Waliyose Wakucemeka!
KUCEMEKERA nkhu? Kukawona ofesi ya munthavi panji kuti Beteli. Pa caru cose capasi pali maofesi gha minthavi 118. Ŵalendo awo ŵakukawona Beteli kanandi ŵakuwonga comene para ŵawona milimo iyo yikucitika pa malo agha.
Wati wawona umo ŵabali ŵakuteŵetelera Yehova mwakukondwa pa Beteli ya ku Mexico, muwukirano munyake uyo wakasambiranga Baibolo wakanweka comene, mwakuti wakafumba kuti: “Kasi ningacita wuli kuti nane nizakakhalenge pano?” Wakaphalirika kuti: “Cakwamba ukwenera kubapatizika. Kweniso cingaŵa ciwemi kuti ucite upayiniya wanyengozose.” Muwukirano uyu wakalondezga ivyo wakaphalirika, ndipo pakati pajumpha vilimika viŵiri wakacemeka kuti wakateŵetere pa Beteli ya ku Mexico, mwakuti pasono wateŵeterapo kwa vilimika 20.
Kasi Beteli Ni Vici?
Mu Cihebere, lizgu lakuti ‘Beteli’ likung’anamura Nyumba ya Ciuta. (Gen. 28:19) Mu maofesi gha minthavi ghanandi mukucitika mulimo wa kusindikizga na kutumizga Mabaibolo ndiposo mabuku ghakulongosora Baibolo, kweniso kovwira mwauzimu mipingo ya Ŵakaboni ŵa Yehova yakujumpha 100,000 pa caru cose capasi. Mu maofesi gha minthavi pa caru cose muli ŵateŵeti pafupifupi 20,000, awo ŵakuteŵetera Yehova ndiposo ŵabali ŵawo ŵauzimu muhanya na usiku. Awo ŵacita uteŵeti uwu kwa vilimika vinandi ŵakuteŵetera lumoza na ŵawukirano ŵankhongono. Awo ŵakuteŵetera pa Beteli ŵakuwunganga ndiposo kupharazga lumoza na mipingo iyo yili pafupi na Beteli. Ŵakuŵaso na nyengo yakusambilira Baibolo, yakusangulukira, ndiposo kucita vinthu vinyake ivyo ŵeneco ŵakhumba.
Mwezi uliwose awo ŵakuteŵetera pa Beteli ŵakupokera ndalama zicoko waka. Ŵakurya cakurya ciwemi, kweniso ŵakugona mu nyumba ziwemi. Nyumba za Beteli zili nga ni nyumba zakusangwirako yayi. Ndipouli, ni ziwemi. Ŵanthu awo ŵakuluta kukawona Beteli ŵakukondwa cifukwa ca kutowa kwa malo agha, kweniso ŵakukondwa cifukwa ca kuwona citemwa ndiposo mzimu wakukolerana uwo uli pa malo agha. Waliyose wakugwira nchito mwakulimbikira, ndipouli wakuŵa wakufwatuka na ŵanji. Pa Beteli palije munthu uyo wakujiwona kuti ngwapacanya cifukwa ca mulimo uwo wakucita. Mulimo uliwose ngwakuzirwa, kwali ngwa kutozga malo, kupwelelera maluŵa, kuphika, kusindikizga mabuku, panji kugwira mu ofesi. Awo ŵakuteŵetera pa Beteli ŵakukolerana kuti mulimo wa Ŵakaboni ŵa Yehova wendenge makora.—Kol. 3:23.
Manyani Vinyake vya Awo Ŵakuteŵetera pa Beteli
Tiyeni timanye vinyake vya ŵanthu awo ŵakuteŵetera pa Beteli. Nchivici cikaŵatuma kuti ŵaŵe na khumbo la kuteŵetera pa Beteli? Tiyeni tiwone za Mario. Apo wakambiranga unenesko wakagwiranga nchito yiwemi ku kamupani yakupanga magalimoto mu caru ca German, ndipo wakaŵa na mwaŵi wakuti wangasambazga. Pakati pajumpha nyengo yicoko waka kufuma apo wakabapatizikira, Mario wakajipeleka kuti wakagwire nchito pa Beteli kwa sabata yimoza. Wakapika mwaŵi wa kovwira ku dipatimenti ya kusindikizga mabuku. Mario wakawona kuti pakaŵa kupambana pakati pa ŵanthu awo wakagwiranga nawo nchito pa Beteli na awo wakagwiranga nawo nchito yakuthupi. Ntheura, wakapempha kuti nayo wateŵeterenge pa Beteli nyengo zose. Nangauli ŵabali ŵake ŵanandi ndiposo ŵanyake ŵa ku nchito ŵakapulikiska yayi ivyo wakacita, kweni Mario sono wakuteŵetera pa Beteli ku Germany, ndipo ngwakukondwa comene.
Ŵanandi awo ŵakuluta kukateŵetera pa Beteli ŵakuŵa kuti ŵandasambirepo nchito zinyake zapadera. Ndimo vikaŵira na Abel, uyo wateŵetera pa Beteli ya ku Mexico kwa vilimika 15. Wakati: “Beteli yanisambizga vinandi. Namanya kugwiliskira nchito makina ghakusindikizgira mabuku. Luso ulo nasambira mphanyi nkhusanga nalo ndalama zinandi comene kuwaro, kweni natenge niŵenge wakukondwa yayi nga umo nkhukondwera pa Beteli, nili na umoyo uwemi comene, nkhwenjerwa yayi na mzimu wa ciphalizgano uwo ukuŵa ku malo ghanandi gha nchito. Nkhuwona kuti nasambira vinthu vyapacanya comene ivyo vikunovwira mwauzimu ndiposo mwakuthupi. Kulijeso kunyake uko natenge nisangenge masambiro ghauzimu nga ni agha nanga nilutenge ku yunivesite yapacanya comene.”
Kukawona ku Beteli Kungamukhozgani
Munthu wangakhozga ubwezi wake na Yehova usange wangakawona waka Beteli. Ndimo vikaŵira na Omar wa ku Mexico. Anyina ŵakamusambizga unenesko. Kweni apo wakaŵa na vilimika 17, Omar wakaleka kuwungana na kupharazga. Wakamba mikhaliro yiheni ndiposo kutemwa comene vinthu vyakuthupi. Apo Omar wakagwiranga nchito ku kamupani yinyake, wakaŵa pa gulu la awo kamupani yikaŵatuma ku Beteli ya ku Mexico kukagwira nchito. Omar wakati: “Tikati tamara kugwira nchito iyo tikapukwa, ŵakatilongora malo gha pa Beteli. Cifukwa ca ivyo nkhawona ndiposo citemwa ico ŵakanilongora, nkhamba kughanaghanira za umoyo wambura kopa Yehova uwo nkhaŵa nawo. Nyengo yeneyiyo nkhambaso kuwungana ndiposo kusambira Baibolo. Pakati pajumpha myezi yinkhondi na umoza kufuma apo nkhalutira ku Beteli nkhabapatizika. Nkhuwonga Yehova cifukwa ca cikhuŵilizgo ico nkhasanga apo nkhaluta ku Beteli.”
Masahiko wa ku Japani, nayo wakakulira mu mbumba ya Ŵakaboni ŵa Yehova. Kweni wakamba kuwona kuti umoyo Wacikhristu ukumupoka wanangwa. Wakamba kutangwanika comene na masambiro ndipo wakaleka kuwungana ndiposo kupharazga. Iyo wakati: “Zuŵa linyake, mbumba yithu ndiposo Ŵakhristu ŵanyake ŵakapangana kukawona Beteli. Cifukwa ca kucicizgika na ŵamumbumba yithu, nane nkhaluta nawo. Nkhakhozgeka comene nati nendera malo gha pa Beteli. Cimwemwe ico nkhaŵa naco cifukwa ca kucezga na Ŵakaboni ŵa Yehova paulendo uwu cikaŵa cikuru comene kuluska ico nkhaŵanga naco para nkhucezga na ŵanthu awo Mbakaboni ŵa Yehova yayi. Nkhamba kukhumbisiska comene kuti nilondezgenge fundo Zacikhristu, ndipo nkhalomba kuti munthu wanisambizgenge Baibolo.” Pasono Masahiko wakucita upayiniya wanyengozose mu mpingo wa kwake.
Mudumbu munyake wa ku France wakaluta kukagwira nchito ku Moscow. Wakaleka kuwungana na ŵanthu ŵa Yehova ndipo wakalopwa mwauzimu. Wakamba kucita vinthu viheni, ndipo paumaliro wakatorana na munthu wakuwaro kwa gulu. Pamasinda, mudumbu munyake wa ku France wakaluta kukamuwona, ndipo wose ŵakaluta ku St. Petersburg, ku Russia kukawona Beteli. Mudumbu uyu wakalemba kuti: “Ku Beteli ŵakatipokelera makora comene, ndipo nkhacontheka mtima. Nkhawona mtende weneco. Nkhawona kuti mzimu wa Yehova ukaŵa pa malo agha. Nkhamanya kuti nili kupuvya comene kulekana na gulu la Yehova. Nati nawerako ku Beteli, nkhalomba Yehova kuti wanovwire, nkhamba kusambizga ŵana ŵane Baibolo, na kwambaso kulimbikira vinthu vyauzimu.” Pakaŵa vinandi ivyo vikakhozga mudumbu wakulopwa uyu, kweni cinyake ico cikamukhozga comene nkhukawona Beteli.
Kasi ŵanthu awo ŵakuŵamanya makora yayi Ŵakaboni ŵa Yehova ŵakukhwaskika wuli para ŵawona Beteli? Mu 1988 Alberto, uyo wakatemwanga comene ndyali, wakaluta kukawona Beteli ya ku Brazil. Wakakondwa comene cifukwa ca kutowa kwa malo, kuwona kuti mulimo ukucitika mu ndondomeko yiwemi, ndiposo comenecomene kuti ukucitika mwambura kubisa. Pambere wandalute kukawona Beteli, Alberto wakaluta uko mulamu wake uyo ngwasembe wakukhala. Alberto wakawona mphambano yikuru comene, ndipo wakati: “Cilicose ico cikucitika uko kukukhala ŵasembe cikucitika mwakubisa.” Pakati pajumpha nyengo yicoko waka kufuma apo Alberto wakakawonera Beteli, wakamba kusambira Baibolo, wakaleka kutemwa ndyali, ndipo sono ni mulara mu mpingo.
Mukucemeka Kukawona Beteli
Ŵanandi ŵayezgayezga kuti ŵakawone ofesi ya munthavi ya mu caru ca kwawo. Mwaciyelezgero, Paulo na Eugenia ŵa ku Brazil, ŵakasunga ndalama kwa vilimika vinayi na cilato cakuti ŵakawone Beteli ya mu caru cawo iyo yili pa mtunda wa makilomita 3,000 kufuma uko ŵakukhala. Iwo ŵakati: “Cikaŵa cakwenelera nadi kucita nthena. Sono talimanya makora gulu la Yehova. Para tikulongosora za mulimo uwo ukucitika pa Beteli, awo tikusambira nawo Baibolo nyengo zinyake ŵakutifumba kuti, ‘Kasi muli kuyako?’ Sono tingazgora na mtima wose kuti, enya.”
Kasi mu caru cinu muli ofesi ya munthavi? Tikumuciskani kuti mulute mukayiwone. Tikumusimikizgirani kuti ŵamumupokelerani makora comene ndipo mwamusanga vyandulo vinandi vyauzimu.
[Cithuzithuzi pa peji 18]
Mario
[Cithuzithuzi pa peji 18]
Abel
[Cithuzithuzi pa peji 18]
Germany
[Cithuzithuzi pa peji 18]
Japan
[Cithuzithuzi pa peji 18]
Brazil