Sambizgani Ŵana Ŵinu

Samuyeli Wakalutilira Kucita Viwemi

KASI muli kuwonapo ŵanthu ŵanyake ŵakucita vinthu viheni?—a Samuyeli wakaŵawonapo. Wakakhalanga kumalo agho mungagomezga yayi kuti ŵangacitirako vinthu viheni. Kukaŵa ku Shilo, uko kukaŵa cihema ca Ciuta, panji kuti malo ghakusoperamo. Tiyeni tiwone ivyo vikacitika kuti Samuyeli wambe kukhala pa cihema. Kufuma apo nkhani iyi yikacitikira pajumpha vilimika vyakujumpha 3,000.

Pambere Samuyeli wandababike, anyina, ŵakakhumbisiska comene kuŵa na mwana. Apo Hana wakaluta ku cihema, wakalomba kwa Ciuta kuti wamupe mwana. Wakafwilirapo comene kulomba, mwakuti milomo yake yikanjenjemeranga. Ici cikapangiska Eli, uyo wakaŵa musofi mukuru kughanaghana kuti Hana waloŵera. Kweni Eli wakati wamanya kuti Hana wakucita nthena cifukwa ca kusuzgika maghanoghano, wakatumbika Hana, wakati: “Ciuta wa Israyeli wakupe ico walomba kwa Iye.”—1 Samuel 1:17.

Pamasinda, Samuyeli wakababika ndipo Hana wakakondwa comene, mwakuti wakaphalira mfumu wake Elikana kuti: ‘Para Samuyeli waleka konkha, nilutenge nayo ku cihema mwakuti wakateŵetere Ciuta.’ Mwakuti ndivyo wakacita nadi. Pa nyengo iyo, Samuyeli wakwenera kuti wakaŵa na vilimika vinayi panji vinkhondi.

Eli wakaŵa kuti wacekura, ndipo ŵana ŵake, Hofini na Finihasi ŵakasopanga Yehova mu nthowa yakwenelera yayi. Ŵakacitanga nanga mbuzaghali na ŵanakazi awo ŵakizanga ku cihema. Kasi mukughanaghana kuti ŵawiskewo ŵakeneranga kucitaci?— Enya, ŵakeneranga kuŵalanga na kuŵakanizga kucita vinthu viheni ivi.

Malo agha ndigho wakakulirako Samuyeli, ndipo wakwenera kuti wakamanyanga nkharo yiheni ya ŵana ŵa Eli. Kasi Samuyeli wakatolera nkharo yawo yiheni?— Cara, wakalutilira kucita viwemi, nga umo ŵapapi ŵake ŵakamusambizgira. Nchakuzizwiska yayi kuti Yehova wakakwiya na Eli. Yehova wakatuma nanga ni mprofeti kuti wakaphalire Eli umo mbumba yake yilangikirenge, comenecomene ŵana ŵake ŵambura nkharo.—1 Samuel 2:22-36.

Samuyeli wakalutilira kuteŵetera lumoza na Eli pa cihema. Usiku unyake apo Samuyeli wakaŵa mu tulo, wakapulika kumucema. Mwantheura, Samuyeli wakacimbilira kwa Eli, kweni Eli wakati wandamucemepo. Ivi vikacitikaso kaciŵiri. Vikati vyacitika kacitatu, Eli wakaphalira Samuyeli kuti usange wapulika kucema ukati: “Yowoyani Yehova, pakuti mteŵeti winu wakupulika.” Samuyeli wakati wayowoya ntheura, Yehova wakayowoya nayo. Kasi mukumanya ivyo Yehova wakaphalira Samuyeli?—

Ciuta wakaphaliraso Samuyeli kuti walangenge mbumba ya Eli. Kukati kwaca Samuyeli wakacita wofi kuphalira Eli ivyo Yehova wakayowoya. Kweni Eli wakaŵeyelera Samuyeli kuti: “Ungandibisiranga [cara].” Ntheura, Samuyeli wakamwandulira Eli vyose ivyo Yehova wakayowoya, kuti wacitenge, nga ni umo mprofeti wakamuphalilirapo kale. Eli wakazgora kuti: “Ndi Yehova! wacite ico nchiwemi mu maso ghake.” Paumaliro, Hofini na Finihasi ŵakakomeka, Eli nayo wakafwa.—1 Samuel 3:1-18.

Panyengo iyi, “Samuyeli wakakura ndipo Yehova wakaŵa nayo.” Samuyeli wakwenera kuti wakaŵa muwukirano, nyengo yakuzirwa comene pa umoyo wa ŵana. Kasi mukughanaghana kuti cikaŵa cipusu kuti Samuyeli walutilire kucita viwemi apo ŵanji ŵakacitanga viheni?— Nangauli cikaŵa cipusu yayi, Samuyeli wakateŵetera Yehova mwakugomezgeka umoyo wake wose.—1 Samuel 3:19-21.

Imwe ke? Kasi muŵenge ŵakugomezgeka nga ni Samuyeli apo mukukura? Kasi mulutilirenge kucita viwemi? Kasi mulutilirenge kulondezga ivyo Baibolo likuyowoya ndiposo ivyo ŵapapi ŵinu ŵakumusambizgani? Usange mungacita nga ni Samuyeli mukondweskenge Yehova kweniso ŵapapi ŵinu.

[Mazgu ghamusi]

[Bokosi pa peji 25]

Mafumbo:

❍ Vikenda wuli kuti Samuyeli wambe kuteŵetera pa cihema?

❍ Ni masuzgo wuli agho Samuyeli wakasangana nagho apo wakateŵeteranga pa cihema?

❍ Kasi ŵana ŵakwenera kusambirako vici kwa Samuyeli?