Ciuta Ngwamazaza Comene Kuruska Waliyose

NILI na cigomezgo kuti unganizomerezga kuti pali yunji uyo ngwamazaza comene, panji kuti uyo ngwankongono comene kuruska waliyose. Kasi ukumumanya?— Ni Yehova Ciuta. Wuli pakuyowoya za Mwana wake, Msambizgi Waluso? Kasi iye naye ngwamazaza comene kuruska ise?— Enya, iye ndimo waliri.

Yesu wakakhalanga kucanya na Ciuta. Iye wakaŵa Mwana uyo wakaŵa na thupi lauzimu, panji kuti mungelo. Kasi Ciuta wakalengaso ŵangelo ŵanyake, panji ŵana ŵa thupi “lauzimu?”— Enya, wakalenga “ŵangelo” mamiliyoni ghanandi. Ŵangelo aŵa mbankongono comene kuruska ise.—Salmo 104:4 NW; Daniel 7:10.

Kasi ukukumbuka zina la mungelo uyo wakayowoya na Mariya?— Wakaŵa Gabriyeli. Iye wakaphalira Mariya kuti bonda wake wakeneranga kuzakaŵa Mwana wa Ciuta. Ciuta wakaŵika umoyo wa Mwana wake uyo wakaŵa na thupi lauzimu mu nthumbo ya Mariya kuti Yesu wababike nga ni bonda pano pa caru capasi.—Luka 1:26, 27.

Kasi ukugomezga cakuzizwiska ici? Kasi ukugomezga kuti Yesu wakakhalanga na Ciuta kucanya?— Yesu wakayowoya kuti pakudanga wakakhalanga kucanya. Kasi Yesu wakamanya wuli vintu vyanteura ivi? Mwambura kukayika, Mariya wakaphalira Yesu apo wakaŵa msepuka ivyo Gabriyeli wakayowoya. Ndiposo, Yosefe wakwenera kuti wakamuphalira Yesu kuti Awiske ŵake dininini ni Ciuta.

Apo Yesu wakabapatizikanga, Ciuta wakayowoya kufuma kucanya kuti: ‘Uyu ni Mwana wane.’ (Mateyu 3:17) Ndiposo, pa usiku wakuti wandafwe, Yesu wakaromba kuti: ‘Adada, ndicindikani pamoza na imwe, na ucindami weneuwo nkaŵa nawo pamoza na imwe pambere caru cikaŵa cindaŵeko.’ (Yohane 17:5) Apa Yesu wakarombanga kuti watorekere kucanya kuti wakakhalengeso na Ciuta. Ni mwauli umo iye wakeneranga kukakhalira kucanya?— Yehova wakeneranga kumusintaso kuti waŵe na thupi lauzimu panji kuti waŵeso mungelo.

Nkukhumba kukufumba fumbo lakuzirwa. Kasi ŵangelo wose mbaweme? Ukughanaghana wuli?— Pakudanga ŵangelo wose ŵakaŵa ŵaweme. Ici cili nteura cifukwa cakuti Yehova ndiye wakaŵalenga, ndipo cilicose ico wakalenga cikaŵa ciweme. Kweni pamanyuma pake mungelo yumoza wakazgoka muheni. Kasi wakazgoka wuli muheni?

Kuti tisange zgoro, tiye tighanaghanire nyengo yakumanyuma apo Ciuta wakalenga mwanarumi na mwanakazi wakudanga, Adamu na Heva. Ŵantu ŵanyake ŵakuyowoya kuti nkani yakuyowoya za ŵantu ŵaŵiri aŵa yikacitika nadi yayi, kweni ni ntharika waka. Kweni Msambizgi Waluso wakamanya kuti nkani iyi yikaŵa yaunenesko.

Apo Ciuta wakalenga Adamu na Heva, wakaŵaŵika mu munda wakucemeka Edeni. Munda uwu ukaŵa wakutowa comene, ukaŵa paradiso. Iwo ŵakeneranga kubaba ŵana ŵanandi na kukhala mu Paradiso kwamuyirayira. Kweni pakaŵa sambiro lakuzirwa ilo iwo ŵakeneranga kusambira. Ni ilo tiri kudumbiskanapo kale. Tiye tiwone usange ticali kulikumbukira.

Yehova wakaphalira Adamu na Heva kuti ŵakaŵa ŵanangwa kurya vipambi vinandi ivyo ŵakakhumbanga mu munda wula. Kweni mu munda wula mukaŵa khuni limoza ilo vipambi vyake ŵakakanizgika kurya. Ciuta wakaŵaphaliraso cakufumapo cake ca kurya vipambi vira. Iye wakati: ‘Mufwenge nadi.’ (Genesis 2:17) Anteura, kasi ni sambiro wuli ilo Adamu na Heva ŵakeneranga kusambira?—

Likaŵa sambiro la kupulikira. Nadi pano, kuti tiŵe ŵamoyo, cikuthemba pa kupulikira Yehova Ciuta! Cikaŵa cakukwanira yayi kuti Adamu na Heva ŵayowoyenge waka kuti ŵakamupulikiranga Ciuta. Kweni ŵakeneranga kurongora kwizira mu kacitiro kawo ka vintu. Usange ŵaŵenge ŵakupulikira Ciuta, iwo ntena ŵakarongoranga kuti ŵakumutemwa na kurongora kuti ŵakakhumbanga kuti waŵe Muwusi wawo. Ŵacitenge nteura ntena ŵakakhala kwamuyirayira mu Paradiso. Kasi kurya vipambi vya khuni lira kukarongoraci?—

Kukarongora kuti ŵakawongera yayi ivyo Ciuta wakaŵapa. Kasi iwe ntena ukapulikira Yehova usange uŵengepo mu munda mura?— Pakwambilira, Adamu na Heva ŵakapulikira. Kweni pamanyuma pake pakiza yunji uyo wakaŵa wankongono kuruska iwo uyo wakapusika Heva. Iye wakapangiska Heva kureka kupulikira Yehova. Kasi wakaŵa njani?—

Baibolo likuyowoya kuti njoka yikayowoya na Heva. Kweni nawe ukumanya kuti njoka yingayowoya yayi. Anteura, kasi yikayowoya wuli?— Mungelo munyake wakapangiska njoka yira kuti yiyowoye. Kweni uyo wakayowoyanga nadi wakaŵa mungelo. Mungelo uyu wakamba kughanaghana vintu viheni mu mtima wake. Wakakhumbanga kuti Adamu na Heva ŵamusopenge. Wakakhumbanga kuti iwo ŵamupulikirenge. Mungelo uyu wakakhumbanga kutora malo gha Ciuta.

Mungelo yura wakaŵika maghanoghano ghaheni mu mtima wa Heva. Kwizira mu njoka, iye wakati kwa Heva: ‘Ciuta wakamuphalirani unenesko imwe yayi. Mufwenge yayi para mungarya vipambi vya mu khuni lira. Para mwarya muzamuŵa ŵamahara nga ni umo waliri Ciuta.’ Kasi iwe ntena ukagomezga mazgu agha?—

Heva pa nyengo iyi wakamba kudokera comene ivyo Ciuta wakareka kumupa. Wakarya vipambi vya khuni lakukanizgika. Pamanyuma pake wakapako Adamu vipambi vira. Adamu wakagomezga yayi ivyo yikayowoya njoka. Kweni khumbo lakuti waŵe na Heva likaŵa likuru comene kuruska kuti watemwe Ciuta. Anteura iye naye wakarya vipambi vya khuni lira.—Genesis 3:1-6; 1 Timote 2:14.

Kasi cakufumapo cake cikaŵa civici?— Adamu na Heva ŵakazgoka ŵambura urunji, ŵakacekura ndipo paumaliro pake ŵakafwa. Pakuti ŵakaŵa ŵambura urunji, ŵana ŵawo wose nawo ŵakababika ŵambura urunji ndiposo nawo ŵakacekura na kufwa. Ciuta wakateta yayi! Mwaunenesko wose, kuti tiŵe ŵamoyo, cikuthemba pa kupulikira Ciuta. (Ŵaroma 5:12) Baibolo likutiphalira kuti mungelo uyo wakapusika Heva zina lake ni Satana Dyabulosi, ndipo ŵangelo awo ŵakazgoka ŵaheni ŵakucemeka viŵanda.—Yakobe 2:19; Civumbuzi 12:9.

Kasi wamanya cifukwa ico mungelo muweme uyo Ciuta wakalenga pamanyuma pake wakazgoka muheni?— Ni cifukwa cakuti wakamba kughanaghana vintu viheni. Mungelo yura wakakhumbanga kuti waŵe wapacanya. Iye wakamanya kuti Ciuta wakakhumbanga kuti Adamu na Heva ŵaŵe na ŵana. Anteura iye wakakhumbanga kuti ŵana ŵawo wose ŵazakamusopenge iye. Dyabulosi wakukhumba kuti muntu waliyose wareke kupulikira Yehova. Wakuyezgayezga comene kuŵika maghanoghano ghaheni mu mitima yithu.—Yakobe 1:13-15.

Dyabulosi wakuyowoya kuti palije muntu uyo wakutemwa nadi Yehova na mtima wose. Iye wakuyowoya kuti iwe na ine tikumutemwa nadi Ciuta yayi, ndiposo wakuyowoya kuti tikutemwa nadi yayi kucita ivyo Ciuta wakutiphalira. Wakuyowoya kuti tikupulikira Ciuta pekha para vintu vikutiyendera makora. Kasi Dyabulosi wakuneneska? Kasi ndimo ise tikukhumbira?

Msambizgi Waluso wakayowoya kuti Dyabulosi ni mutesi! Yesu wakarongora kuti wakumutemwa nadi Yehova mwakumupulikira. Yesu kuti wakapulikiranga Ciuta pekha apo vintu vikamwenderanga makora yayi. Wakamupulikiranga nyengo zose, nanga pangaŵa pa nyengo iyo ŵantu ŵakamucitiranga nkaza. Yesu wakarongora kugomezgeka kwa Yehova mupaka pa nyengo iyo wakafwira. Ici ndico cifukwa cake Ciuta wakamupa umoyo wamuyirayira.

Kasi ukughanaghana kuti murwani withu mukuru ni njani?— Ni Satana Dyabulosi. Kasi ungamuwona?— Nadi, ungamuwona yayi! Kweni tikumanya kuti iye waliko. Tikumanyaso kuti iye ngwankongono comene kuruska ise. Ndipouli, kasi ni njani uyo ngwankongono comene kuruska Dyabulosi?— Ni Yehova Ciuta. Anteura, tikumanya kuti Ciuta wangativikilira.