SAMBIRO 4
Wakakondweska Adada Ŵake na Yehova
Kasi Yefita wakumulayizga vici Yehova apa?
Nangauli cikaŵa cakusuzga, kweni mwana wa Yefita wakacita ivyo adada ŵake ŵakalayizga
Kasi wamuwona msungwana pa cithuzithuzi apa?— Ni mwana wa Yefita. Baibolo likuzunura yayi zina lake, kweni tikumanya kuti wakakondweska Yehova na adada ŵake. Tiye tisambire vya mwana uyu na adada ŵake a Yefita.
Yefita wakaŵa dada muwemi ndipo wakasambizganga mwana wake vya Yehova. Wakaŵa wankhongono kweniso mulongozgi muwemi. Lekani Ŵaisrayeli ŵakamupempha kuti waŵalongozge pakurwa nkhondo na ŵalwani ŵawo.
Yefita wakalomba Ciuta kuti wamovwire. Yefita wakalayizga kuti para wawina nkhondo, munthu wakwamba kufuma munyumba yake kuti wakumane nayo wazamumupeleka kwa Yehova. Munthu uyu wakeneranga kukakhala na kuteŵetera pa cihema ca Ciuta umoyo wake wose. Cihema ghakaŵa malo agho ŵanthu ŵakale ŵakasoperanga Ciuta. Yefita wakawina nkhondo. Yefita wati wawelera kunyumba, kasi ukumanya uyo wakamba kufuma munyumba yake na kukumana nayo?—
Enya, ni mwana wake msungwana. Wakaŵa mwana wake yumoza pera, ndipo pa nyengo iyi Yefita wakeneranga kukamupeleka ku cihema. Ici cikamucitiska citima. Kweni kumbuka kuti wakalayizga kale. Nyengo yeneyiyo, mwana wake wakati: ‘Usange mwapangana na Yehova mukwenera kufiska.’
Caka cilicose, ŵabwezi ŵa mwana wa Yefita ŵakalutanga kukacezga nayo
Mwana wa Yefita wati wapulika layizgo la awiske, nayo wakaŵa na citima. Pa cihema wakeneranga yayi kutengwa na kuŵa na ŵana. Kweni wakakhumbisiska kusunga layizgo la adada ŵake na kukondweska Yehova. Ndico cikaŵa cakukhumbikwa comene kwa iyo kuluska kutengwa na kuŵa na ŵana. Ntheura, wakafumapo panyumba na kukakhala pa cihema umoyo wake wose.
Kasi ukughanaghana kuti ivyo wakacita vikakondweska adada ŵake na Yehova?— Enya, vikaŵakondweska! Usange ukupulikira na kutemwa Yehova, uŵenge nga mwana wa Yefita. Nawe ukondweskenge ŵapapi ŵako na Yehova.