Ivyo Ŵana Ŵakukhumba ku Ŵapapi
ŴAPAPI wose ŵakucita mulimo uwo ngwakusuzga kuti muntu wawupulikiske na kuwurongosora makoraghene. Mupapi waliyose wakucita cigaŵa cake mu mulimo uwu. Nga ncakufumapo cake, mama wakuŵa na mwana uyo wakukulira mu nthumbo yake. Ndico cifukwa cake, para mwana wababika, ŵantu ŵakuyowoya kuti “kubaba mwana ncintu cakuzizwiska comene.”
Kubaba ŵana ni jando la udindo wa ŵapapi. Para ŵacali ŵanici, ŵana ŵakuthemba wovwiri na pwererero la ŵapapi ŵawo, kweni para ŵakukura, ŵakukhumbikwira vinandi kuruska pa pwererero la vintu vyakuthupi. Ŵana ŵakwenera kovwirika kuti ŵakure makora mu kaghanaghaniro, kakhaliro na umoyo wawo wauzimu.
Kuti ŵakure makora, ŵapapi ŵakwenera kurongora citemwa ku ŵana ŵawo. Nangauli ŵapapi ŵangayowoya kuti ŵakuŵatemwa ŵana ŵawo, kweniso vyakucita vyawo vikwenera kurongora kuti ŵakuŵatemwa nadi. Na unenesko wose, ŵapapi ŵakwenera kupereka ciyerezgero ciweme ku ŵana ŵawo. Ŵana ŵakukhumbikwira kovwirika kuti ŵakure na nkaro yiweme. Wovwiri uwu ukwenera kuyamba kuperekeka peneapo ŵacali ŵacoko. Para ŵana ŵandawovwirike mwaluŵiro, pakuŵa vintu vinandi vyakucitiska citima ivyo vikucitika.
Urongozgi uweme uwo ungagwiriskirika ncito ni uwo wuli mu Baibolo. Urongozgi wa mu Baibolo nguweme comene. Kwizira mu urongozgi wa mu Baibolo, ŵana ŵakumanya kuti, ivyo ŵakuphalirika kuti vikufuma mu maghanoghano gha muntu yayi, kweni vikufuma kwa Mlengi wawo, Dada wawo wakucanya. Urongozgi wanteura uwu ukuŵa wakuzirwa comene kuruska uliwose uwo ŵantu ŵangapereka.
Baibolo likuciska ŵapapi kuti ŵasambizge makora ŵana ŵawo kuti ŵakumbukirenge na kugwiriskira ncito ivyo ŵakusambizgika. Ndipouli, peneapo ŵana ŵakukura, kanandi cikuŵa cakusuzga ku ŵapapi kuti ŵadumbiskane na ŵana ŵawo vintu vyakuzirwa. Buku lino la Sambirani kwa Msambizgi Waluso, lalembeka kuti lovwire ŵapapi na ŵana ŵawo kuti paleke kuŵa suzgo pakudumbiskana. Limovwiraninge imwe ŵapapi na ŵana ŵinu kuti mumanye nkani zauzimu izo mukwenera kuŵazgira pamoza. Mwakusazgirapo, liciskenge ŵana kuti ŵadumbiskanenge na awo ŵakuŵaŵazgira buku ili.
Mu malo ghanyake gha buku ili mukukhumbikwira kuti ŵana ŵayowoye maghanoghano ghawo. Muli mafumbo ghaweme ghanandi agho ghalembeka. Pantazi pa fumbo lirilose pali muzere ufupi (—). Muzere uwu ngwakuti mupumulire kuti muciske mwana winu kuti wazgore fumbo panji kuyowoyapo maghanoghano ghake. Ŵana ŵakutemwa kuyowoya. Para mukuleka kumupa mupata wakuti wayowoyepo, wakudonda luŵiro comene kuti warutirizge ivyo mukucita.
Cintu cakuzirwa cinyake ncakuti, mafumbo agha ghamovwiraninge kuti mumanye ivyo vili mu mtima wa mwana winu. Nyengo zinyake mwana winu wangapereka mazgoro ghautesi. Mazgu agho ghalembeka kuntazi kwa fumbo lirilose ghamovwirenge kuti wanyolorere mazgoro ghake.
Cintu cinyake capadera mu buku ili ncakuti liri na vithuzithuzi vyakukwana 230. Vinandi mwa vithuzithuzi ivi vili na mazgu agho ghakuciska mwana winu kuti wayowoyepo maghanoghano ghake pa ivyo wakuwona na ivyo waŵazga. Anteura, sandani vithuzithuzi vyose na kudumbiskana na mwana winu. Vithuzithuzi ivi vikusambizga makora comene ndipo vipangiskenge mwana winu kupulikiska ivyo wakusambira.
Para mwana winu wakumanya kuŵazga, muciskani kuti wamuŵazgirani mwakukwezga. Kuŵazga uku kumovwirenge kuti wakumbukirenge ivyo wakusambira. Kweni kuti paŵe cikolerano cikuru pakati pa imwe na mwana winu, mukwenera kuŵazgira lumoza buku ili na iye nyengo zose.
Mwakupambana na umo ukhaliro ukaŵira virimika vinandi ivyo vyajumpa, sono ŵana ŵakukumana na mikhaliro yiheni comene nga ni uzaghali na kugomezga mizimu. Anteura, ŵana aŵa ŵakwenera kuvikilirika, ndipo buku ili likupereka civikiliro ciweme comene. Mwanadi, ŵana ŵakwenera kusambizgika za Mupi wa vinjeru, uyo ni Dada withu wakucanya, Yehova Ciuta. Ici ndico Msambizgi Waluso, Yesu, wakacita. Tiri na cigomezgo cose kuti buku ili limovwiraninge imwe na mbumba yinu kuti muŵe na umoyo wakukondweska Yehova, ndipo vitumbiko ivyo musangenge viŵenge vyamuyirayira.