Samuyeli Wakalutilira Kucita Viwemi

Kufuma apo wakaŵa mucoko, Samuyeli wakakhalanga na kuteŵetera pa cihema. Cihema ghakaŵa malo agho ŵanthu ŵakasoperangako Ciuta. Kasi ukumanya ivyo vikacitika kuti Samuyeli wasangike pa cihema? Cakwamba, tiye tisambire vya Hana uyo ŵakaŵa mama wa Samuyeli.

Nangauli Hana wakakhumbisiska kuti waŵe na mwana, kweni wakakhala nyengo yitali kwambura kubaba. Ntheura wakalomba Yehova kuti wamovwire. Wakalayizga kuti usange wangaŵa na mwana mwanalume wamumupeleka kwa Yehova kuti wamuteŵetere umoyo wake wose pa cihema. Yehova wakazgora ivyo Hana wakalomba ndipo wakababa mwana mwanalume. Wakamuthya Samuyeli. Nga umo Hana wakalayizgira, apo Samuyeli wakaŵa na vyaka vitatu panji vinayi, wakamupeleka ku cihema kuti wakateŵetere Ciuta.

Eli wakaŵa musofi mulara pa cihema. Musofi wakaŵa munthu uyo wakapelekanga sembe pa cihema. Ŵana wake ŵaŵiri nawo ŵakateŵeteranga pa cihema. Kumbuka kuti cihema ghakaŵa malo agho ŵanthu ŵakasoperangako Ciuta. Ntheura ŵanthu ŵakeneranga kucita vinthu viwemi pa malo agha. Kweni ŵana ŵa Eli ŵakacitanga vinthu viheni comene. Samuyeli wakawonanga ivyo ŵakacitanga. Kasi Samuyeli wakatolerako vinthu viheni ivyo ŵana ŵa Eli ŵakacitanga?— Yayi. Iyo wakalutilira kucita viwemi ivyo ŵapapi ŵake ŵakamusambizga.

Kasi ukughanaghana kuti Eli wakeneranga kucita nawo vici ŵana ŵake?— Wakeneranga kuŵalanga na kuŵalekeska kuteŵetera panyumba ya Ciuta. Kweni ndivyo Eli wakacita yayi. Pa cifukwa ici, Yehova wakamukwiyira Eli na ŵana ŵake. Yehova wakaghanaghana kuti waŵalange.

Zuŵa linyake usiku, apo Samuyeli wakagonanga, wakapulika munthu munyake wakucema. Wakati: ‘Samuyeli!’ Samuyeli wakacimbilira kwa Eli, kweni Eli wakati: ‘Nindakucemepo.’ Wakacemekaso kaciŵiri. Ndipo wati wacemekaso kacitatu, Eli wakamuphalira kuti para wapulikaso lizgu, wayowoye kuti: ‘Yowoyani Yehova, pakuti nkhupulika.’ Ndivyo Samuyeli wakacita. Ndipo Yehova wakati kwa Samuyeli: ‘Uphalire Eli kuti nilangenge nyumba yake cifukwa ca vinthu viheni ivyo ŵakucita.’ Kasi ukughanaghana kuti cikaŵa cipusu kwa Samuyeli kukaphalira Eli uthenga uwu?— Cikaŵa cipusu yayi. Nangauli Samuyeli wakawopanga, kweni wakacita ivyo Yehova wakamuphalira. Ivyo Yehova wakayowoya vikacitika. Ŵana ŵa Eli ŵakakomeka, ndipo Eli nayo wakafwa.

Nase tingasambirako kwa Samuyeli. Wakacita ico nchiwemi nangauli wakawonanga ŵanyake ŵakucita viheni. Iwe ke? Kasi uŵenge nga ni Samuyeli na kulutilira kucita viwemi? Para ndimo ucitirenge, ukondweskenge Yehova na ŵapapi ŵako.