Sambizgani Ŵana Ŵinu

Yeremiya Wakaleka Yayi

KASI muli kugongowapo na kukhumba kuleka kucita cinthu cinyake?—a Ŵanandi ŵali kucitapo. Ndivyo wakacita Yeremiya apo wakaŵa mwana. Ndipouli, wakazomerezga yayi kuti ivyo ŵanji ŵakayowoyanga panji kucita vimupangiske kuleka kuteŵetera Ciuta. Nga umo tiwonerenge, Yeremiya wakaŵa wapadera kwa Ciuta, kweni nayo ŵakakhumbanga kuleka.

Pambere Yeremiya wandababike, Yehova, uyo ni Ciuta waunenesko wakamusora kuti wazakaŵe nchimi. Wakeneranga kucenjezga ŵanthu kuti ŵaleke kucita vinthu ivyo vikukwiyiska Ciuta. Kasi mukumanya ivyo Yeremiya wakaphalira Yehova nyengo yikati yajumphapo?— “Ningamanya kuyowoya cara, cifukwa ndili mwana.”

Kasi mukughanaghana kuti Yehova wakamuzgora wuli Yeremiya?— Mwalusungu kweni mwambura kupepura fundo, Yehova wakati: “Leka kunena kuti, ‘Ndili mwana pera’; pakuti utiulutenge kwa wose awo ndamkutumako, ndipo cose ico ndakulangulira, uciyowoye. Ungopanga.” Cifukwa wuli Yeremiya wakeneranga kopa yayi? Yehova wakati: “Cifukwa Ine ndili nawe kukuthaska iwe.”—Yeremiya 1:4-8.

Kweni nga umo tawonera, Yeremiya wakagongowa cifukwa cakuti wakagoskekanga pakuteŵetera Ciuta. Iyo wakati: ‘Nkhuhoyeka mazuŵa ghose; munthu yose wakuniseka.’ Ntheura, wakaghanaghana kuleka kuteŵetera Ciuta. Wakati: “Ndimuzunurenge [Yehova] cara, nesi kuyowoyaso mu zina lake.” Kweni kasi wakaleka nadi?

Yeremiya wakati: ‘Mu mtima wane muli ngati moto wakunyeka wakujalirika mu viwangwa vyane, navuka na kuwukora mukati, ndipo natondeka.’ (Yeremiya 20:7-9) Nangauli nyengo zinyake Yeremiya wakaŵa na wofi, kweni wakaleka yayi mulimo wake cifukwa wakatemwanga Yehova. Tiyeni tiwone umo Yeremiya wakavikilirikira cifukwa cakuti wakaleka yayi.

Yehova wakaphalira Yeremiya kuti wacenjezge ŵanthu kuti Yerusalemu waparanyikenge usange ŵanthu ŵakusintha yayi nthowa zawo ziheni. Apo Yeremiya wakaŵacenjezganga, ŵanthu ŵakakwiya comene ndipo ŵakati: “Munthu uyu wakwenera kufwa.” Ndipouli, Yeremiya wakaŵaŵeyelera kuti ‘ŵapulikire mazgu gha Yehova.’ Pamanyuma wakati: ‘Manyani kuti usange mukunikoma, muti mujikhizgire ndopa zambura cifukwa, nkhuneneska kuti Yehova wandituma kwa imwe.’ Kasi mukumanya ivyo vikacitika pamanyuma pake?—

Baibolo likuti: “Ŵakaronga na ŵanthu wose ŵakati ku ŵapristi na zinchimi, ‘munthu uyu kuti wakwenelera kufwa cara, cifukwa wayowoya kwa ise mu zina la Yehova Ciuta withu.’” Ntheura, Yehova wakamuvikilira Yeremiya cifukwa wakazomerezga yayi kuti wofi umupangiske kuleka mulimo wake. Tiyeni tiwone ivyo vikacitikira Uriya, uyo nayo wakaŵa nchimi ya Yehova, kweni wakacita vinthu mwakupambanako na Yeremiya.

Baibolo likuti: ‘Uriya wakacimanga vya Yerusalemu kwakulingana na mazgu ghose gha Yeremiya.’ Kweni apo Themba Yehoyakimu likakwiyira Uriya, kasi mukumanya ivyo Uriya wakacita?— Wakacita wofi, wakaleka kucita khumbo la Ciuta, ndipo wakacimbilira ku Eguputo. Kweni themba likatuma ŵanthu kuti ŵakamupenje na kwiza nayo. Ŵakati ŵiza nayo, kasi mukumanya ivyo themba liheni ili likacita?— Likakoma Uriya na lupanga.—Yeremiya 26:8-24.

Kasi mukughanaghana kuti nchifukwa wuli Yehova wakavikilira Yeremiya kweni wakamuvikilira yayi Uriya?— Nga ni Uriya, Yeremiya nayo wakwenera kuti wakawopanga, kweni wakaleka yayi kuteŵetera Yehova nesi kucimbira. Kasi mukughanaghana kuti tikusambirako vici kwa Yeremiya?— Tikusambirako kuti nyengo zinyake tingawona kuti nchakusuzga kucita ivyo Ciuta wakuyowoya, kweni nyengo zose tikwenera kumugomezga na kumupulikira.

[Mazgu ghamusi]

Mafumbo:

○ Kasi Ciuta wakasora Yeremiya kuti wacite mulimo wuli?

○ Cifukwa wuli Yeremiya wakakhumbanga kuleka mulimo wake?

○ Cifukwa wuli Yeremiya wakavikilirika kweni Uriya yayi?

○ Kasi mwasambirako vici kwa Yeremiya?