CHIGAŴA 6
Yobu Wakulutilira na Kunyoloka Kwake
Satana wakuphalira Chiuta kuti Yobu ngwakunyoloka nadi yayi, kweni Yobu wakulutilira na kunyoloka kwake pamaso pa Yehova
KASI munthu wangaŵa wakunyoloka kwa Chiuta usange wangayezgeka chomene kweniso usange wakuwona nga palije chandulo chilichose nanga wangapulikira Chiuta? Fumbo ili likafumbika chifukwa cha Yobu, ndipo munthu mweneyuyu wakutovwira kuzgora fumbo ili.
Apo Ŵaisrayeli ŵakaŵa kuti ŵachali ku Eguputo, Yobu, uyo wakaŵa mubali wa Abrahamu, wakakhalanga mu charu icho sono chikuchemeka Arabia. Sono ŵangelo kuchanya ŵakawungana pamaso pa Chiuta, ndipo Satana nayo wakaŵapo. Panthazi pa ŵangelo aŵa, Yehova wakalumba muteŵeti wake wakugomezgeka Yobu. Nakuti Yehova wakayowoya kuti pakaŵavya munthu wakunyoloka nga umo wakaŵira Yobu. Kweni Satana wakati Yobu wakateŵeteranga Chiuta chifukwa chakuti Wakamutumbika na kumuvikilira, mbwenu. Satana wakasimikizga kuti usange Yobu wangapokeka chilichose icho wali nacho, wangamutuka Chiuta.
Chakwamba, Chiuta wakazomerezga Satana kuti wapoke chuma cha Yobu na ŵana ŵake kweniso wakamutimba na nthenda. Kwambura kumanya kuti Satana ndiyo wakachitiskanga vinthu vyose ivi, Yobu wakapulikiska yayi icho Chiuta wakazomerezgera masuzgo agha. Kweni Yobu wakamutuka yayi Chiuta.
Ŵabwezi ŵatesi ŵatatu ŵakiza kwa Yobu. Ŵakamuyowoyera viheni vinandi ivyo vili mu buku la Job. Ŵanthu aŵa wakati Chiuta wakumulanga Yobu chifukwa cha zakwananga izo wakachita kuubende. Kweniso ŵakati Chiuta wakukondwa yayi na ŵateŵeti ŵake nesi kuŵagomezga. Yobu wakasuska maghanoghano agha. Wakayowoya mwachikanga kuti walutilirenge na kunyoloka kwake mpaka wafwe!
Kweni icho Yobu wakabuda ntchakuti wakajighanaghanira kuti wakaŵa murunji chomene. Pakaŵa munthu muwukirano wakuchemeka Elihu uyo wakategherezganga chidumbirano chose chira, ndipo nayo wakayowoyapo. Elihu wakamuchenya Yobu chifukwa cha kutondeka kuwona kuti chakuzirwa chomene nkhuthuwuska muwuso wa Yehova Chiuta kuluska kujirunjiska iyomwene. Kweniso Elihu wakachenya ŵabwezi ŵatesi ŵa Yobu.
Kufuma apo, Yehova Chiuta wakayowoya na Yobu, kumovwira maghanoghano. Yehova wakazunura vilengiwa vyakuzizwiska kovwira Yobu kuwona kuti Chiuta ni mukuru chomene kuluska munthu. Yobu wakajiyuyura na kupokelera ulongozgi wakufuma kwa Chiuta. Pakuti Yehova ‘wali na mtima wachitemwa chomene na chisungusungu,’ wakamuchizga Yobu na kuwezgerapo kaŵiri usambazi wake, ndipo wakamupa ŵana khumi. (Yakobe 5:11) Apo Yobu wakayezgekanga, wakalutilira kuŵa wakunyoloka kwa Yehova, ndipo wakazgora utesi uwo Satana wakayowoya wakuti para ŵanthu ŵangayezgeka chomene, ŵangalutilira yayi kuŵa ŵakunyoloka.
—Yafuma mu buku la Job.