Kasi Uthenga Uwemi ni Vichi?

1. Kasi Chiuta wakutiphalira uthenga wuli uwemi?

Chiuta wakukhumba kuti ŵanthu ŵakhalenge makora. Wakalenga charu chapasi na vyose ivyo vilimo chifukwa wakutemwa ŵanthu. Sonosono apa, wachitengepo kanthu kuti ŵanthu wose ŵakhale pawemi. Wapumuzgenge ŵanthu ku masuzgo.​—Ŵazgani Yeremiya 29:11.

Maboma ghose ghatondeka kumazga vivulupi, matenda, panji nyifwa. Kweni kufipa mtima yayi. Chiuta wawuskengepo maboma ghose gha ŵanthu na kuŵikapo lake. Ŵanthu ŵazamukhala mwamtende, ndipo matenda kuzamuŵavya.​—Ŵazgani Yesaya 25:8; 33:24; Daniyeli 2:44.

2. Chifukwa wuli ŵanthu ŵakwenera kupulika uthenga uwemi mwaluŵiro?

Masuzgo ghazamumara para Chiuta wawuskapo ŵanthu ŵaheni. (Zefaniya 2:3) Kasi ivi vizamuchitika pawuli? Vinthu ivyo vikuyungwiska ŵanthu mazuŵa ghano vikayowoyeka kale mu mazgu gha Chiuta kuti viŵengeko. Vinthu ivi vikulongora kuti Chiuta wali pafupi kuchitapo kanthu.​—Ŵazgani 2 Timote 3:1-5.

3. Tichite wuli pera?

Tikwenera kusambira Baibolo kuti timumanye Chiuta. Baibolo lili nga ni kalata iyo yafuma kwa dada uyo wakutitemwa. Likutiphalira umo tingachitira kuti tikhalenge makora sono, ndiposo umo tingazakasangira umoyo wamuyirayira. Ŵanyake ŵakukwenyelera para munthu wakumovwirani kuti mupulikiske Baibolo. Ndipouli, kuti umoyo wamuyirayira uleke kumupambani, mungaŵapulikanga yayi.​—Ŵazgani Zintharika 29:25; Chivumbuzi 14:6, 7.