Cifukwa Ico Tikwenera Kurekera Kuteta

TIYEREZGERE kuti msungwana wakuphalira amama ŵake kuti: “Nizenge mwaluŵiro kuno ku nyumba para naŵeruka ku sukulu.” Kweni wati waŵeruka, wakwamba kuseŵera na ŵanyake ndipo pamanyuma pake wakuphalira amama ŵake kuti: “Asambizgi ndiwo ŵanguniphalira kuti nireke kwiza luŵiro.” Kasi cingaŵa ciweme kuyowoya nteura?—

Panji tiyerezgere kuti munyamata wakuphalira adada ŵake kuti: “Natimbanga bola mu nyumba yayi.” Wuli usange iye watimbanga nadi bola mu nyumba? Kasi nciweme kuyowoya kuti watimbanga yayi?—

Msambizgi Waluso wakatirongora kacitiro kaweme ka vintu. Wakati: ‘Kweni kayowoyero kinu kaŵenge, Inya, Inya; Cara, Cara; ndipo kayowoyero kose kakuruska apa kakufuma kwa muheni.’ (Mateyu 5:37) Kasi Yesu wakang’anamuranga vici pakuyowoya nteura?— Wakang’anamuranga kuti tikwenera kucita ivyo tikuyowoya.

Muli nkani yinyake mu Baibolo iyo yikurongora kuzirwa kwa kuyowoya unenesko. Nkani iyi yikuyowoya za ŵantu ŵaŵiri awo ŵakajiyowoyanga kuti ŵakaŵa ŵasambiri ŵa Yesu. Tiye tidumbiskane ivyo vikacitika.

Pafupifupi myezi yiŵiri yikati yajumpapo kufuma apo Yesu wakafwira, ŵantu ŵanandi ŵakiza ku Yerusalemu kufuma ku malo ghakupambana-pambana kuti ŵazakaŵepo pa ciphikiro cakuzirwa ca Ŵayuda, cakucemeka Pentekoste. Mpostole Petros wakayowoya nkani yiweme comene iyo wakaphaliranga ŵantu za Yesu, mweneuyo Yehova wakamuwuska ku ŵakufwa. Iyi yikaŵa nyengo yakwamba ku ŵantu ŵanandi awo ŵakiza ku Yerusalemu kuti ŵasambire za Yesu. Anteura ŵakakhumbanga kuti ŵasambire vinandi. Anteura, kasi ŵakacitaci?

Ŵantu aŵa ŵakakhala mu Yerusalemu kwa nyengo yitali. Nyengo yikati yajumpapo, ŵanji mwa ŵantu aŵa ndarama zikaŵamalira, anteura ŵakakhumbikwiranga wovwiri kuti ŵagure vyakurya. Ŵasambiri awo ŵakaŵa mu Yerusalemu ŵakatemwa kuti ŵaŵawovwire ŵalendo aŵa. Anteura ŵantu ŵanandi ŵakaguliska vintu vyawo ndipo ndarama zakufuma ku vintu ivi ŵakapereka ku ŵapostole ŵa Yesu. Pamanyuma pakupokera, ŵapostole aŵa ŵakapereka ndarama izi ku ŵantu awo ŵakaŵavya.

Hananiya na muwoli wake Safira, awo ŵakaŵa ŵa mu mpingo Wacikristu uwo ukaŵa mu Yerusalemu, ŵakaguliska munda wawo. Pakaŵavya muntu uyo wakaŵacicizga kuti ŵaguliske. Ŵakakhumba ŵekha kuguliska. Kweni iwo ŵakaguliska cifukwa cakuti ŵakatemwanga ŵasambiri ŵapya ŵa Yesu yayi. Hananiya na Safira ŵakakhumbanga kuti ŵajirongore ku ŵantu kuti iwo ndiwo ŵakacitanga vintu viweme, kweni iwo ŵakaŵa ŵaweme yayi. Anteura ŵakapangana kuti ŵayowoye kuti ŵapereka ndarama zose kuti ziwovwire ŵanji. Iwo ŵakapereka ndarama zose yayi, ŵakasidako zinyake, kweni ŵakajirongora nga ni para ŵakapereka zose. Kasi ukughanaghana kuti ici cikaŵa ciweme?—

Ŵati ŵamara kupangana, Hananiya wakiza uko kukaŵa ŵapostole. Wakapereka ndarama kwa iwo. Mwanadi, Ciuta wakamanya kuti Hananiya wasidako ndarama zinyake. Anteura Ciuta wakaphalira Petros kuti wamanye kuti Hananiya wasidako ndarama zinyake, uwo wakacitanga ukaŵa utesi.

Petros wakati: ‘Hananiya, cifukwa wuli wazomerezga Satana kuti wakupusike? Asi munda wose ukaŵa wako? Ukeneranga yayi kuwuguliska. Nanga pangaŵa pakuti waguriska munda wako, ukaŵa mwanangwa kusanka cakucita na ndarama zako. Ncifukwa wuli ukujirongora nga ni para wapereka ndarama zose kweni apo wasidako zinyake? Kuti wateta ku ŵantu pera cara, kweni na kwa Ciuta wuwo.’

Iyi ni nkani yakofya comene. Hananiya wakatetanga! Iye kuti wakacita ivyo wakayowoyanga yayi. Wakayerezgera waka kuti wakucita vintu viweme. Anteura Baibolo likutiphalira ico cikacitika pamanyuma pake. Ilo likuti: ‘Ndipo Hananiya wakati wapulika mazgu gha Petros, wakawa pasi, wakafwa.’ Ciuta wakazomerezga kuti Hananiya wafwe. Pamanyuma pake citanda cake ŵakacinyamulira kuwaro kwa nyumba na kukacitaya.

Pakati pajumpa maora ghatatu, Safira naye wakiza. Wakamanya yayi ico cikacitikira mufumu wake. Petros wakamufumba kuti: ‘Kasi mwanguguriska munda pa mtengo wa ndarama izo mwatipa?’

Safira wakazgora kuti: ‘Inya, ndarama zose izo tanguguriska munda ndizo tamupani.’ Kweni uwu ukaŵa utesi! Iwo ŵakasidako ndarama zinyake izo ŵakaguliska munda. Anteura Ciuta wakazomerezgaso kuti Safira naye wafwe.—Milimo 5:1-11.

Kasi tikusambirapo vici pa ivyo vikacitikira Hananiya na Safira?— Nkani iyi yikutiphalira kuti Ciuta wakutinka ŵantu ŵatesi. Iye wakukhumba kuti tiyowoyenge unenesko. Kweni ŵantu ŵanyake ŵakuti kuyowoya utesi mbuheni yayi. Kasi ukughanaghana kuti ŵantu aŵa ŵakuneneska?— Kasi ukumanya kuti urwari, vyakuŵinya na nyifwa vikiza pano pa caru cifukwa ca utesi?—

Kumbukira kuti Dyabulosi wakayowoya utesi kwa mwanakazi wakwamba, Heva. Dyabulosi wakaphalira Heva kuti wafwenge yayi usange wangareka kupulikira Ciuta mwakurya cipambi ico Ciuta wakamuphalira kuti wareke kurya. Pamanyuma pake Heva wakapulikira Dyabulosi ndipo wakarya cipambi cira. Heva wakanyengeleraso Adamu kuti naye warye. Ŵakati ŵarya, wose ŵakaŵa ŵakwananga, ndipo ŵana awo ŵakababa nawo ŵakababika na zakwananga. Cifukwa cakuti ŵakaŵa ŵakwananga, ŵana wose ŵa Adamu ŵakasuzgika ndipo pamanyuma pake ŵakafwa. Kasi masuzgo ghose agha ghakamba wuli?— Ghakambika cifukwa ca utesi.

Ndico cifukwa cake Yesu wakayowoya kuti Dyabulosi “ndi mutesi, ndipo ndi wiske wa utesi”! Iye ndiye wakaŵa wakwamba kuyowoya utesi. Para muntu wakuyowoya utesi, wakucita ico Dyabulosi wakacita pakwamba. Tikwenera kukumbukira fundo iyi para tikuyezgeka kuti tiyowoye utesi.—Yohane 8:44.

Kasi ni nyengo wuli iyo ungayezgeka kuti uyowoye utesi?— Kasi ni para wacita cintu cinyake ciheni?— Nyengo zinyake ungaswa cintu cinyake mwangozi. Usange wafumbika za cintu ico, kasi ukwenera kuyowoya kuti mukuru wako panji mudumbu wako ndiye waswa? Kasi nciweme kurongora nga ni para undamanye ico cacitika?—

Uli usange weneranga kucita ncito ya kusukulu pa nyumba, kweni undamalizge yose kucita? Kasi nciweme kuyowoya kuti wamalizga, kweni apo undamalizge?— Tikwenera kukumbukira ivyo vikacitikira Hananiya na Safira. Iwo ŵakayowoya unenesko wose yayi. Ciuta wakakondwa yayi na ivyo ŵakacita, anteura ndico cifukwa cake wakazomerezga kuti ŵafwe.

Mulimose umo vingaŵira, nyengo zose kuyowoya utesi nciheni, ndipo tireke kubisa fundo zinyake panji kuvanga utesi na unenesko pakuyowoya. Baibolo likuyowoya kuti: “Yowoyeskanani unenesko,” Likutiso: ‘Mungateterananga yayi.’ Nyengo zose Yehova wakuyowoya unenesko, anteura iye wakukhumba kuti nase ticitenge nteura.—Ŵaefeso 4:25; Ŵakolose 3:9.