŵetera na kulumba Yehova!
Kuteŵetera Yehova na-Mtima Wose
Nchakuzirwa comene kuteŵetera Yehova umoyo winu wose. Kasi mwalekeraci kughanaghanira za kuteŵetera Ciuta mu uteŵeti wanyengozose? Dumbiskanani za uteŵeti wanyengozose na ŵapapi ŵinu, ŵalara wa mpingo, na mulaŵiliri winu wa dera. Usange mukukhumba uteŵeti wa pa Beteli, kuluta Sukulu Yakusambizga Baibolo ya Ŵakhristu Ŵakutorana, Sukulu Yakusambizga Baibolo ya Ŵabali Ŵambura Kutora, muzakaŵepo pa ungano wa awo ŵakukhumba mauteŵeti agha uwo ukucitika pa ungano wadera na wacigaŵa.
Kweni, ni waliyose yayi uyo wangafiska kucita uteŵeti wanyengozose. Nyengo zinyake matenda, suzgo la ndalama, na milimo ya mbumba vingatondeska munthu kuti wacite uteŵeti wanyengozose. Ndipouli, Ŵakhristu wose ŵakwenera kupulikira languro la mu Baibolo lakuti: “Utemwenge Yehova Ciuta wako na mtima wako wose na umoyo wako wose na maghanoghano ghako ghose.” (Mateyu 22:37) Yehova wakukhumba kuti mucitenge ivyo mungakwaniska. Muli mose umo vinthu vingaŵira, Kuteŵetera Yehova kukwenera kuŵa pakwamba mu umoyo winu. Muŵe na vilato ivyo mungakwaniska kucita. Enya, ‘Kumbukirani Mlengi winu apo mucali ŵawukirano.’ Usange ndimo mucitirenge muzamutumbikika kwamuyirayira!
Malemba Ghacihebere mu thirakiti ili ghafuma mu Tumbuka Bible. Malemba Ghacigiriki ghafuma mu Baibolo la Malemba Ghakupatulika mu Mang’anamuliro gha Caru Ciphya, Mateyu-Uvumbuzi. Malemba agho ghafuma mu Baibolo linyake talongora uko ghafuma.