Yeremiya Wakaleka Yayi Kuyowoya vya Yehova

Nyengo zinyake ŵanthu ŵakutiseka panji kutikwiyira para tikuyowoya nawo vya Yehova. Ivi vingatipangiska kuti tileke kuyowoya vya Yehova. Kasi nawe uli kughanaghanapo nthena?— Baibolo likutiphalira vya munyamata munyake uyo wakatemwanga Yehova, kweni wakakhumbanga kuleka kuyowoya vya iyo. Zina lake wakaŵa Yeremiya. Tiye tisambire vinandi vya iyo.

Apo Yeremiya wakaŵa munyamata, Yehova wakamutuma kuti wacenjezge ŵanthu kuti ŵaleke kucita vinthu viheni. Ici cikaŵa cakusuzga kwa Yeremiya. Wakawopanga. Wakaphalira Yehova kuti: ‘Nkhumanya yayi kuyowoya, cifukwa nili mwana.’ Kweni Yehova wakati: ‘Kopa visko vyawo cara cifukwa nikovwirenge.’

Yeremiya wakamba kucenjezga ŵanthu kuti Ciuta waŵalangenge usange ŵalekenge kusintha. Kasi ukughanaghana kuti ŵanthu ŵakacita ivyo Yeremiya wakayowoya?— Yayi. Ŵanji ŵakamusekanga ndipo ŵanyake ŵakamukwiyiranga. Ŵanji ŵakakhumbanga na kumukoma wuwo! Kasi ukughanaghana kuti Yeremiya wakacita wuli?— Wakawopa ndipo wakati: ‘Niyowoyengeso vya Yehova ca.’ Kweni kasi wakaleka nadi kuyowoya vya Yehova?— Yayi. Wakamutemwanga comene Yehova, mwakuti wakaleka yayi kuyowoya vya iyo. Pakuti Yeremiya wakaleka yayi, Yehova wakamuvikilira.

Mwaciyelezgero, ŵanthu ŵaheni ŵakaponya Yeremiya mu khululu la mathipa. Wakaŵavya cakurya na maji. Ŵanthu aŵa ŵakakhumbanga kuti Yeremiya wafwire mwenemumo. Kweni wakapona cifukwa Yehova wakamovwira!

Kasi ungasambirako vici kwa Yeremiya?— Nangauli nyengo zinyake wakawopanga, kweni wakaleka yayi kuyowoya vya Yehova. Usange ukuyowoya vya Yehova, ŵanthu ŵangakuseka panji kukukwiyira. Soni zingakukora kweniso ungawopa. Kweni kuleka yayi kuyowoya vya Yehova. Wakovwirenge nga umo wakacitira na Yeremiya.