Kupulikira Kukuvikilirenge

KASI ungatemwa kucita cilicose ico ukukhumba? Kasi pali nyengo zinyake apo ukukhumba yayi kuti muntu munyake wakuphalire cakucita? Yowoya unenesko, niphalire maghanoghano ghako.—

Kweni kasi ciweme ni ncini kwa iwe? Kasi ncamahara kucita cilicose ico ukukhumba? Panji vintu vikuŵa makora para ukupulikira ŵawuso na ŵanyoko?— Ciuta wakuti ukwenera kupulikira ŵapapi ŵako, nteura pakwenera kuŵa cifukwa ciweme cakucitira ntena. Tiye tiwone usange tingasanga cifukwa cake.

Kasi uli na virimika vilinga?— Kasi ukumanya virimika ivyo ŵadada ŵako ŵali navyo?— Kasi ŵamama na ŵasekuru ŵako ŵali na virimika vilinga?— Ŵakhala virimika vinandi kuruska iwe. Ndipo para muntu wakhala virimika vinandi, wakumanyaso vintu vinandi. Wakupulika na kuwona vintu vinandi ndiposo wakucita vintu vinandi cirimika cilicose. Nteura ŵanici ŵangasambira vinandi ku ŵarara.

Kasi ukumanya muntu munyake waliyose uyo ni mucoko kuruska iwe?— Kasi iwe ukumanya vinandi kuruska ivyo iye wakumanya?— Ncifukwa wuli iwe ukumanya vinandi?— Ncifukwa cakuti iwe wakhala virimika vinandi. Ukaŵa na nyengo yinandi yakumanyira vintu kuruska muntu uyo ni mucoko kwa iwe.

Kasi ni njani uyo wakhala virimika vinandi kuruska iwe na ine panji muntu waliyose?— Ni Yehova Ciuta. Wakumanya vinandi kuruska ivyo ukumanya iwe, ndiposo ivyo ine nkumanya. Para wakutiphalira kuti ticite cintu cinyake cilicose, tingaŵa ŵakusimikizga kuti ncintu ciweme, nanga cingaŵa cakusuzga. Kasi ukumanya kuti nanga ni Msambizgi Waluso nayo nyengo yinyake wakawona kuti nkwakusuzga kupulikira?—

Nyengo yinyake Ciuta wakapempa Yesu kuti wacite cintu cinyake cakusuzga. Yesu wakaromba za ici, nga ni umo tikuwonera apa. Iye wakaromba kuti: ‘Usange mukukhumba, musezge cintu cakusuzga ici kwa ine.’ Mwa kuromba nteura, Yesu wakarongora kuti ncipusu yayi kucita khumbo la Ciuta nyengo zose. Kweni kasi Yesu wakamalizga wuli lurombo lwake? Kasi ukumanya?—

Yesu wakamarizga mwakuyowoya kuti: “Kweni khumbo lane cara, kweni linu, licitike.” (Luka 22:41, 42) Wakakhumbanga kuti khumbo la Ciuta ndilo licitike, lake yayi. Ndipo wakarutirizga na kucita ivyo Ciuta wakakhumba mu malo mwa ivyo iye wakaghanaghananga kuti ni viweme.

Kasi tingatorapo sambiro wuli apa?— Tikutorapo sambiro lakuti nyengo zose nciweme kucita ivyo Ciuta wakuyowoya, nangauli nyengo zinyake vingaŵa vyakusuzga. Kweni tikusambiraposo cintu cinyake. Kasi ukucimanya?— Tikusambirapo kuti Ciuta na Yesu ni muntu yumoza yayi, nga ni umo ŵanji ŵakuyowoyera. Yehova ni murara ndipo wakumanya vinandi kuruska Yesu, Mwana wake.

Para tikupulikira Ciuta, tikurongora kuti tikumutemwa. Baibolo likuyowoya kuti: “Kutemwa Ciuta nceneici, cakuti tisungirire marango ghake: ndipo marango ghake kuti ngazitu cara.” (1 Yohane 5:3) Sono wawona, tose tikwenera kupulikira Ciuta. Iwe ukukhumba kumupulikira, asi ntena?—

Tiye tijure Baibolo lithu ndipo tiwone ivyo Ciuta wakuphalira ŵana kuti ŵacitenge. Tiŵazgenge ivyo Baibolo likuyowoya pa Ŵaefeso cipaturo 6, mavesi 1, 2 mupaka 3. Ilo likuti: ‘Mwa ŵana, pulikirani mu Fumu ŵapapi ŵinu: cifukwa uku nkwakurunjika. Cindika ŵawuso na ŵanyoko, (ili ndi Dango lakudanga ilo liri na layizgano), kuti kukukhalire makora, ndipo kuti ukhale virimika vinandi pano pa caru.’

Sono wawona, Yehova Ciuta iye mwene ndiyo wakukuphalira kuti upulikirenge ŵawuso na ŵanyoko. Kasi ‘kuŵacindika’ cikung’anamuraci? Cikung’anamura kuti ukwenera kuŵapa ncindi mu kayowoyero na kacitiro ka vintu. Ndipo Ciuta wakulayizga kuti para upulikirenge ŵapapi ŵako, ‘kukukhalirenge makora.’

Khala phee nikuphalirepo ka nkani kakukhwaskana na ŵantu awo ŵakathaskika cifukwa ca kupulikira. Ŵantu aŵa ŵakaŵako nyengo yakale mu msumba ukuru wa Yerusalemu. Ŵantu ŵanandi mu msumba wura ŵakakana kupulikira Ciuta, nteura Yesu wakaŵacenjezga kuti Yehova waparanyenge msumba wawo. Yesu wakaŵaphaliraso umo ŵangazakaponera usange ŵakutemwa ico nciweme. Wakati: ‘Para mukuwona Yerusalemu wazingirizgika na ŵasilikari, penepapo manyani kuti kuparanyika kwake kwaneng’enera. Ndipo iyi ndiyo nyengo yakufumira mu Yerusalemu na kucimbilira ku mapiri.’—Luka 21:20-22.

Nga ni umo Yesu wakayowoyera, ŵasilikari ŵakiza kuzakarwa nkondo na Yerusalemu. Ŵasilikari ŵa Roma ŵakazingirizga msumba wose. Kweni, pa cifukwa cambura kumanyikwa, ŵasilikari ŵara ŵakawelera kukwawo. Ŵantu ŵanandi ŵakaghanaghana kuti urwani wamara. Nteura ŵakakhalirira mu msumba mwenemumo. Kweni kasi Yesu wakaŵaphalira kuti ŵakeneranga kucitaci?— Kasi ntena ukacita uli usange uwenge kuti ukakhalanga mu Yerusalemu?— Awo ŵakagomezga nadi ivyo Yesu wakayowoya ŵakaleka nyumba zawo na kucimbilira ku mapiri kutali na Yerusalemu.

Kwa cirimika cose cathuntu, palije ico cikacitikira Yerusalemu. Mu cirimika caciŵiri, palijeso ico cikacitika. Mu cirimika cacitatu, nteura pera. Mutepanji ŵantu ŵanyake ŵakamba kughanaghana kuti awo ŵakacimbira mu msumba ŵakaŵa vindere. Kweni mu cirimika cacinayi, ŵasilikari ŵa Roma ŵakizaso. Ŵakazingirizgaso Yerusalemu. Sono pakaŵavya nyengo yakuti muntu wacimbire. Pa nyengo iyi ŵasilikari ŵakaparanya msumba wa Yerusalemu. Ŵantu ŵanandi awo ŵakaŵa mukati ŵakafwa, ndipo awo ŵakakhalako ŵakatorekera ku wuzga.

Kweni kasi ncivici ico cikacitikira awo ŵakapulikira Yesu?— Ŵakapona. Ŵakaŵa kutali na Yerusalemu. Nteura ŵakapwetekeka yayi. Kupulikira kukaŵavikilira.

Usange ndiwe wakupulikira, kasi nawe uvikilirikenge?— Ŵapapi ŵako ŵangakuphalira kuti ureke kuseŵera mu msewu. Kasi ncifukwa wuli iwo ŵangayowoya ntena?— Cifukwa cakuti nyengo zinyake galimoto zingakuganda. Kweni iwe zuŵa linyake ungaghanaghana kuti: ‘Msewu pa nyengo iyi mulije galimoto. Nipwetekekenge yayi. Ŵanyane nyengo zinandi ŵakuseŵera mu msewu, ndipo nindaŵawonepo kuti ŵacita ngozi.’

Umu ndimo ŵantu ŵanandi mu Yerusalemu ŵakaghanaghanira. Ŵasilikari ŵa Roma ŵati ŵaruta, kukawoneka nga kulije cakofya cilicose. Ŵanyake ŵakakhalanga mu msumba mwenemumo. Nteura nawoso ŵakakhalirira, ŵakacimbira yayi. Ŵakacenjezgeka, kweni ŵakapulikira yayi. Cifukwa ca ici, ŵakafwa.

Tiye tiwone ciyerezgero cinyake. Kasi uli kuseŵerapo na matcisa?— Cingawoneka nga ncintu cakukondweska kuwona moto para wakhwata matcisa. Kweni kuseŵera na matcisa kungapangiska ngozi. Nyumba yose yingapya na moto, ndipo iwe ungafwa!

Kumbukira kuti, kuŵa wakupulikira nyengo zinyake, ndipo zinyake kureka kupulikira nkhwakukwanira yayi. Kweni usange ukupulikira nyengo zose, uŵenge wakuvikilirika nadi. Kasi ni njani uyo wakuphalira ŵana kuti: “Mwa ŵana, . . . pulikirani ŵapapi ŵinu”?— Ni Ciuta. Ndipo, kumbukira kuti wakuyowoya ici cifukwa cakuti wakumutemwani.